မောက်မယ်မြို့ သင်္ချိုင်းမြေ တွင် ဘော်လုံးကွင်း တည်ဆောက်ရန် ကန့်ကွက်

သျှမ်းပြည်တောင်ပိုင်း လင်းခေးခရိုင် မောက်မယ်မြို့နယ်အတွင်း ဘော်လုံးကွင်း၊ တည်ဆောက်မည့် နေရာသည် သင်္ချိုင်းမြေဖြစ်နေသဖြင့် သျှမ်းထုံးတမ်းစဉ်လာအရ ထိခိုက်မည်ကို စိုးရမ်သဖြင့် ကန့်ကွက်ရခြင်း ဖြစ်ကြောင်း ဒေသခံများက ပြောဆိုကြသည်။

ဘော်လုံးကွင်း တည်ဆောက်မည့် မြေနေရာ ( ဓာတ်ပုံ မောက်မယ် ဒေသခံ တဦး)

ထို့ကြောင့် မြေနေရာကို အားကစားကွင်း ဆောက်လုပ်ရန်အတွက် ဒေသခံ လူငယ် (၈၀) ခန့်က မြေစာရင်းရုံးတွင် ကန့်ကွက်စာ တင်ထားကြောင်း သိရသည်။

“ဒီအားကစားကွင်း မြေနေရာ လျာထားတဲ့နေရာက ဒေသခံ မကြိုက်တဲ့နေရာဖြစ်နေတဲ့အတွက်ကြောင့်မလို့ ကန့်ကွက်ရခြင်းဖြစ်တယ်။ သင်္ချိုင်းမြေလည်း ဖြစ်တယ်။ ပြီးတော့ ပွင့်လင်းမြင်သာမှုလည်း မရှိဘူး။” ဟု မောက်မယ်မြို့နယ် မဲဆန္ဒနယ် အမှတ် (၁) ပြည်နယ်လွှတ်တော်ကိုယ်စားလှယ် နန်းဖွေးဟွမ်ဦး က သျှမ်းသံတော်ဆင့် ကိုပြောသည်။

ထိုဘော်လုံးကွင်း ဆောက်သည့် ကိစ္စသည် ပွင့်လင်းမြင်သာမှု မရှိကြောင်း၊ ဘော်လုံးကွင်း တည်ဆောက်မည့်ကိစ္စကိုလည်း ပြည်နယ်လွှတ်တော်ကိုယ်စားလှယ်များထံတစုံတရာ အကြောင်းကြားခြင်း မရှိကြောင်းလည်း နန်းဖွေးဟွမ်ဦး ကပြောသည်။

“ အမှန်ဆို ကျမရဲ့ မဲဆန္ဒနယ် ဖြစ်တယ် ဒီကိစ္စကို လုပ်တဲ့ချိန်မှာ ကျမ ကိုယ်တိုင်လည်း မသိရဘူး” ဟု နန်းဖွေးဟွမ်ဦးက ဆိုသည်။

ဘော်လုံးကွင်း တည်ဆောက်မည့် မြေနေရာ ( ဓာတ်ပုံ မောက်မယ် ဒေသခံ တဦး)

ထို အားကစားကွင်းဆောက်လုပ်ရန်အတွက် လွှတ်တော်ရန်ပုံငွေ နှင့် တစ်ပိုင်းတစ်စ အကောင်အထည်ဖော်ထားကြောင်း၊ ပြည်ထောင်စု အဆင့်တွင် ဘတ်ဂျတ်တောင်းခံထားပြီး ဘတ်ဂျတ် ကျလာပါက ဆက်လက် အကောင်အထည်ဖော်ဆောင်သွားမည်ဖြစ်ကြောင်း မောက်မယ်မြို့နယ် ဘောလုံး အဖွဲ့ချုပ်၏ ဥက္ကဌ ဦးစိုင်းစိုးထိုက် က သျှမ်းသံတော်ဆင့် ကို ပြောသည်။

“အခု အကောင်အထည်ဖော်နေတာကတော့ မြို့နယ် ဘောလုံးကွင်းအသစ်ပေါ့ အားကစားရုံတွေ ဘာတွေနဲ့ အဲ့လိုမျိုး ကျနော်တို့က ပြည်ထောင်စု ဘတ်ဂျတ်နဲ့ အဲ့လိုမျိုး ဖော်ချင်တာပေ့ါ” ဟု ဦးစိုင်းစိုးထိုက် က ပြောသည်။

လက်ရှိ အားကစားဖော်ဆောင်သည့်နေရာသည် မြို့ နှင့် ဝေးသည့် အတွက် လူငယ်များက သဘောမကျကြောင်းလည်း ဦးစိုင်းစိုးထိုက် က ပြောသည်။

“ဘာလို့ ကန့်ကွက်ကြတာလဲဆိုတော့ သူတို့က မြို့ပြင်ဖြစ်လို့ ဆိုပြီးတော့ ကန့်ကွက်ထားတယ်။မြို့ပြင်ဆိုတော့လည်း မြို့ခြံစည်းရိုးပဲ ခြားထားပါတယ်။ ဆိုင်ကယ်နဲ့ သွားရင် တစ်မိနစ်တောင်မကြာဘူး” ဟု ဦးစိုင်းစိုးထိုက် က ဆိုသည်။

မောက်မယ်မြို့နယ်တွင် သီးသန့် ဘောလုံးကွင်း မရှိဘဲ အများပြည်သူပိုင် မြေနေရာတွင် ဂေါက်ကွင်းရိုက်ခြင်း ၊ ဘောလုံးကစားခြင်း၊ အားကစားပြုလုပ်ခြင်း နှင့် ပွဲလမ်းသဘင် လုပ်လျှင်လည်း ထို ကွင်းမှာ ပြုလုပ်ခြင်း ဖြစ်ကြောင်း သိရသည်။

Leave a Comments

SHARE