ကိုဗစ်-၁၉ ကြောင့် ကိုယ်ပိုင်ကျောင်း၊ဘော်ဒါဆောင်များ ဖွင့်ခွင့်မပြုသေးသည့်တွက် ကလေးများ သက်ဆိုင်ရာ ဒေသရှိ အခြေခံကျာင်းသို့ ပြောင်းနိုင်ကြောင်း သျှမ်းပြည် ပညာရေး ဌာန က ပြောဆိုလိုက်သည်။

ကိုဗစ် – ၁၉ ကြောင့် ဘော်ဒါဆောင်ထားရှိမည့် ကိုယ်ပိုင်အထက်တန်းကျောင်းများ ဘော်ဒါဆောင်များ နှင့် ပတ်သက်ပြီး ပြန်လည်ဖွင့်လှစ်ခွင့် မပြုကြောင်း ကိုဗစ် ကာကွယ် ထိန်းချုပ် ကုသရေး ဗဟိုကော်မတီ က ဇူလိုင် (၁၄) ရက် ထုတ်ပြန်ခဲ့သည်။

ထို့ကြောင့် အထက်ပါ ကျန်းမာရေး ဝန်ကြီးနှင့်အညီ လက်ရှိမှာ သျှမ်းတောင် တွင် ကိုယ်ပိုင်ကျောင်း ၆ ကျောင်း ဖွင့်လှစ်ခွင့် ရထားပြီး မိဘများ ကိုယ်ပိုင်ကျောင်း မထားချင် ပါက ကျောင်းပြောင်းလက်မှတ်ယူပြီး သက်ဆိုင်ရာ မြို့နယ်တွင် အခြေခံကျောင်းများ ပြန်တက်လို့ ရကြောင်း သျှမ်းပြည် ပညာရေး ညွှန်ကြားရေးမှူး ဦးဝင်းမောင် ကပြောသည်။

ကိုယ်ပိုင်ကျောင်းမှာ မိဘတွေ မထားချင်ဘူးဆိုရင် ကိုယ်ပိုင်ကျောင်းက ကျောင်းပြောင်းလက်မှတ်ယူပြီးတော့ ကိုယ့်ဒေသမှာ ကျောင်းပြန်တက်မယ်ဆိုလို့ရှိရင် ကျနော်တို့က လက်ခံဖို့ ညွှန်ကြားထားပါတယ်ခင်ဗျာ” ဟု ဦးဝင်းမောင် ကပြောသည်။

ယခုအချိန်ထိ ကိုယ်ပိုင်ကျောင်းများ ဘော်ဒါဆောင်များ တရားဝင် ညွှန်ကြားချက် အရ ဘော်ဒါဆောင် ဖွင့်ခွင့်မပေးသည့်အပေါ် ကိုယ်ပိုင်ကျောင်းမှ ကျောင်းပြောင်း လက်မှတ်ရယူပြီး သက်ဆိုင်ရာ ဒေသရှိ အခြေခံ ပညာကျောင်းမှာ ပြောင်းတက်ရန် ဆောင်ရွက်ပေးလျက်ရှိကြောင်းလည်း ဦးဝင်းမောင် က သျှမ်းသံတော်ဆင့် ကိုပြောသည်။

ကိုဗစ် -၁၉ ကြောင့် သျှမ်းတောင်တွင် ပုဂ္ဂလိက ကိုယ်ပိုင်အထက်တန်းကျောင်း ဘော်ဒါဆောင်များ ပြန်လည် ဖွင့်လှစ်ခွင့် (၆) ကျောင်းသာ ရရှိထားကြောင်း သျှမ်းပြည် ပညာရေးဌာန က သိရသည်။

“ကိုယ်ပိုင်ကျောင်းကို မနေ့ကထိ ၆ ကျောင်းဖွင့်ဖို့ စိစစ်ထားတယ်။ ကျန်းမာရေး နဲ့ အားကစား ဝန်ကြီးဌာန ခွင့်ပြုထားသော စိစစ်ရထားသော ကျောင်း ၆ ကျောင်းရထားပါတယ်။” ဟု သျှမ်းပြည်နယ် ပညာရေး ညွန်ကြားရေးမှူး ဦးဝင်းမောင် က သျှမ်းသံတော်ဆင့် ကိုပြောသည်။

ဇူလိုင် ၂၁ ရက်တွင် အခြေခံ ပညာ အထက်တန်းကျောင်းနှင့် ထခွဲကျောင်း အပါအဝင် (၁၈၄) ကျောင်း ဖွင့်လှစ်ထားပြီ ဖြစ်ကြောင်း ဦးဝင်းမောင် ကပြောသည်။

“သတ်မှတ်ထားတဲ့ ရာခိုင်နှုန်း အပြည့်လာတက်ပါတယ်။ ကျောင်းသားတွေ အားလုံးလာတက်နေပါတယ်” ဦးဝင်းမောင် ကပြောသည်။

လက်ရှိ မြန်မာနိုင်ငံတွင် တစ်နေ့ထက် တစ်နေ့ ကိုဗစ်-၁၉ ကူးစက်ရောဂါ ပိုမိုများပြားလာသည့်အတွက် ကျောင်းသား မိဘများသည် မိမိကလေးများကို ကျောင်းလွှတ်ရင် စိုးရိမ်နေကြသေးသည်။

တချို့ ကျောင်းသားမိဘများသည် ကိုဗစ်-၁၉ ကပ်ရောဂါ ပြီးမှသာလျှင် ကျောင်းသို့ တက်ခွင့်ပြုမည်ဟုလည်း ပြောဆိုနေကြသည်။

“ ကျောင်းက မနေ့က စဖွင့်တာ။ စာသင်ခန်းမှာတော့ အရင်ကထက် လူတဝက်လောက်ပဲသင်တယ်။ နောက် တချိန်လုံး မျက်နှာဖုံးတွေ၊ အကာတွေနဲ့ နေရတော့ အဆင်မပြေဘူး။ အသက်ရှူကျပ်တယ်” ဟု လားရှိုးမြို့တွင် နဝမတန်းကျောင်းတက်နေသည့် စိုင်းအာကာ က ပြောသည်။

ကျောင်းဝင်းထဲသို့ ဝင်သည့်အခါ ကျောင်းတံခါးတွင် ဆရာမများက ကိုယ်အပူချိန် တိုင်းကာ စာသင်ခန်းထဲတွင် မျက်နှာဖုံး၊နှာခေါင်းစည်းများဖြင့် တနေကုန် တပ်ကာ စာသင်ကြားရသဖြင့် အဆင်မပြေကြောင်း လည်း စိုင်းအာကာ က ဆိုသည်။

ဇူလိုင် (၂၁) ရက်နေ့တွင် မြန်မာတဝှမ်းရှိ အခြေခံ ပညာအထက်တန်းကျောင်းများ ဖွင့်ခဲ့သော်လည်း အခြေခံ ပညာအလယ်တန်း နှင့် မူလတန်းသည် ယနေ့ချိန်ထိ မဖွင့်လှစ်နိုင်သေးပေ။

ယခုနှစ် ကျောင်းဖွင့်ချိန်သည် ကိုဗစ် -၁၉ ကြောင့် အခြေခံ ပညာကျောင်းများ သတ်မှတ်သည့် လ ထက် နောက်ကျပြီး ကျောင်းဖွင့်ခဲ့ရပြီး ယခုချိန်ထိ အထက်တန်းအဆင့်ကိုသာ ကျောင်းအပ်လက်ခံပြီး၊ ကျောင်းဖွင့်ပေးနိုင်ခဲ့ကြောင်းသိရသည်။