သျှမ်းပြည်တောင်ပိုင်း လွိုင်လင်မြို့နယ်ရှိ ဟိုခိုက်ရွာတွင် နေထိုင်သူများ စားနပ်ရိက္ခာအတွက် ခက်ခဲနေကြောင်း သတင်းရရှိသည်။
ထို့ကြောင့် ဇူလိုင် ၂၀ ရက်က အဆိုပါ ဟိုခိုက်ရွာသားများအတွက် သျှမ်းပြည် စားနပ်ရိက္ခာ ထောက်ပံ့ရေး ကော်မတီမှ သွားရောက်လှူဒါန်းပြုပေးခဲ့ကြောင်း သိရသည်။
(လွိုင်လင်မြို့နယ်အတွင်း လွိုင်လင်နှင့် ပင်လုံကြားရှိ ဟိုခိုက်ရွာသည် အနာကြီးရောဂါ ဖြစ်ပွါးနေသူနှင့် ၄င်းတို့မိသားစုများ နေထိုင်သည့်ရွာဖြစ်ပါသည်။)
“အနာကြီးကျေးရွာမှာ စားနပ်ရိက္ခာ အခက်အခဲ ဖြစ်နေတယ်ဆိုတာ ကြားသိရတယ်။ ဒါကြောင့်မလို့ စားနပ်ရိက္ခာ အခက်အခဲဖြစ်နေတဲ့ဟာကို ကျနော်တို့ ကူညီထောက်ပံ့မယ်ဆိုတဲ့ ရည်ရွယ်ချက်နဲ့ သွားလှူရခြင်းဖြစ်တယ်။” ဟု စားနပ်ရိက္ခာထောက်ပံ့ရေး ကော်မတီ ဒုဥက္ကဌ ကိုတူးငယ် ကပြောသည်။
လွိုင်လင်မြို့နယ် ဟိုခိုက်ကျေးရွာအပြင် လွိုင်လင်မြို့ရှိ မသန်စွမ်း နှင့် သက်ကြီးရွယ်အို စခန်းများကိုလည်း စားနပ်ရိက္ခာများ လှူဒါန်းခဲ့ကြောင်း သိရသည်။
“ကျနော်တို့ စားနပ်ရိက္ခာ ကိုတာ (ခွဲတန်းစနစ်) နဲ့ ဟိုခိုက်ကျေးရွာမှာ လူဦးရေ ၃၀၀ ကိုလှူဒါန်းခဲ့ပြီး လွိုင်လင် မသန်စွမ်း မှာ လူဦးရေ ၈၀ လှူဒါန်းနိုင်ခဲ့ပါတယ်။” ဟု ကိုတူးငယ် ကပြောသည်။
သွားရောက်လှူဒါန်းသည့် အဆိုပါ ခရီးစဉ်တွင် သျှမ်းပြည်နယ် အစိုးရအဖွဲ့ဝင် လျှပ်စစ် နှင့် စွမ်းအင်ဝန်ကြီး ဦးစိုင်းရှန်တစ်လုံ၊ သျှမ်းပြည်နယ် ပြည်သူလူထု စားနပ်ရိက္ခာထောက်ပံ့ရေးကော်မတီအဖွဲ့များ ၊ သျှမ်းတောင် ပရဟိတ ညီနောင်များ ကွန်ရက် နှင့် ကမ္ဘောဇဘဏ် တို့ပါ၀င်ကြောင်းသိရသည်။
သျှမ်းပြည်နယ် ပြည်သူလူထု စားနပ်ရိက္ခာထောက်ပံ့ရေး ကော်မတီသည် ကမ္ဘောဇဘဏ် နာယဂ ဥက္ကဌကြီး ဦးအောင်ကိုဝင်းမှ ဦးဆောင်ပြီး ကိုဗစ်-၁၉ အတွင်း စားနပ်ရိက္ခာ ခက်ခဲသည့် ဒေသများကို သွားရောက်လှူဒါန်းခဲ့ကြောင်း သိရသည်။
Leave a Comments