သျှမ်းပြည်တောင်ပိုင်းမှ စောင့်ကြည့်လူနာများ၏ ဓါတ်ခွဲနမူနာ (၁၄၀) ကျော် ကို ရန်ကုန်အမျိုးသားကျန်းမာရေး ဓါတ်ခွဲဌာန သို့ ပို့ဆောင် စစ်ဆေးထားကြောင်း စုံစမ်းသိရှိရသည်။
ယနေ့ ဇူလိုင် (၉) ရက်တွင် မြဝတီမှ တဆင့် သျှမ်းပြည်သို့ ပြန်လည်ဝင်ရောက်လာသူများ နှင့် သျှမ်းပြည်တောင်ပိုင်းရှိ Quarantine Center မှ စောင့်ကြည့် လူနာ စုစုပေါင်း (၁၄၂) ဦးရှိကြောင်း ပြည်နယ် အထူးရောဂါ နှိမ်နင်းရေး လက်ထောက်ညွှန်ကြားရေးမှူး ဒေါက်တာဇဝနကို က သျှမ်းသံတော်ဆင့် ကိုပြောသည်။
“မြဝတီမှ ပြန်လာတဲ့သူ (၉၆) ဦး အပါအဝင် ကျန်တဲ့ (၄၆) ဦးကိုတော့ သျှမ်းတောင်မှာ ရှိတဲ့ Quarantine Center က စောင့်ကြည့်လူနာတွေရဲ့ ဓါတ်ခွဲနမူနာတွေကို ပေးပို့ထားခြင်း ဖြစ်ပါတယ်။” ဟု ဒေါက်တာ ဇဝနကို ကပြောသည်။
မြဝတီမှ ပြန်လည်ဝင်ရောက်လာသူ (၉၆) ဦးကို တောင်ကြီးမြို့ရှိ Quarantine Centerများတွင် ထားရှိကြောင်းသိရသည်။
ကျန်သည့် (၄၆) ဦးသည် သျှမ်းပြည်တောင်ပိုင်း ပင်လောင်း၊ ညောင်ရွှေ၊ ဖယ်ခုံ၊ ရွာငံ၊ ဆီဆိုင်၊ လွိုင်လင်၊ ကလော ၊ ဟိုပုံး၊ မိုးနဲ၊ မိုင်းကိုင်၊ ကျေးသီး စသည့်မြို့များမှ စောင့်ကြည့်လူနာ များဖြစ်ကြောင်း ဒေါက်တာဇဝနကို က သျှမ်းသံတော်ဆင့် ကိုပြောသည်။
“ခု လက်ရှိ သျှမ်းတောင်မှာ ကိုဗစ် – ၁၉ သံသယ လူနာ တစ်ဦးမှ မရှိသေးဘူး” ဟု ဒေါက်တာဇဝနကို က ပြောသည်။
သျှမ်းပြည်နယ်တွင် လူနာစုစုပေါင်း (၄၆၉ ) ဦး ရှိပြီး လက်ရှိ ကုသဆဲ လူနာ (၃၂၀) ဦး ရှိကြောင်း သိရှိရသည်။
မြန်မာနိုင်ငံတွင် ကိုဗစ်-၁၉ အတည်ပြု လူနာ (၃၁၈) ဦး ၊ ပြန်လည်သက်သာလာသူ (၂၅၀) ဦး ၊ သေဆုံးသူ (၆) ဦး ရှိပြီး လက်ရှိကုသဆဲ လူနာ (၆၂) ဦး ကျန်ရှိကြောင်း ကျန်းမာရေး နှင့် အားကစား ဝန်ကြီးဌာနက ထုတ်ပြန်ထားသည်။
Leave a Comments