ပအိုဝ်းတိုင်းရင်းသားများက PNO ပါတီကိုသာ မဲပေးချင်သည်ဟု တောင်းဆိုလာသည့်အတွက် ပြည်ခိုင်ဖြိုးပါတီကို မဟာမိတ် အဖြစ် မှ ရပ်စဲလိုက်ရခြင်းဖြစ်ကြောင်း PNO ကပြောသည်။
ပြီးခဲ့သည့် ရွေးကောက်ပွဲ သက်တမ်းများတွင် ပအိုဝ်းအမျိုးသားအဖွဲ့ချုပ် (PNO) သည် ပြည်ခိုင်ဖြိုးပါတီ (USDP) နှင့် မဟာမိတ်အဖြစ် လက်တွဲဆောင်ရွက်ခဲ့သည်။
သို့သော် လာမည့် ရွေးကောက်ပွဲတွင် PNO အနေဖြင့် UDSPပါတီကို မဟာမိတ် အဖြစ်လက်မတွဲတော့ကြောင်း၊ ပအိုဝ်းတိုင်းရင်းသားများ၏ တောင်းဆိုချက်အရ မဟာမိတ်အဖြစ်ရပ်စဲလိုက်ရခြင်းဖြစ်ကြောင်း PNO အထွေထွေ အတွင်းရေးမှူး ခွန်သိန်းဖေ က သျှမ်းသံတော်ဆင့် ကို ပြောသည်။
“ ကျနော်တို့ ပြည်သူ (ပအိုဝ်း တိုင်းရင်းသား) တွေက ဘာပြောတုန်းဆိုတော့ ရွေးကောက်ပွဲက ၃ ကြိမ်လောက် ရှိလာပြီ။ ၂ ကြိမ် က ကိုယ့်လူမျိုးပါတီကို မဲမပေးလိုက်ရဘူး။ ကျနော်တို့လည်း ကိုယ့်လူမျိုးပါတီကိုပဲ မဲပေးချင်တယ် လို့ ပြောလာလို့ပါ” ဟု ခွန်သိန်းဖေ က ပြောသည်။
PNO အနေဖြင့် ပြည်ခိုင်ဖြိုးပါတီ USDP အား ရွေးကောက်ပွဲ တွင် လက်တွဲဖြုတ်ခဲ့သော်လည်း ကျန် နိုင်ငံတော် အကျိုး၊ ပြည်နယ် အကျိုး၊ ဒေသ အကျိုးတို့ဆက်ပြီး ပူးပေါင်း ဆောင်ရွက်သွားမည် ဟု ခွန်သိန်းဖေ က ထပ်လောင်း ပြောသည်။
“ ဘယ်နေရာမှာပဲ ဝင်ပြိုင်ပြိုင် ကိုယ့်ဒေသ ကိုယ့်မြို့နယ် ကိုယ့်တိုင်းပြည်အတွက် အမှန်တကယ်ကို စွမ်းစွမ်းတမံ နဲ့ အရည်အချင်းပြည့်ဝတဲ့ လွှတ်တော်ကိုယ်စားလှယ်မျိုးတွေ ဝင်ပြိုင်တယ်ဆိုရင်တော့ လက်ခံကြိုဆိုပါတယ်” ဟု ပအိုဝ်း ကိုယ်ပိုင်အုပ်ချုပ်ခွင့်ရ ဒေသ ဆီဆိုင်တွင်နေထိုင်သည့် ဒေသခံတဦးကပြောသည်။
လွန်ခဲ့သည့် ၂၀၁၅ ရွေးကောက်ပွဲ တွင် သျှမ်းပြည် လွှတ်တော် ၌ အဆိုတင်ပြ ဆွေးနွေးခြင်းမပြုသည့် လွှတ်တော်ကိုယ်စားလှယ် ၁၀၀ကျော် ရှိသည့်အတွက် သျှမ်းပြည်လူထုအနေဖြင့် ၅နှစ်သာ ကာလ မဲပေးလိုက်ရသည်မှာ ဆုံးရှုံးမှု ဖြစ်ခဲ့ကြောင်းလည်း ၎င်းဒေသခံက ဆိုသည်။
