လာမည့် ၂၀၂၀ ရွေးကောက်ပွဲအတွက် ရှမ်းတိုင်းရင်းသားများ ဒီမိုကရေစီ အဖွဲ့ချုပ် မှ သျှမ်းပြည် အတွင်းရှိ မြို့နယ် များတွင် လွှတ်တော်ကိုယ်စားလှယ်လောင်းများ ရွေးချယ်မှု ပြုလုပ်ခဲ့ကြောင်း သိရသည်။
Photo Credit to Sai Da MP- မိုင်းပန်မြို့တွင် ရွေးကောက်ပွဲ၀င်ရန်အတွက် SNLD ပါတီမှ လွှတ်တော်ကိုယ်စားလှယ်လောင်းများရွေးချယ်နေစဉ်
လွှတ်တော်ကိုယ်စားလှယ် ရွေးချယ်မှု တွင် သျှမ်းပြည် တောင်ပိုင်း မိုင်းပန်မြိ့ မွေတော်ကျောင်းတိုက်တွင် ဇူလိုင် ၁၂ရက် မွန်းလွှဲ ၁နာရီ မှ ၃နာရီထိ ကျင်းပခဲ့ပြီး၊ SNLD ပါတီ၏ မိုင်းပန်မြို့နယ်ဥက္ကဌ ကိုယ်တိုင်ဝင်ရောက်ယှဉ်ပြိုင်ခဲ့ကြောင်း သိရသည်။
မိုင်းပန် မြို့နယ် ပြည်သူ့လွှတ်တော်တွင်ယှဉ်ပြိုင်ရန်အတွက် မြို့နယ်ဥက္ကဌ စိုင်းကျော်ခိုင်၊ စိုင်းအောင်ထွန်း ၊ စိုင်းမင်းဇော်ဦး တို့ကလည်းကောင်း၊ ပြည်နယ် ၂ နေရာအတွက်တော့ စိုင်းခမ်းဆိုင်ဟိန်း(စိုင်းကြီးကို) ၊ စိုင်းဆိုင်ကျောက်ဆာမ်(စိုင်းတော်) တို့ကလည်းကောင်း ပြည်နယ် ၁ အတွက် စိုင်းကျော်ကျော်လှိုင်၊ ဆရာမ ဒေါ်နန်းသန်းတင် တို့ကလည်းကောင်း အသီးသီးပြိုင်ကြကြောင်း မိုင်းပန်ဒေသခံ စိုင်းခေးက သျှမ်းသံတော်ဆင့်အားပြောသည်။
‘‘ လာမယ့် ၂၀၂၀ ရွေးကောက်ပွဲမှာ ၀င်ရောက်ယှဉ်ပြိုင်ဖို့အတွက် SNLD ကျားခေါင်းပါတီက ပြည်သူ့လွှတ်တော်အမတ်လောင်းက စိုင်းကျော်ခိုင် ၊ ပြည်နယ် ၁ က စိုင်းဆိုင်ကျောက်ဆာမ်နဲ့ ပြည်နယ် ၂ က ဆရာ နန်းသန်းတင်တို့ အသီးသီးအနိုင်ရထားပါတယ်’’ – ဟုပြောသည်။
မိုင်းပန်မြို့တွင် ယခင် ၂၀၁၅ ရွေးကောက်ပွဲက ကျားဖြူပါတီ SNDP မှစိုင်းနောင့်က ပြည်နယ်လွှတ် တော်အမတ် နေရာမှလွဲ၍ ကျန်နေရာများတွင် ကြံ့ခိုင်ရေးပါတီမှ အနိုင်ရရှိခဲ့ပါသည်။
အလားတူ မိုင်းကိုင်၊ လဲချားမြို့နှင့် သျှမ်းပြည်မြောက်ပိုင်း တန့်ယန်း ၊ မူစယ်၊ သီပေါ တို့တွင်လည်း SNLD ၏ လွှတ်တော်အမတ်လောင်းများ ရွေးချယ်ခဲ့ကြကြောင်းသိရသည်။
ရှမ်းတိုင်းရင်းသားများဒီမိုကရေစီအဖွဲ့ချုပ် SNLD သည် ၁၉၈၈ ခုနှစ် အောက်တိုဘာလ ၂၆ ရက်တွင် စတင်တည်ထောင်ခဲ့ပါသည်။ ဥက္ကဌမှာ ခွန်ထွန်းဦးဖြစ်ပါသည်။ ၁၉၉၀ ခုနှစ်ပါတီစုံရွေးကောက်ပွဲတွင် သျှမ်းပြည်တဝှမ်းမဲအများဆုံးဖြင့်အနိုင်ရခဲ့ပြီး မြန်မာနိုင်ငံတဝှမ်းတွင်မူ ဒုတိယမဲအများဆုံးရရှိခဲ့ပါသည်။
၂၀၁၀ ရွေးကောက်ပွဲတွင် SNLD မှ ၀င်ရောက်ယှဉ်ပြိုင်ခြင်းမပြုခဲ့ပေ။
၂၀၁၅ ခုနှစ်ရွေးကောက်ပွဲတွင်မူ လွှတ်တော်အတွင်း ၄၆ နေရာအနိုင်ရခဲ့ပြီး သျှမ်းပြည်တွင်တတိယမဲအများဆုံးရရှိခဲ့သည်။
