သျှမ်းပြည်တောင်ပိုင်း တောင်ကြီး စဝ်စံထွန်းဆေးရုံတွင် ထားရှိမည့် Covid-19 ဓါတ်ခွဲခန်း သုံး ပစ္စည်း မပြည့်စုံသေးသဖြင့် သတ်မှတ်ရက်တွင် အသုံးမပြုနိုင်ခဲ့ခြင်းဖြစ်ကြောင်း စုံစမ်းသိရသည်။
တောင်ကြီး စဝ်စံထွန်း ဆေးရုံတွင် ထားရှိမည့် COVID-19 စစ်ဆေးနိုင်မည့် ဓာတ်ခွဲခန်းကို ဇူလိုင် လလယ်တွင် စတင်အသုံးပြုနိုင်မည်ဟုပြောဆိုထားခဲ့သော်လည်း လက်ရှိတွင် ဓာတ်ခွဲခန်းသုံး ပစ္စည်းနှင့် ကုန်ကျငွေ ခက်ခဲမှုကြောင့် သြဂုတ်လ မှစတင်စစ်ဆေးနိုင်တော့မည် ဟု စဝ်စံထွန်း ဆေးရုံကြီး ရောဂါ ရှာဖွေရေး ဌာန အထူးကု ဆရာဝန်ကြီး ဒေါက်တာ ပိုးပိုးလင်း က ပြောသည်။
“ကျမတို့ ပစ္စည်းဝယ်နေတယ်။ နောက်လ လယ်လောက်တော့ ပစ္စည်းတွေ စုံမယ်လို့တော့ သတင်းရရှိထားပါတယ်။ ခုက စီစဉ်တုန်းပါ။ ဒီထက် စောရင်လည်း စောမှာပေါ့နော်။ ပစ္စည်းတွေက ကိုဗစ် ကာလမှာ ဝယ်ရတာ အခက်အခဲဖြစ်တယ်။” ဟု ဒေါက်တာပိုးပိုးလင်း က သျှမ်းသံတော်ဆင့် ကိုပြောသည်။
အဆိုပါ ဓါတ်ခွဲခန်းသည် Covid-19 အပါအဝင် တခြား ဗိုင်းရပ်စ်ပိုးများကိုပါ စစ်ဆေးနိုင်မည်ဖြစ်ပြီး၊ ပုံမှန်လစဉ် ကျပ်သိန်းပေါင်း ၂၈၀၀ ခန့်လိုအပ်ကြောင်း လူမှုရေးဝန်ကြီး ဒေါက်တာမျိုးထွန်း က သျှမ်းသံတော်ဆင့် ကိုပြောသည်။
“လုပ်ဆောင်နိုင်ဖို့အတွက်က ဝယ်ရမယ့် ပစ္စည်းက ၄၆ မျိုး၊ ပုံမှန် လစဉ်က သိန်းပေါင်း ၂၈၀၀ ကျပ်လောက် လိုအပ်တယ်။ ရန်ပုံငွေ အခက်ခဲဖြစ်လို့ ပြည်ထောင်စု ကိုတင်ပြလိုက်တာပေါ့” လူမှုရေး ဝန်ကြီးဒေါက်တာမျိုးထွန်း က ပြောသည်။
စဝ်စံထွန်းဆေးရုံတွင် ထားရှိမည့် ဓါတ်ခွဲခန်းသည် သျှမ်းပြည်အတွင်းရှိ မြို့နယ် နှင့် ကယားပြည်နယ်မှ လာသည့် ဓါတ်ခွဲနမူနာ များကို စစ်ဆေးသွားမည်ဖြစ်ကြောင်း စဝ်စံထွန်းဆေးရုံအုပ်ကြီး ဒေါက်တာမြင့်သိန်း ကပြောသည်။