လာမည့် ၂၀၂၀ အထွေထွေ ရွေးကောက်ပွဲတွင် ပအိုဝ်းအမျိုးသားအဖွဲ့ချုပ် ( PNO) ပါတီမှ သျှမ်းပြည်အပြင်တခြား ပြည်နယ် မှာ မဲဆန္ဒနယ် (၃၅) နေရာ ရွေးကောက်ယှဉ်ပြိုင် သွားမည်ဖြစ်ကြောင်း သိရသည်။
ပအိုဝ်းအမျိုးသားအဖွဲ့ချုပ်ပါတီ (PNO) သည် အမျိုးသား လွှတ်တော် (၅)နေရာ၊ ပြည်သူ့လွှတ်တော် (၁၀) နေရာ၊ ပြည်နယ် နှင့် တိုင်းဒေသကြီးလွှတ်တော် (၁၈) နေရာ နှင့် မွန်ပြည်နယ် ရှိ တိုင်းရင်းသား ရေးရာ ဝန်ကြီး (၁) နေရာ နှင့် ကရင်ပြည်နယ်ရှိ တိုင်းရင်းသား ရေးရာဝန်ကြီး (၁) နေရာ တို့တွင် ဝင်ရောက်ယှဉ်ပြိုင်သွားမည်ဖြစ်ကြောင်း သိရသည်။
၎င်း ဝင်ရောက်ယှဉ်ပြိုင်မည့်နေရာများသည် ပအိုဝ်းတိုင်းရင်းသားများအနေများသည့် ဟိုပုံးမြို့နယ်၊ ဆီဆိုင်မြို့နယ်၊ ပင်လာင်းမြို့နယ်၊ တောင်ကြီးခရိုင်၊ လွိုင်လင်ခရိုင်၊ လင်းခေးခရိုင် နှင့် ကယားပြည်နယ် လွိုင်ကော်တို့တွင်ဖြစ်ကြောင်း သိရသည်။
“ပအိုဝ်း တော်တော်များများ နေထိုင်တဲ့ မြို့နယ်တွေတော့ နိုင်မယ်လို့တော့ ကျနော်တို့ ယုံကြည်တယ်။ ဥပမာ တောင်ကြီးတို့ လွိုင်လင်တို့ အဲ့ဘက်မှာ ပအိုဝ်းများတယ်လေ အဲ့ဒါတွေတော့ နိုင်မယ်လို့ ကျနော်တို့ ယုံကြည်တယ်” ဟု ခွန်သိန်းဖေ က ဖြည့်စွက်ပြောသည်။
လာမည့် ရွေးကောက်ပွဲ မဲဆွယ်စည်းလုံးရေး ကာလသည် ကမ္ဘာတဝှမ်းရင်ဆိုင်နေရသည့် ကိုဗစ်-၁၉ ကပ်ရောဂါ ကာကွယ် ထိန်းချုပ်သည့် အချိန်ကာလလည်းဖြစ်သော်လည်း PNO အနေဖြင့် အခက်အခဲ စိန်ခေါ်မှုများ မရှိနိုင်ကြောင်းလည်း သူ က ပြောသည်။
“ရွေးကောက်ပွဲဝင်တာတော့ ဘာမှတော့ အခက်ခဲမရှိဘူး။ ဘာလို့လဲဆိုတော့ ကိုယ့်ပရိသတ်နဲ့ကိုယ်လေ။ ကိုယ့်လူမျိုးနဲ့ကိုယ် ဆိုတော့ အခက်ခဲတော့မရှိဘူး” ဟု ခွန်သိန်းဖေ က ဆိုသည်။
၂၀၀၈ ဖွဲ့စည်းပုံအရ မြန်မာနိုင်ငံတွင် ကိုယ်ပိုင်အုပ်ချုပ်ခွင့်ရ ဒေသ ၆ ခု ရှိပြီး၊ သျှမ်းပြည်တောင်ပိုင်း တွင် ပအိုဝ်း ကိုယ်ပိုင်အုပ်ချုပ်ခွင့်ရဒေသ ထားရှိပေးထားသည်။
