ထိုင်းနိုင်ငံမှ သျှမ်းပြည်တောင်ပိုင်း တောင်ကြီးခရိုင်သို့ တလကျော်အတွင်း ပြန်လာသည့် ရွှေ့ပြောင်းအလုပ်သမား ၂၀၀၀ နီးပါးရှိသည် ဟု သျှမ်းပြည် အစိုးရထံ စုံစမ်းသိရသည်။
အဆိုပါ ပြန်လာသည့်သူများသည် ထိုင်းနိုင်ငံ မဲဆောက်မြို့ မှ တဆင့် ကရင်ပြည်နယ် မြဝတီ သို့ဝင်လာပြီး သျှမ်းပြည် တောင်ကြီးသို့ ပြန်လာသည့်သူများဖြစ်ကြောင်း သိရသည်။
ထို ထိုင်းနိုင်ငံမှ ပြန်လာသည့် ရွှေ့ပြောင်းအလုပ်သမားဦးရေ သည် မေ (၂၇) မှ ဇူလိုင်(၆)ရက်ထိ (၁၉ ၆၆)ဦးရှိကြောင်း လူမှုရေးဝန်ကြီး ဒေါက်တာမျိုးထွန်း က ပြောသည်။
ထို ရွှေ့ပြောင်းအလုပ်သား ၁၉၆၆ဦး ထဲမှာ (၁၆၆၃)ဦးကို ဓာတ်ခွဲနမူနာယူပြီး စစ်ဆေးခဲ့ရာ ကိုဗစ်-၁၉ ကူးစက်ရောဂါပိုးမတွေ့ရှိသူ (၁၄၉၇)ဦးရှိပြီး၊ (၁၆၆)ဦးမှာ အဖြေစောင့်ဆိုင်းနေဆဲ ဟု ဒေါက်တာမျိုးထွန်းက ပြောသည်။
လက်ရှိမှာ “ဓာတ်ခွဲနမူနာ ယူရန် ကျန်ရှိသူ (၃၀၃)ဦး ရှိတယ်” ဟု ဒေါက်တာမျိုးထွန်းက ဆိုသည်။
သျှမ်းပြည် တဝှမ်း ကိုဗစ် -၁၉ နှင့် ပတ်သက်ပြီး ဇူလိုင် ၆ရက်ထိ အခြေအနေများမှာ ဆေးရုံတက် ကိုဗစ် သံသယ စောင့်ကြည့်လူနာ (၄၆၂)ဦးရှိခဲ့ပြီး၊ ဆေးရုံတွင် ဆေးကုသနေသည့် ကိုဗစ်-၁၉ အတည်ပြုလူနာ တဦးကျန်ရှိနေသေးကြောင်း နှင့် လက်ရှိ ဆေးကုသနေဆဲ ကိုဗစ်-၁၉ သံသယ လူနာ (၃၁၄)ဦးရှိကြောင်း သျှမ်းပြည် အစိုးရ အဖွဲ့ ၏ ထုတ်ပြန်ချက် အရ သိရသည်။
သျှမ်းပြည်နယ်တွင် ကိုဗစ်-၁၉ အတည်ပြု လူနာ (၁၀) ဦး ရှိပြီး ဆေးရုံမှဆင်းခွင့်ရသူ (၉) ဦး ရှိပြီဖြစ်ကြောင်း သိရသည်။
မြန်မာနိုင်ငံတဝှမ်းတွင် ကိုဗစ် -၁၉ အတည်ပြု လူနာ ၃၁၆ ဦး ၊ ပြန်လည်သက်သာလာသူ ၂၄၅ ဦး ၊ သေဆုံးသူ ၆ ဦး နှင့် လက်ရှိ ကုသဆဲလူနာ (၆၅) ဦး ရှိကြောင်း ကျန်းမာရေး နှင့် အားကစား ဝန်ကြီးဌာန ၏ ထုတ်ပြန်ချက် အရ သိရသည်။
Leave a Comments