ကိုဗစ် – ၁၉ ကြောင့် ထိုင်းနိုင်ငံသို့ တင်ပို့ရောင်းချမည့် ကြက်သွန်ဖြူများ အရှုံးပေါ်နေကြောင်း တောင်သူများ ပြောပြချက်အရ သိရသည်။

ကုန်စည် ကူးသန်းရောင်းဝယ်နေသည့် ထိုင်း – မြန်မာ နယ်စပ် ဂိတ်များအားလုံး မတ်လ ကုန်ပိုင်း တွင် ပိတ်လိုက်သည့် အတွက် တင်ပို့ ရောင်းချရန်အတွက် ခက်ခဲကြောင်း မိုင်းပန် တောင်သူ စိုင်းဘ က ပြောသည်။

“မိုင်းပန် ဒေသခံ အားလုံးနီးပါးက ခရမ်းစွဲ ကြက်သွန်ကို စိုက်ပျိုးပြီး ထိုင်းနိုင်ငံကို တင်ပို့ရောင်းချတယ်။ ခုက ဂိတ်တွေ ပိတ်လိုက်တော့ ကြက်သွန်တွေ အရှုံးပေါ်နေတယ်”ဟု စိုင်းဘ ကဆိုသည်။

မိုင်းပန်မြို့နယ်တွင် ဒေသခံ တောင်သူများ အဓိက လုပ်ကိုင်စိုက်ပျိုးသည်မှာ ပြောင်း၊ စပါး နှင့် ကြက်သွန်ဖြူ တို့ဖြစ်ကြသည်။

ယခုချိန်သည် စပါး စိုက်ပျိုးရမည့် ရာသီဖြစ်သည့်အတွက် ကြက်သွန်ဖြူကို အရှုံးခံပြီး ရောင်းရငွေ ကို စပါးခင်းအတွက်အရင်းအနှီးလုပ်ရကြောင်း မိုင်းပန်မြို့နယ် အမှတ်(၁) လွှတ်တော်ကိုယ်စားလှယ် စိုင်းနောင့် ကပြောသည်။

ထို ကိစ္စနှင့် ပတ်သက်ပြီး သျှမ်းပြည်နယ် အစိုးရထံ အကူအညီ တောင်းခံသွားမည်ဖြစ်ပြီး လွှတ်တော်အတွင်း ကြယ်ပွင့်မပြ မေးခွန်း မေးမြန်းခဲ့ကြောင်းသိရသည်။

“ ကြက်သွန်ဖြူ ရာသီဖြစ်ပြီး ပြည်ပကို တင်ပို့ရောင်းချလို့ မရတဲ့အတွက် အစိုးရအနေနဲ့ ထိုင်းအစိုးရ နဲ့ ညှိနှိုင်းပေးစေချင်တယ်။ တရားဝင် တံတား ပြန်ဖွင့်နိုင်အောင်၊ ထပ်တစ်ချက်က ထိုင်းအစိုးရ ကောက်တဲ့ အခွန် လျှော့ပေးအောင်” လွှတ်တော်အမတ် စိုင်းနောင့် ကပြောသည်။

ခရမ်းစွဲ ကြက်သွန်ဖြူ ကို သျှမ်းပြည်တောင်ပိုင်း လဲချား ၊ မိုင်းပန် ၊ မိုးနဲ ၊ သျှမ်းပြည်အရှေ့ပိုင်း ပုံပါကျင်၊ မိုင်းတုံ တို့ဒေသမှာ အများဆုံး စိုက်ပျိုးကြပြီး ထိုင်းနိုင်ငံသို့ တင်ပို့ရောင်းချခြင်း ဖြစ်သည်။

ကြက်သွန်ဖြူ များကို ဒီဇင်ဘာလအထိ တင်ပို့ရောင်းချနိုင်ခြင်း မလုပ်နိုင်လျှင် တောင်သူများ အရှုံးပေါ်ပြီး လွှင့်ပစ်ရမည့် အခြေအနေရှိပြီး ပြီးခဲ့သည့်နှစ်တွင်လည်း ကြက်သွန်ဖြူများ များစွာ အရှုံးပေါ်ခဲ့ကြောင်း သိရသည်။

.