သျှမ်းပြည်မြောက်ပိုင်း ကျောက်မဲမြို့နယ် လွိုင်စောင့်ကျေးရွာအုပ်စု အတွင်း ပစ်ခတ်မှုဖြစ်ပွါးရာ ဒေသခံ များ ဘုန်းကြီးကျောင်းသို့တိမ်းရှောင်နေရကြောင်းသိရသည်။
ယနေ့ ဇူလိုင် (၁၄) ရက် မနက် ၁၀ နာရီခွဲခန့်က လွိုင်စောင့်ကျေးရွာအုပ်စု နမ့်မော်ဘီလူးကျေးရွာနှင့် ကုန်းညောင်ရွာကြား ပစ်ခတ်သံများ ထွက်ပေါ်ရာ ရွာသား ၄၀ ကျော် ကုန်းညောင်ဘုန်းကြီးကျောင်းသို့တိမ်းရှောင်နေရကြောင်း ကျောက်မဲဒေသခံ စိုင်းစိုင်း က သျှမ်းသံတော်ဆင့် ကိုပြောသည်။
“တစ်ဖက်အသံပဲ ကြားနေရတယ်။ သူတို့ နမ့်မော်ဘီလူး ကနေပြီး ပစ်တာ။ တစ်ချို့ကလည်း မနေ့ညနေ စစ်တပ် ရွာဘက်က ဖြတ်သွားတာကတည်းက ထွက်ပြေးကြတာ ” ဟု စိုင်းစိုင်း က ပြောသည်။
အစိုးရ တပ်မတော်သည် ယမန်နေ့ ဇူလိုင် ၁၃ ရက် ကတည်းက နမ့်မော်ဘီလူးရွာဘေး ဖြတ်သန်းခဲ့ကြောင်း ၊ တိုက်ပွဲမှာလည်း နမ့်မော်ဘီလူးရွာနှင့် မိုင်ဝက်ခန့်အကွာ တောပိုင်းတွင် ဖြစ်ပွားခဲ့ကြောင်း စိုင်းစိုင်းက ပြောသည်။
၎င်းနှင့်ပတ်သက်ပြီး RCSS/SSA ပြောခွင့်ရ ဗိုလ်မှူး အုမ်ခေးက – “အစိုးရတပ်က ခလရ ၁၀၁ ကလို့ သိရပါတယ်။ အကြောင်းကြားမှုမရှိဘဲ တောပိုင်းဝင်လာတာကြောင့် ကျနော်တို့တပ်နဲ့ထိပ်တိုက်တိုးမိပြီး တိုက်ပွဲဖြစ်တာ။ မိနစ် ၂၀ လောက်ဘဲ ပစ်ခတ်ရပါတယ်။ သေကြေဒဏ်ရာရမှုတော့မသိရသေးပါဘူး” – ဟု သျှမ်းသံတော်ဆင့်ကို ပြောပြသည်။
ယနေ့ ပစ်ခတ်မှုဖြစ်ပွားသည့်နေရာသည် အစိုးရတပ်မတော် နှင့် သျှမ်းပြည်ပြန်လည်ထူထောင်ရေးကောင်စီ/သျှမ်းပြည်တပ်မတော် (RCSS/SSA) လှုပ်ရှားရာ ဒေသဖြစ်ကြောင်း သိရသည်။
လက်ရှိမြန်မာနိုင်ငံတွင် ကိုဗစ် ကူးစက်မှု နေ့စဉ်တိုးများလာနေသည်ဖြစ်ရာ စစ်ဘေးရှောင်ပြီးဘုန်းကြီးကျောင်းတွင် စုဝေးနေထိုင်ရမည့်အပေါ် ဒေသခံများစိုးရိမ်နေကြောင်း၊ တဖက်တွင်လည်း မိုးဦးရာသီ လယ်ယာဆင်းရမည့်အချိန်ဖြစ်သဖြင့် လက်နက်ကိုင်များ တိုက်ပွဲမဖြစ်ပွါးအောင် ရှောင်ရှားပေးစေလိုကြောင်း ကျောက်မဲဒေသခံများက တောင်းဆိုလိုက်သည်။
ကျောက်မဲမြို့နယ် တွင် လွန်ခဲ့သည့်ဇွန်၂၅ရက်မှ ဇွန် ၂၉ ရက် အထိ အစိုးရ တပ်မတော်နှင့် RCSS/ SSA တို့ တိုက်ပွဲ ပြင်းထန် ဖြစ်ပွားပြီး ဒေသခံများ တကြိမ်စစ်ဘေးရှောင်ခဲ့ရပြီးဖြစ်သည်။ ထိုစဉ်က အစိုးရစစ်တပ်က ရွာအတွင်းဝင်ရောက်ကာ ဒေသခံရွာသားအားဖမ်းဆီးရိုက်နှက် ပစ်ခတ်သဖြင့် သေကြေဒဏ်ရာရမှုများရှိခဲ့သည်ဟုဆိုကာ တရားမျှတမှုရရှိစေရေးအတွက် ဇူလိုင်လ ၁၀ ရက်နေ့က ဒေသခံ တသောင်းခန့်က ကျောက်မဲမြို့အတွင်း စီတန်းလှည့်လည်ဆန္ဒထုတ်ဖော်ခဲ့ကြသည်။
RCSS/SSA သည် NCA လက်မှတ်ရေးထိုးထားသည့် တပ်ဖွဲ့တဖွဲ့ဖြစ်ရာ တိုက်ပွဲများမဖြစ်လိုကြောင်း၊ ထို့အတွက် မည်သည့်လက်နက်ကိုင်မဆို တောပိုင်းဝင်လာပါက ဆက်သွယ်အကြောင်းကြားစေလိုကြောင်း ၊သို့မှသာ တိုက်ပွဲများမဖြစ်အောင်ရှောင်ရှားနိုင်မည်ဖြစ်ကြောင်းလည်း RCSS ပြောခွင့်ရက ပြောဆိုလိုက်ပါသည်။
