သျှမ်းပြည်မြောက်ပိုင်း နမ့်ခမ်းမြို့နယ် လော့နော်ကျေးရွာတွင် ယမန်နေ့ ဇူလိုင် ၁၄ ရက် ညနေပိုင်းက ဆရားတော် တပါး နှင့်ကျေးရွာသားတဦး မိုင်းနင်းမိ သေဆုံးခဲ့ပြီး ကိုရင် တပါး ထိခိုက်ဒဏ်ရာရရှိခဲ့ကြောင်း စုံစမ်းသိရသည်။
ဇူလိုင် ၁၄ ရက် ညနေ ၅နာရီ ခွဲအချိန်က လော့နော်ကျေးရွာ ရှိ ဘုန်းကြီးကျောင်း မှ ကျောင်းထိုင်ဆရာတော်၊ ကိုရင် တပါးနှင့် အရပ်သားတဦးတို့သည် ဘုန်းကြီးကျောင်းဝန်းရှိ စေတီ အနီးတွင် သန့်ရှင်းရေး ပြုလုပ်နေစဉ် မိုင်းပေါက်ကွဲမှု ဖြစ်ပွားခဲ့ကြောင်း နမ့်ခမ်းမြို့နယ် အမှတ်(၂) ပြည်နယ် လွှတ်တော်ကိုယ်စားလှယ် ဦးအေးမောင် က သျှမ်းသံတော်ဆင့်ကို ပြောသည်။
ထိုပေါက်ကွဲမှုကြောင့် “ ကျောင်းထိုင်ဆရာတော်က အဲ့နေရာမှာပဲ ပွဲချင်းပြီး ပျံလွန်တော်မူသွားတယ်။ ဆရာတော်က တကိုယ်လုံးနီးပါးထိတယ်။ အရပ်သား ကတော့ လက်ပြတ်သွားတယ်။ နောက် အိမ်ရောက်မှ ဆုံးသွားတယ်။ ကိုရင်တပါးကတော့ ဒဏ်ရာ အနည်းငယ်ရသွားတယ်” ဟု ဦးအေးမောင်က ပြောသည်။
မိုင်းပေါက်ကွဲမှုကြောင့် သက်တော် (၃၆)နှစ် ဝါတော် (၁၆) ဝါရှိသည့် လော့နော်ကျေးရွာ မှ ကျောင်းထိုင်ဆရာတော်ပွဲချင်းပြီး ပျံလွန်တော်မူခဲ့ပြီး၊ အသက် ၂၀ အရွယ်ရှိ ကျေးွရာလူငယ်လည်း သေဆုံးခဲ့ရသည်။
နမ့်ခမ်းဒေသခံတဦး လူမှုကွန်ရက်စာမျက်နှာတွင်တင်ထားသောဓါတ်ပုံများအရ အရပ်သားသည် ဝမ်းဗိုက်ပေါက်ကာ လက်တဖက်လည်း ပြတ်သွားသည်ကိုတွေ့ရသည်။
“ မိုင်းတွေက ဘုန်းကြီးကျောင်းပတ်ဝန်းကျင်မှာ ရှိနေတယ်ဆိုတော့ တော်တော်လည်းတော့ စိုးရိမ်ရတဲ့အဆင့်ပါပဲ။ အခုလို ကျောင်းထိုင်ဆရာတော်နဲ့ကိုရင်တွေ အရပ်သားတွေ က မိုင်းနင်းမိနေတော့ စိတ်တော့မကောင်းဘူး” ဟု ဦးအေးမောင် က ဆိုသည်။
ပျံလွန်တော်မူသွားသည့် ကျောင်းထိုင်ဆရာတော် ကို လော့နော်ကျေးရွာ ဘုန်းကြီးကျောင်းတွင် တပတ်ထားပြီးမှ သဂြိုလ်မည်ဖြစ်ပြီး၊ ဒဏ်ရာရသည့် ကိုရင်လေးသည် ဒဏ်ရာမပြင်းထန်သည့် အတွက် ကျေးရွာတွင်သာ ဆေးကုသခံနေကြောင်းသိရသည်။
ထိုကျေးရွာအတွင်း အစိုးရ တပ်မတော် စစ်ကြောင်း မကြာခဏ ဝင်ရောက်သည့်နေရာဖြစ်ပြီး၊ ထို ဘုန်းကြီးကျောင်းတို့ စစ်ကြောင်း မကြာခဏ နားခိုသည့်နေရာလည်း ဖြစ်ကြောင်း ဒေသခံများပြောပြချက် အရသိရသည်။
“ ဘုန်းကြီးကျောင်းနားကို စစ်ကြောင်း တွေ တခါတလေ လာတယ်။ ဘုန်းကြီးကျောင်းထဲတောင် သူတို့ လာနားကြသေးတယ်။ တိုက်ပွဲတော့မရှိဘူး” ဟု နမ့်ခမ်းမြို့နယ် ဒေသခံအမျိုးသားတဦး ကပြောသည်။
လော့နော် ကျေးရွာ ပတ်ဝန်းကျင် အနီးထောင်ထားသည့် မြေမြုပ်မိုင်းမျာကို လည်း သက်ဆိုင်ရာ လက်နက်ကိုင်များအနေဖြင့် လာရောက်ရှင်းလင်းပေးစေလိုကြောင်း ဒေသခံများက ပြောဆိုလိုက်သည်။
လော့နော်ကျေးရွာသည် နမ့်ခမ်းမြို့ နှင့် မိုင် ၃၀ကျော် ဝေးသည့်နေရာဖြစ်ပြီး တိုက်ပွဲ ထိတွေ့မှု မရှိသော်လည်း စစ်ကြောင်းများ မကြာခဏ ဝင်ထွက်နေသည့် ကျေးရွာတခုဖြစ်ကြောင်းသိရသည်။
ထိုနေရာတွင် အစိုးရ တပ်မတော် နှင့် တအာင်း (ပလောင်)လွတ်မြောက်ရေးတပ်မတော် (TNLA)တို့ သွားလာ လှုပ်ရှားသည့်နေရာတခုဖြစ်သည်။
Leave a Comments