သျှမ်းပြည် မြောက်ပိုင်း သီပေါမြို့နယ် အတွင်း ယနေ့ ဇူလိုင် ၂၂ ရက် ညနေ ၄ နာရီ ခွဲခန့်က ပစ်ခတ်တိုက်ခိုက်မှုများကြောင့် ဒေသခံများ နေရပ်မှ ထွက်ပြေး တိမ်းရှောင်နေကြကြောင်း စုံစမ်းသိရသည်။

ယနေ့ ညနေပိုင်းက သီပေါမြို့နယ် နားအုံရွာ နှင့် ပန်မုံရွာကြား သျှမ်းပြည် တိုးတက်ရေးပါတီ၊ သျှမ်းပြည်တပ်မတော်(SSPP/SSA)နှင့် အစိုးရ တပ်မတော်တို့ တိုက်ပွဲဖြစ်ပွားမှုကြောင့် ဒေသခံများ ဆောင်ကြဲကျေးရွာ ဘုန်းကြီးကျောင်းသို့ ထွက်ပြေးခိုလှုံနေရကြောင်း စစ်ရှောင်ရွာသူတယောက်ဖြစ်သည့် နန်းလှဝင်း က သျှမ်းသံတော်ဆင့်ကို ပြောသည်။

“ ညနေ ၄နာရီခွဲကျော်က ဖြစ်တာ။ ကျမတို့ လယ်ထဲမှာရှိနေတုန်း။ အခု လယ်စိုက်တဲ့ ဝတ်စုံနဲ့ ထွက်ပြေးလာရတယ်။ ဘာမှ မပါလာဘူး” ဟု နန်းလှဝင်း က ဆိုသည်။

တိုက်ပွဲဖြစ်ပွားချိန်တွင် နားအုံကျေးရွာ ဒေသခံများ ကောက်စိုက်နေ ကြောင်း ၊ သေနတ်သံ ကြားသည်နှင့် ပျိုးပင်ချကာ ထွက်ပြေးလာကြသဖြင့် အရေးကြီးပစ္စည်းများပါ ဝင်မယူနိုင်ကြောင်းလည်း နန်းလှဝင်း က ပြောသည်။

“ ရွာထဲကလူတွေ တချို့ က မရောက်သေးဘူး။ ထော်လဂျီတွေနဲ့ လာနေကြတယ်။ တိုက်ပွဲက ငြိမ်ပေမယ့် ကျမတို့မနေရဲဘူး” ဟု နန်းလှဝင်း က ထပ်လောင်းပြောသည်။

လူလတ်လူငယ် ကျေးလက်ရွာသားများ အားလုံးနီးပါး ဘုန်းကြီးကျောင်းသို့ ထွက်ပြေး တိမ်းရှောင်လာခဲ့သော်လည်း ရွာတွင်သက်ကြီးရွယ်အို တချို့ ကျန်ခဲ့သဖြင့် ၎င်းတို့အတွက်လည်း စိုးရိမ်နေရကြောင်း ဆောင်ကြဲ ဘုန်းကြီးကျောင်းရောက် စစ်ရှောင်များကပြောသည်။

လက်ရှိသတင်းရေးသားနေချိန် ည ၈ နာရီကျော်အထိ ဒေသခံများ ဘုန်းကြီးကျောင်း သို့ တဖွဲဖွဲ ရောက်ရှိလာနေကြဆဲဖြစ်ကြောင်းလည်း သိရသည်။

ထိုနေရာသည် SSPP/SSA တို့အစဉ်လှုပ်ရှားသွားလာသည့်နေရာဖြစ်ရာ ယခင်က ပစ်ခတ်မှုများမရှိခဲ့ဖူးသော်လည်း ယခု ရက်ပိုင်းမှ တိုက်ပွဲပြန်ဖြစ်ပွား လာသည့်အပေါ် စဉ်းစားစရာဖြစ်ကြောင်းလည်း နန်းလှဝင်း ပြောသည်။

သီပေါမြိုဒေသခံ စိုင်းလောဝ်မိန်း က “ ကျနော့်အမျိုးသမီးနဲ့ကျနော့် ယောက္ခမတွေလည်း အခု ထွက်ပြေးနေရတယ်။ ဆောင်ကြဲ ဘုန်းကြီးကျောင်းကို တိမ်းရှောင်နေကြတယ်” ဟု သျှမ်းသံတော်ဆင့်ကို ပြောသည်။

ယနေ့ တိုက်ပွဲဖြစ်ပွားသည့်နေရာသည် တိုက်ပွဲဖြစ်လေ့ဖြစ်ထနေရာမဟုတ်ကြောင်း၊ ကားလမ်းမ နှင့် ၃မိုင်သာ ဝေးကွာသည့် အတွက် စဉ်းစားစရာဖြစ်နေကြောင်း လည်း စိုင်းလောဝ်မိန်း ကပြောသည်။

ယခုအချိန်သည် လယ်ယာစိုက်ပျိုးရေး လုပ်ငန်းခွင်ဝင်ချိန်ဖြစ်ပြီး၊ ရွေးကောက်ပွဲလည်း နီးလာပြီးဖြစ်ကြောင်း၊ တဖက်တွင်လည်း တနိုင်ငံလုံး အပစ်ခတ်ရပ်စဲရေး သဘောတူညီစာချုပ် (NCA)ဆွေးနွေးနေချိန်ဖြစ်နေကြောင်း သိရသည်။

SSPP/SSAသည် ငြိမ်းချမ်းရေးအတွက် ပြည်နယ်အဆင့် လက်မှတ်ရေးထိုးထားသည့် လက်နက်ကိုင် အဖွဲ့ဖြစ်သည်။

ယနေ့ တိုက်ပွဲဖြစ်ပွားမှုနှင့် ပတ်သက်ပြီး သျှမ်းသံတော်ဆင့် မှ SSPP/SSA နှင့် တပ်မတော်သတင်းမှန်ပြန်ကြားရေး ဌာနကို ဆက်သွယ်ခဲ့သော်လည်း အဆက်သွယ်မရရှိခဲ့ပေ။

လွန်ခဲ့သည့် ဇွန် ၂၅ ရက်မှ ယနေ့ထိတိုင် သျှမ်းပြည် မြောက်ပိုင်း ကျောက်မဲမြို့နယ် အတွင်း သျှမ်းပြည် ပြန်လည် ထူထောင်ရေး ကောင်စီ၊ သျှမ်းပြည်တပ်မတော်(RCSS/SSA)နှင့် အစိုးရ တပ်မတော်တို့ စစ်ရေး တင်းမာနေကြဆဲ ဟုသိရသည်။