သျှမ်းပြည်တောင်ပိုင်း တောင်ကြီးမြို့နယ် ရွှေညောင်မြို့ရှိ အိမ်ဝိုင်းတစ်အိမ်တွင် ဂျင်ဝိုင်းများ ပြုလုပ်နေကြောင်း စုံစမ်းသိရှိရသည်။
အဆိုပါ ဂျင်ဝိုင်းမှာ ရွှေညောင်မြို့ မင်္ဂလာအောင်မြေ (၁) ရပ်ကွက်မှာရှိပြီး အိမ်ဝိုင်းပိုင်ရှင်ကို တစ်ရက် တစ်သောင်းခွဲ ပေးရပြီး အိမ်ဝိုင်းတွင်း လောင်းကစားဝိုင်း (၂) ဝိုင်းရှိထားကြောင်း သိရသည်။
“အိမ်ဝိုင်းပိုင်ရှင်ကိုတစ်ရက်တစ်သောင်းခွဲပေးရတယ်လို့ကြားတယ်။ ရပ်ကွက်အကြီးအကဲကို တစ်ရက် တစ်သိန်းခွဲပေးတယ်။ နေ့ကောညပါ အခုလဲရှိတယ်။ မိန်းမဝိုင်း ယောကျာ်းဝိုင်းနှစ်ဝိုင်းပါဗျ” ဟု ရွှေညောင်ဒေသခံ အမည်မဖော်လိုသူ တစ်ဦးက သျှမ်းသံတော်ဆင့် ကိုပြောသည်။
ထို လောင်းကစားဝိုင်းမှာ (၂၄) နာရီရှိပြီး ညနေ (၅) နာရီနောက်ပိုင်းတွင် လာရောက်ကစားသူ ပိုမိုစည်ကားနေလျက်ရှိကြောင်း ၎င်းက ပြောသည်။
“ ၂၄ နာရီလုံးဆော့တယ်ဗျ။ ညနေ ၅ နာရီနောက် လူပိုစည်တယ်။ တညလုံးဖဲဝိုင်းလည်းရှိပါတယ်။ တအိမ်ထဲပါ ဒါမယ့် လူတအားစည်တယ်။ တရက်ကိုသိန်းပေါင်းရာကျော် အလျော်အစားရှိတယ်လို့ ကြားတယ်။ စတာ ၅ရက်လောက်ပဲရှိပါသေးတယ်” ဟု ရွှေညောင်မြို့ဒေသခံ တစ်ဦးကပြောသည်။
အလားတူ တောင်ကြီးမြို့နယ်၊ ဘုရားနီ ကျေးရွာမှာလည်း လေးကောင်ဂျင် လောင်းကစားဝိုင်း ပြုလုပ်နေရာမှာ ယနေ့ထိ (၂) လကျော်ကြာမြင့်ပြီဖြစ်ကြောင်း စုံစမ်းသိရှိရသည်။
စစ်တပ်က အာဏာသိမ်းပြီးနောက်ပိုင်း သျှမ်းပြည်တွင်းရှိ မြို့နယ်တိုင်းနီးပါး လောင်းကစားဝိုင်းများ ယခင်ထက် ပိုမို များပြားစွာ ရှိလာကြောင်း သိရသည်။
စစ်ကောင်စီလက်ထပ်တွင် ပွဲလမ်းသဘင်များ၊ ရှင်ပြုပွဲများမှာ လောင်းကစားဝိုင်းများ ဖွင့်လှစ်ခွင့်ပြုခြင်း၊ ရဲစခန်းဝိုင်းထိ လောင်းကစားများ ပြုလုပ်ခြင်းများ ခွင့်ပြုလာကြသည်။
