သျှမ်းပြည်တောင်ပိုင်း တောင်ကြီးမြို့ရှိ စဝ်စံထွန်းဆေးရုံတွင ကိုဗစ်-၁၉ စစ်ဆေးနိုင်သည့် စက်ရောက်ရှိပြီဖြစ်ကြောင်း စုံစမ်းသိရသည်။
”ကိုဗစ် -၁၉ စစ်နိုင်မယ့် စက်တွေ ရောက်ပါပြီ။ စက် ပစ္စည်း ၂ ခုလိုသေးတယ်။ နောက်ပြီးတော့ စစ်နိုင်မယ့် တခြား ပစ္စည်းတွေ နည်းနည်း လိုသေးတယ်။ ကျမတို့ အဆောက်အဦးပိုင်းက ၁၀၀ ရာခိုင်နှုန်း ပြီးပြီ။ စက်တွေကလည်း ၉၀ ရာခိုင်နှုန်းလောက် ရောက်နေပြီ” ဟု စဝ်စံထွန်း ဆေးရုံကြီး ရောဂါ ရှာဖွေရေးဌာန အထူးကု ဆရာဝန်ကြီး ဒေါက်တာပိုးပိုးလင်း က သျှမ်းသံတော်ဆင့် ကိုပြောသည်။
ဗိုင်းရပ်စ်ပိုး စစ်ဆေးနိုင်ရန်အတွက် ပစ္စည်း ထပ်မံဝယ်ယူနိုင်ရန် ဘတ်ဂျက် ထပ်မံ လိုအပ်နေသေးကြောင်း လည်း ဒေါက်တာ ပိုးပိုးလင်း က ပြောသည်။
“ လိုအပ်တဲ့ ဘတ်ဂျက် ကို ချပေးပြီးရင် ပစ္စည်းတွေ ဝယ်လို့ရပြီဆိုလို့ရှိရင် ကျမတို့က စတင်စစ်ဆေးနိုင်ပါပြီ။ စက်ကတော့ ၉၀ ရာခိုင်နှုန်း ရောက်နေပါပြီ။ ဇူလိုင် လလယ်လောက် ဒါပေမယ့် ပိုက်ဆံရပြီး ပစ္စည်းတွေ ဝယ်နိုင်မယ့် အခြေနေပေါ်မှာ မူတည်တယ်”ဟု ဒေါက်တာပိုးပိုးလင်း က ဆိုသည်။
ကိုဗစ်-၁၉ စစ်ဆေးနိုင်သည့် ပစ္စည်းကရိယာများ ဓါတ်ခွဲခန်းတွင် တပ်ဆင်ထားပြီးဖြစ်ပြီး၊ ဓါတ်ခွဲခန်းသည် တခြား ဗိုင်းရပ်စ် အပြင် ကိုဗစ် -၁၉ ဓါတ်ခွဲနမူနာ စစ်ဆေးလျှင် တစ်ကြိမ် ကို (၉၆)ခု စစ်ဆေးနိုင်ပြီး ကြာချိန် ၂ နာရီမှ ၃ နာရီ ထိရှိကြောင်း ဒေါက်တာပိုးပိုးလင်း က ပြောပြသည်။
”ကိုဗစ် စစ်ဆေးနိုင်တဲ့ စက်က ပြီးခဲ့တဲ့ တစ်ပတ်က လဆန်းပိုင်း ကနေစပြီးတော့မှ ဓါတ်ခွဲခန်းမှာ လာပြီး တပ်ဆင်ထားပြီးပါပြီ။” ဟု ဒေါက်တာပိုးပိုးလင်း က သျှမ်းသံတော်ဆင့် ကိုပြောသည်။
သျှမ်းပြည်တောင်ပိုင်း စဝ်စံထွန်းဆေးရုံ နှင့် သျှမ်းပြည်မြောက်ပိုင်း လားရှိုး ပြည်သူ့ဆေးရုံတွင် ထားရှိသည့် ဓါတ်ခွဲခန်းသည် တစ်ဦးတည်း အလှူရှင်ဖြစ်သည့် ငွေအောင်ကမ္ဘာ ကျောက်မျက်ကုမ္ပဏီ လီမီတက်မှ လှူဒါန်းခြင်း ဖြစ်ကြောင်းသိရသည်။
