သျှမ်းပြည် အရှေ့ပိုင်း မိုင်းဆတ်မြို့ နယ် အတွင်း ငွေကျပ်သိန်း ၈ထောင်ကျော် တန်ဖိုးရှိမူးယစ်ဆေး နှင့် မူးယစ်ဆေး ထုတ်လုပ်ရာတွင် အသုံးပြု သည့် ပစ္စည်းများကို ပိုင်ရှင်မဲ့ သိမ်းဆည်းရမိကြောင်း စုံစမ်းသိရသည်။

အဆိုပါ မူးယစ်းဆေးနှင့် ဆက်စပ်သည့် ပစ္စည်းများသည် မိုင်းဆတ်မြို့နယ် မိုင်းတွမ်းတောင်ပေါ် ကျေးရွာအုပ်စု၊ ပလောင်ပူတွန်းကျေးရွာ အနောက်ဘက် လျှိုအအတွင်း ၀ှက်ထားခြင်းဖြစ်ပြီး ဇူလိုင် ၇ ရက်နှင့် ဇူလိုင် ၈ ရက်တွင် အာဏာပိုင်များ နယ်မြေ ရှင်းလင်းရေး ပြုလုပ်ရာမှ တွေ့ရခြင်းဖြစ်ကြောင်း၊ ၄င်းစုစုပေါင်းတန်ဖိုးမှာ ငွေကျပ် သိန်းပေါင်း ၈၁၇၂ ကျော် ခန့်ရှိမည်ဖြစ်ကြောင်း သိရသည်။

သျှမ်းပြည် အရှေ့ပိုင်း တာချီလိတ်မြို့နယ်၊ မိုင်းဆတ်မြို့နယ် အတွင်း မူးယစ်ဆေးဝါး ရောင်းဝယ်မှု၊ မူးယစ်ဆေးဝါး ထုတ်လုပ်မှု များ တနှစ်ထက် တနှစ်ပိုများလာကြောင်း သျှမ်းရှေ့ဒေသခံများပြောပြချက် အရသိရသည်။

သျှမ်းပြည်အရှေ့ ပိုင်းတွင် မူးယစ်ဆေးဝါး ဆက်စပ်ပြုလုပ်သူ အများစု သည် ပြည်သူ့စစ်များဖြစ်ကြောင်းလည်း အမည်မဖော်လိုသည့် မိုင်းဖြတ်ဒေသခံ တဦး ကပြောသည်။

“ မူးယစ်ဆေး ထုတ်လုပ်တဲ့စက်ရုံတွေ၊ နောက်မူးယစ်ဆေး ဖမ်းဆီးရမိများရင် ပိုင်ရှင်မဲ့ပါပဲ။ ဒီဘက်မှာ က ဘယ်သူ ဘာလုပ်နေလဲဆိုတာ သိကြပါတယ်။ တနှစ်တနှစ်ကတော့ မူးယစ်ဆေးပိုများလာတယ်” ဟု တာချီလိတ်ဒေသခံ စိုင်းတစ် က ပြောသည်။

သိမ်းဆည်းရမိသည့် ပိုင်ရှင်မဲ့ မူးယစ်ဆေးများမှာ WY စာတမ်းပါ စိတ်ကြွဆေးပြား၊ စိတ်ကြွဆေးမှုန့်၊ ကဖင်းဟု ယူဆရသည်အဖြူရောင်အမှုန့်၊ မျောက်တံဆိပ်ဆေးရည်၊ GX -200 Honda အနီရောင် လက်ဆွဲမီးစက် တလုံး၊ Gx-180 လက်ဆွဲမီးစက် ၈လုံး နှင့် ဂတ်စ်အိုးဟောင်း ၂လုံးတို့ဖြစ်ကြောင်း မူးယစ်ရဲ ထုတ်ပြန်ချက် အရ သိရသည်။

အဆိုပါ သိမ်းဆည်းရမိသည့် မူးယစ်ဆေးဝါး နှင့် မူးယစ်ဆေးထုတ်လုပ်ရာတွင် အသုံးပြုသည့် ဆက်စပ်ပစ္စည်းများကို မူးယစ်တပ်ဖွဲ့ စု (၂၉ ) သို့ လွှဲပြောင်းပေးအပ်ခဲ့ပြီး မိုင်းတွမ်းနယ်မြေ ရဲစခန်းတွင် မယ(ပ) ၃၇/၂၀၂၀ ၊ မူး/စိတ် ပုဒ်မ-၁၆ (ခ)/ ၁၉ (က) နှင့် မယ(ပ)၃၈/၂၀၂၀၊ မူး/ စိတ် ပုဒ်မ- ၁၆ (ခ) တို့ဖြင့် အမှုဖွင့် ဆောင်ရွက်ထားပြီး တရားခံ ဖမ်းဆီးရမိရေး စုံစမ်းနေကြောင်း သိရသည်။

ယခုနှစ် အတွင်း သျှမ်းပြည် မြောက်ပိုင်းကွတ်ခိုင်မြို့နယ် တွင် ကျပ်သိန်း ဘီလီယံ ၄၁၄ ကျော်တန်ဖိုးရှိ မူးယစ်ဆေးဝါး နှင့် မူးယစ်ဆေးဝါး ထုတ်လုပ်ရာတွင် အသုံးပြုသည့် ပစ္စည်းများကို သိမ်းဆည်းရမိသော်လည်း ယနေ့တိုင် တရားခံ မမိပေ။

ဇူလိုင်လ ၇ ရက်နေ့ကလည်း ကွတ်ခိုင်မြို့နယ်၊ ကွတ်ခိုင်-တာမိုးညဲသွား ကားလမ်းတွင်ပင် ငွေကျပ်သိန်း ၄၀၀၀ ကျော် တန်ဖိုးရှိ စိတ်ကြွရူးသွပ်ဆေးပြားများ တင်ဆောင်လာသည့် ကားတစီးကိုမူးယစ်အာဏာပိုင်များကဖမ်းဆီးရမိခဲ့သေးသည် ။