သျှမ်းပြည်မြောက်ပိုင်း သီပေါမြို့နယ် အတွင်း တိုက်ပွဲဖြစ်ပွားမှုကြောင့် စစ်ရှောင်ရင်းအမျိုးသမီးတဦး ကလေးမွေးဖွားခဲ့ကြောင်း သိရသည်။
ယမန်နေ့ ဇူလိုင်၂၂ ရက်က သီပေါမြို့နယ် နားအုံရွာ နှင့် ပန်မုံရွာကြား တွင်သျှမ်းပြည်တိုးတက်ရေးပါတီ၊ သျှမ်းပြည်တပ်မတော် SSPP/SSA အား အစိုးရ တပ်မတော်က အင်အားဖြည့်တင်းပစ်ခတ်တိုက်ခိုက်ရာ ကျေးရွာမှ ညတွင်းချင်း စစ်ဘေးရှောင်တိမ်းထွက်ပြေးလာသည့် ကိုယ်ဝန်သည် အမျိုးသမီးတဦး ရွာနှင့် ၂ မိုင်ခန့်အကွာရှိ ဆောင်ကြဲကျေးရွာသို့ ည ၁၁ နာရီခွဲကျော်တွင် ရောက်ရှိသည်နှင့် ကလေးမွေးဖွားခဲ့ခြင်းဖြစ်ကြောင်းသိရသည်။
“မနေ့က ည ၁၁နာရီ ၄၀မိနစ်မှာ မွေးတယ်။ သားလေးပါ။ သေနတ်သံကြားလို့ ထွက်လာတာ။ မိခင်က ဘာမှ မပါလာဘူး။ မိခင်အတွက် ထမီ၊ ကလေးအတွက် အနှီးတွေလိုတယ်” ဟု စစ်ဘေးရှောင် ဆရာမ လှဝင်း က ပြောသည်။
စစ်ဘေးရှောင်လာပြီး မီးဖွားသည့် အမျိုးသမီးသည် ကျန်းမာရေး ကောင်းမွန်ကြောင်း၊ ကျေးလက်ဆရာမများရှိသည့်အတွက် စိတ်ပူစရာမလိုကြောင်းလည်း သီပေါမြို့နယ် ပြည်နယ် လွှတ်တော် အမတ်(၂) စိုင်းခမ်းအောင် က သျှမ်းသံတော်ဆင့်ကို ပြောသည်။
“ ကျနော်တို့ စစ်ဘေးရှောင်တွေရဲ့ အခြေအနေကို သွားကြည့်တယ်။ နောက် မနေ့က စစ်ရှောင်ရင်းကလေးမွေးတဲ့သူကိုလည်း သွားကြည့်တယ်” ဟု စိုင်းခမ်းအောင် က ဆိုသည်။
ယမန်နေ့ညနေ ၄နာရီခွဲ က သေနတ်သံစတင်ကြားရသဖြင့် မီးဖွားစ မိခင်နှင့် ကလေးငယ်တဦးလည်း လယ်ထဲရှိ တဲတွင်ကျန်ခဲ့ကြောင်း၊ ထို အမျိုးသမီးနှင့် ကလေးငယ်ကို ပြန်သွားခေါ်ရန် ခက်ခဲနေကြောင်းလည်း ဆရာမ လှဝင်း က ပြောသည်။
“ ကျမတို့သေနတ်သံတွေကြားတော့ ဘယ်သူကိုမှ ဂရုမစိုက်အားတော့ဘူး။ တချို့ ကလယ်ထဲက ထွက်ပြေးလာတယ်။တချို့က အိမ်ကနေ ပြေးလာကြတယ်။ ဒီမနက်မှ ကလေးမွေးတာ ၃ရက်ပဲရှိသေးတဲ့ မိခင်နဲ့ ကလေးငယ်မပါလာတာ သိတယ်” ဟု ဆရာမ လှဝင်း ကဆိုသည်။
ထို မွေးဖွားစ မိခင်နှင့် ကလေးငယ်အတွက် စိတ်ပူနေရကြောင်း၊ မိုးရွာထဲတွင်ထွက်ပြေးလာသည့်အတွက် ထိုသူ ၂ဦးမှာ အဝတ်အစားမရှိနိုင်ကြောင်း ဆောင်ကြဲကျေးရွာ ဘုန်းကြီးကျောင်းတွင် ရောက်နေသည့် စစ်ရှောင်များက ပြောပြသည်။
“ ကျမတို့ နားအုံကျေးရွာမှာ တပ်မတော်ရှိသေးတယ်။ ရွာပြန်လို့လည်းမရဖြစ်နေတယ်” ဟု နားအုံကျေးရွာ ဒေသခံ အမျိုးသမီး နန်းလောဝ် က ပြောသည်။
