သျှမ်းပြည်တောင်ပိုင်း တောင်ကြီးမြို့နယ် ရွှေညောင်မြို့တွင်းရှိ အောင်သပြေ တိုးဂိတ်ကို မြို့ပြင်ပြောင်းရွှေ့ပေးရန် ဒေသခံများ တောင်းဆိုလိုက်သည်။

အောင်သပြေတိုးဂိတ်သည် ရွှေညောင်မြို့ ထဲတွင် တည်ရှိသဖြင့် ဒေသခံများနေ့စဉ် ဖြတ်သန်း သွားလာသည့်အခါ ကုမ္ပဏီမှ ငွေကောက်ခံမှုရှိနေကြောင်း၊ ထိုငွေကောက်မှုကြောင့် မကြာခဏ အငြင်းပွားမှုဖြစ်ပွားခဲ့ကြောင်း သိရသည်။

ထို့ကြောင့် ယနေ့ (ဇူလိုင် ၁၀)ရက် မနက်ပိုင်းတွင် အောင်သပြေ တိုးဂိတ် မြို့ပြင်ပြောင်းရွှေ့ရေး နှင့် အောင်သပြေ တိုးဂိတ်ဖြတ်သန်းခကို ဒေသခံများထံ ကောက်ခံယူမှုကို ကန့်ကွက်ကြောင်း ပြုလုပ်ကြသည်။

ရွှေညောင် ဒေသခံများ အောင်သပြေ တိုးဂိတ် တည်ဆောက်ရေး အတွက် ကန့်ကွက်သည့် ကြားမှ ၂၀၁၂ ခုနစ်တွင် စတင်တည်ဆောက်ခဲ့ပြီး ၂၀၁၃ခုနစ် ဧပြီ (၄)ရက်တါင် ရွှေညောင်ဒေသခံများ တိုးဂိတ်တွင် ဖြတ်သန်းခ မပေးဘဲ လွတ်လပ်စွာ သွားလာပိုင်ခွင့်ရှိသည် ဟု ကုမ္ပဏီ က ပြောဆိုခဲ့ကြောင်း ရွှေညောင် ဒေသခံ ဦးကျော်အေး က သျှမ်းသံတော်ဆင့် ကို ပြောသည်။

ဦးကျော်အေး “ဒီတိုးဂိတ်မှာ ကျနော်တို့မှာ ပိုက်ဆံပေးစရာမလို ကျနော်တို့ လွတ်လပ်စွာ သွားလာပိုင်ခွင့်ရှိတယ်။ ကျနော်တို့က နှစ် (၄၀) အတွင်း တိုးဂိတ်အခွန်ဆောင်ဖို့ မလိုဘူး။ ဒါပေမယ့် ၇ နှစ် အတောအတွင်းမှာပဲ ပိုက်ဆံ ပြန်ကောက်တယ်” ဟု ပြောသည်။

အဆိုပါ အောင်သပြေ တိုးဂိတ်ကို တောင်ကြီးမြို့နယ် နှင့် ကလောမြို့နယ် အဆက်ဖြစ်သည့် တောင်လေးလုံးတွင် ပြောင်းရွှေ့ပေးရန် ဒေသခံများက ဆန္ဒရှိနေပြီး နှစ်ဦးနှစ်ဖက် ခေါ်ယူညှိနှိုင်းကာ ဥပဒေ နှင့် အညီ ဆောင်ရွက်ပေးစေလိုကြောင်း ရွှေညောင်ဒေသခံများက တောင်းဆိုကြသည်။

“ကျနော်တို့ မှာ အိမ် နဲ့ ဈေး နဲ့ တစ်မိုင် တောင်မရှိဘူး ပိုက်ဆံပေးနေရတယ်။ ဒီ ဂိတ်ကို ပိုက်ဆံ မပေးချင်တာမဟုတ်ဘူး။ ပေးမယ် ဒါပေမယ့် မြို့ပြင်ကို ထွက်သွားပေးပါ။” အောင်သပြေ ဒေသခံ ကိုလူအေး က ပြောသည်။

ထို အောင်သပြေ တိုးဂိတ်ပြောင်းရွှေ့ရေး ကိစ္စနှင့်ပတ်သက်ပြီး နိုင်ငံတော် သမ္မတ ထိ စာတင်ပြီးကြောင်း၊ သျှမ်းပြည် အစိုးရ အဖွဲ့ လမ်းပန်း ဆက်သွယ်ရေး ဝန်ကြီး ဦးခွန်ရဲထွေးကိုလည် ပြောထားပြီးကြောင်း ရွှေညောင် ဒေသခံ ကို စည်သူ က ပြောသည်။

အဆိုပါ ငွေကောက်ခံမှု အပေါ် ကန့်ကွက်ကြသည့် ဒေသခံများသည် ဆန္ဒပြရန်အတွက် တောင်းဆိုသော်လည်း သျှမ်းပြည်နယ် ရဲမှူးချုပ်မှ ကိုဗစ် ကာလဖြစ်သည့်အတွက် လူစုလူဝေး မပြုလုပ်သင့်ကြောင်း ပြောဆိုခဲ့ခြင်းကြောင့် ဆန္ဒမထုတ်ဖော်ခဲ့ကြောင်း သိရသည်။

“ကိုဗစ် ကာလဖြစ်တဲ့အတွက် ဆန္ဒမပြပါနဲ့ လို့ ရဲမှူးကနေ ကျနော်တို့ကိုပြောတယ်။ ဒီ ဂိတ်ကို ပိုက်ဆံ မပေးချင်တာမဟုတ်ဘူး။ ပေးမယ် ဒါပေမယ့် မြို့ပြင်ကို ထွက်သွားပေးပါ။” ဟု ဦးကျော်အေး ကပြောသည်။

ထို့ပြင် အောင်သပြေ တိုးဂိတ် ကုမ္ပဏီ ဘက်နှင့် ရွှေညောင် ဒေသခံများကြား သဘောတူညီခဲ့သည့် အချက်ထဲတွင် ရွှေညောင် ဒေသခံများဖြစ်ပါက တိုးဂိတ်ကို အခမဲ့ ဖြတ်သန်းခွင့်ြ့ပုသည့်ကဒ် လုပ်ပေးမည်ဟုဆိုသော်လည်း ယနေ့အချိန်ထိ မရရှိသေးကြောင်း ဒေသခံ ဦးကျော်အေး က ပြောသည်။

အောင်သပြေ တိုးဂိတ် ကုမ္ပဏီ နှင့် ရွှေညောင် ဒေသခံများကြား ဖြစ်ပွားနေသည့် ပြဿနာကို သက်ဆိုင်ရာ သျှမ်းပြည် ဝန်ကြီးချုပ် အနေဖြင့် ဖြေရှင်းရန် စောင့်ဆိုင်းခဲ့သော်လည်း လာရောက်မဖြေရှင်းပေးကြောင်းသိရသည်။

အောင်သပြေ ကုမ္ပဏီ မှ ဒေသခံများ ငွေကောက်ခံမှု၊ အငြင်းပွားမှု နှင့် ပတ်သက်ပြီး သျှမ်းသံတော်ဆင့်အနေဖြင့် ကုမ္ပဏီ ကိုမေးမြန်းရာ တစုံတရာမှ ပြန်လည် ဖြေကြားပေးခြင်းမရှိပေ။