သျှမ်းပြည်တောင်ပိုင်း တောင်ကြီးမြို့ တွင် မိုးသည်းထန်စွာရွာသွန်းမှုကြောင့် ရေကြီး မြေပြိုမှုဖြစ်ပွါးကာ အမျိုးသား တစ်ဦး သေဆုံးခဲ့ကြောင်း စုံစမ်းသိရှိရသည်။
ယမန်နေ့ သြဂုတ်လ ၃ ရက်က မိုးသည်းထန်းစွာ ရွာသွန်းမှုကြောင့် တောင်ကြီးမြို့ ကံသာရပ်ကွက်၌ မြေပြို၊ ကျောက်တောင်ပြိုကျမှုဖြစ်ပွါးရာ အသက် ၂၆ နှစ်အရွယ် အမျိုးသား တစ်ဦးသေဆုံးခဲ့ကြောင်း ကံသာရပ်ကွက် အုပ်ချုပ်ရေးမှူး ဦးဝင်းမောင် က သျှမ်းသံတော်ဆင့် ကိုပြောသည်။
“ မနေ့ က နေ့ခင်းပိုင်းမှာ မိုးတွေ တအားရွာလို့ ကျောက်တောင်ပိပြီး သေဆုံးသွားတဲ့ အမျိုးသားကို ဘယ်လိုမှ ထုတ်လို့ မရဘူး။ မနေ့ည ၈ နာရီခွဲလောက်မှ အလောင်း ကို ထုတ်လို့ ရတယ်” ဟု ဦးဝင်းမောင် ကပြောသည်။
မိုးသည်းထန်စွာ ရွာသွန်းမှုကြောင့် တောင်စောင်းရှိ အငှားအိမ်တလုံးပေါ် ကို မြေပြို၊ ကျောက်တောင်ပြိုကျသဖြင့် အိမ်အတွင်းရှိ အမျိုးသားတဉီး ကျောက်တုံးပိမိကာ အဆိုပါအမျိုးသား သေဆုံးသွားရခြင်းဖြစ်ကြောင်း ဦးဝင်းမောင်က ပြောသည်။
အဆိုပါကျောက်ပြိုကျမှုကြောင့် သေဆုံးသွားသည့် အမျိုးသားတွင် ဇနီးဖြစ်သူနှင့် လသားအရွယ် ကလေး တဦး ကျန်ခဲ့ကြောင်း သိရသည်။
ထို့ပြင် ယမန်နေ့ က တောင်ကြီးမြို့ နှင့် အေးသာယာမြို့တို့တွင် မိုးသည်းထန်စွာရွာသွန်းမှုကြောင့် ရွှေညောင်မြို့ တွင် ရေကြီးရေလျှံမှုများ ကြုံတွေ့နေရကြောင်းလည်း ရွှေညောင်ဒေသခံများ ပြောပြချက် အရသိရသည်။
“ကျနော်တို့က တောင်ကြီး နဲ့ အေးသာယာမှာ ရွာမှာကို စိုးရိမ်တာ။ တောင်ပေါ်မှာ ရွာရင် ကျနော်တို့ ရွှေညောင်က ရေကြီးပြီ။ကျနော်တို့ အိမ်လည်း ရေဝင်တယ်။ မနေ့ည ဆိုရင် မအိပ်ရဘူး ၁ နာရီ ၂ နာရီလောက်ကို ရေ အတက်အကျ ကြည့်နေရတယ်။ ရေဘယ်ချိန်ကြီးမလဲဆိုတာ တရပ်ကွက်လုံး လိုလိုပဲ ငုတ်တုတ်ထိုင်စောင့်နေရတယ်” ဟု ရွှေညောင် ဒေသခံ တဦးဖြစ်သည့် ကိုမိုး ကပြောသည်။
လက်ရှိ အချိန်ထိ ရွှေညောင်မြို့ ရပ်ကွက်တချို့တို့တွင် ရေကြီးရေလျှံမှု ဆက်လက်ရှိနေသေးသဖြင့် နေအိမ်အပြင်သို့ မထွက်နိုင်သေးကြောင်းလည်း ဒေသခံများ ပြောပြချက် အရ သိရသည်။