လက်ရှိတွင် တိုက်ပွဲကြောင့် ဆောင်ကြဲကျေးရွာ ဘုန်းကြီးကျောင်းတွင် စစ်ရှောင်လာသည့် သူ ၂၆၂ ဦးရှိပြီး၊ အစားအသောက်အတွက်ခက်ခဲနေဆဲ ဟု လည်း နန်းလောဝ် က ဆိုသည်။
“ အစားကတော့ ခက်ခဲတယ်။ မနက်က တယောက်ကို ခေါက်ဆွဲတထုတ်၊ ကြက်ဥတလုံး နဲ့ဝက်ခေါက် တထုတ် ဝေပေးတယ်၊ ထမင်း၊ဟင်းတွေချက်ဖို့ကတော့ လုပ်နေပြီ” ဟု နန်းလောဝ် ကပြောပြသည်။
စစ်ဘေးရှောင်များကို သီပေါမြို့နယ် မှ လွှတ်တော်ကိုယ်စားလှယ် အမတ်များက လာရောက်ကြည့်ရှုပြီး၊ စားသောက်ရေးအတွက် ငွေကျပ် ၂ သိန်း ပေးခဲ့ကြောင်းလည်း သိရသည်။
ဆောင်ကြဲကျေးရွာသို့စစ်ရှောင်ရောက်ရှိနေသူ အများစုသည် ကလေးများဖြစ်နေပြီး၊ ယမန်နေ့ ထွက်ပြေးတိမ်းရှောင်လာချိန် မိုးသည်းထန်စွာ ရွာသဖြင့် အဝတ်များ မိုးရေစိုရွှဲကုန်ကြောင်း၊ လဲလှယ်စရာ အဝတ်အပို မယူဆောင်လာခဲ့ရကြောင်း စစ်ရှောင်များက ပြောသည်။
“ အခု နောက်ထပ် အခက်အခဲဖြစ်နေတာ က မနေ့ကမိုးရေတွေစိုလို့အဝတ်တွေလဲစရာမရှိဘူး။ အဝတ်တထည်နဲ့ ထွက်လာတော့ ဒီတိုင်းအဝတ်စိုနဲ့နေတယ်။ ဒီကလူတော်တော်များများ နှာစေး၊ ချောင်းဆိုးနေကြပြီ” ဟု ဆရာမလှဝင်း ကထပ်လောင်းပြောသည်။
လက်ရှိမှာ ကျေးရွာတွင် အသက် ၅၀ကျော် အဘိုးကြီးများသာ ကျန်ရှိနေခဲ့ကြောင်း၊ ရွာထဲတွင် တပ်မတော်ရှိနေသေးသဖြင့် နေရပ်ပြန်ရန် မဖြစ်နိုင်သေးကြောင်းလည်း စစ်ရှောင်များက ပြောသည်။
“ အဝတ်လည်းမပါ။ လယ်ယာကလည်း လုပ်နေတော့ ရွာကိုပြန်ချင်တယ်။ တိုက်ပွဲဖြစ်မှာလည်း ကြောက်တယ်” ဟု ဆရာမလှဝင်း ပြောသည်။
ယခုအချိန်သည် လယ်ယာစိုက်ပျိုးရေး လုပ်ငန်း၀င်ချိန်ဖြစ်ပြီး ၊ ရွေးကောက်ပွဲလည်း နီးလာပြီဖြစ်ကြောင်း၊ တဖက်တွင်လည်း ပြည်ထောင်စုငြိမ်းချမ်းရေးညီလာခံ ထပ်မံကျင်းပရန် စီစဉ်နေကြပါသည်။
SSPP/SSAသည် ငြိမ်းချမ်းရေးအတွက် ပြည်နယ်အဆင့် လက်မှတ်ရေးထိုးထားသည့် လက်နက်ကိုင် အဖွဲ့ဖြစ်သည်။
ယနေ့ တိုက်ပွဲဖြစ်ပွားမှုနှင့် ပတ်သက်ပြီး သျှမ်းသံတော်ဆင့် မှ SSPP/SSA နှင့် တပ်မတော်သတင်းမှန်ပြန်ကြားရေး ဌာနကို အကြိမ်ကြိမ်ဆက်သွယ်ခဲ့သော်လည်း မရရှိခဲ့ပေ။
လွန်ခဲ့သည့် ဇွန် ၂၅ရက်မှ ယနေ့ထိတိုင် သျှမ်းပြည် မြောက်ပိုင်း ကျောက်မဲမြို့နယ် အတွင်း သျှမ်းပြည် ပြန်လည် ထူထောင်ရေး ကောင်စီ၊ သျှမ်းပြည်တပ်မတော်(RCSS/SSA)နှင့် အစိုးရ တပ်မတော်တို့ စစ်ရေး တင်းမာနေကြဆဲ ဟုသိရသည်။
Leave a Comments