တောင်ကြီးမြို့ အနီးပတ်ဝန်းကျင်တွင် သဘာဝ ပျက်စီးမှုများ၊ စည်းကမ်းမဲ့ အမှိုက်စွန့်ပစ်မှုများကြောင့် ရေမြောင်းများပိတ်ကာ မိုးရွာတိုင်း ရေကြီးရေလျှံမှု ဖြစ်နေရကြောင်း ရှင်သန်ကမ္ဘာမြေ အစိမ်းရောင် ကွန်ယက် ဥက္ကဌ ဒေါ်ချယ်ရီကျော်က သျှမ်းသံတော်ဆင့် ကို ပြောသည်။
“သဘာဝတွေ ပျက်စီးလို့ လူနေအိမ်များလာတယ်။ စည်းကမ်းမဲ့အမှိုက်စွန့်ပစ်တာတွေ ရေမြောင်းထဲ အမှိုက်စွန့်ပစ်တာတွေ လည်းပါတယ်။ မြောင်းတွေ ပိတ်တာတွေလည်းပါတယ် ” ဟု ဒေါ်ချယ်ရီကျော် က သျှမ်းသံတော်ဆင့် ကပြောသည်။
ရေစုပ်ယူနိုင်စွမ်းရှိသည့် မြေသား နည်းပါးလာပြီး တည်ဆောက်မှုများကြောင့် အင်္ဂတေ များလာသဖြင့် ရေကြီးရေလျှံမှုဖြစ်ရကြောင်း၊ အထူးသဖြင့် အမှိုက်များ စနစ်တကျ မစွန့်ပစ်ပါက ချောင်းမြောင်းပိတ်ဆို့မှုဖြစ်ပွါးကာ ရေကြီးမှုကို နှစ်စဉ်ကြုံရမည် ဖြစ်ကြောင်း ဒေါ်ချယ်ရီကျော်က ဆိုသည်။
တောင်ကြီးမြို့ တွင် မိုးရာသီရောက်တိုင်း ရေကြီးရေလျှံမှုသည် တနှစ်ထက် တနှစ် ပိုမိုဆိုးရွားလာသည်ဖြစ်ရာ သက်ဆိုင်ရာ အာဏာပိုင်များ အမြန်ဆုံးဖြေရှင်းပေးရန်လည်း တောင်ကြီး ဒေသခံများက တောင်းဆိုကြသည်။
“ ကျနော်တို့ ဖြစ်ချင်တာကတော့ အရင် က ဒီလိုရေကြီးမှုတွေ မဖြစ်ခဲ့ဘူး။ ဒီ ၂နှစ် အတွင်း ဒီလို ရေကြီးမှုတွေဆက်တိုက်ဖြစ်လာတယ်။ နောက်လည်းဖြစ်မယ်။ ဒီပြဿနာကို ဖြေရှင်းဖို့လိုအပ်နေပြီ။ မဟုတ်ရင် မိုးရွာတိုင်းရေကြီးလာနိုင်တယ်” ဟု တောင်ကြီးဒေသခံတဦး ကပြောသည်။
ယမန်နှစ် စက်တင်ဘာလကလည်း တောင်ကြီးမြို့တွင် မိုးသည်းထန်ရွာသွန်းမှုကြောင့် ရေမြောင်းတခုအတွင်း အသက် ၁၇ နှစ် အရွယ် အမျိုးသားတဦး ကျွံကျပြီး ရေစီးဖြင့် မျောပါ သေဆုံးခဲ့ကြောင်း သိရသည်။
တောင်ကြီးမြို့သည် သန့်ရှင်းသာယာပြီး နိုင်ငံခြား ခရီးသွားဧည့်သည်၊ ပြည်တွင်းခရီးသွားဧည့်သည်များကို ဆွဲဆောင်နိုင်သည့်မြို့တခုဖြစ်သည်။ ၂၀၁၉ ခုနှစ်ကလည်း အာဆီယံနိုင်ငံတွင် အသန့်ရှင်းဆုံး မြို့တော်ဆု ရရှိထားသည့် မြို့တမြို့ဖြစ်သည်။
အာဆီယံ အသန့်ရှင်းဆုံးမြို့တော်ဆု ရသော်လည်း လက်ရှိမှာ မိုးရွာသွန်းပါက ရေကြီး၊ ရေလျှံမှု ပြဿနာများကို ပြည်သူများ ရင်ဆိုင် ကြုံတွေ့နေရသဖြင့် ဒေသခံများ စိတ်ကျေနပ်မှု မရှိကြပေ။