ထိုင်းနိုင်ငံမှ ပြန်လာသည့် သျှမ်းပြည် ရွှေ့ပြောင်းအလုပ်သမားများ၏ ဓာတ်ခွဲ နမူနာ (၁၆၀) ကျော်ကို ဓာတ်ခွဲနမူနာ ပို့ဆောင် စစ်ဆေးထားကြောင်း စုံစမ်းသိရသည်။
အဆိုပါ နေရပ်ပြန်လာသည့် သျှမ်းပြည်ရွှေ့ပြောင်းအလုပ်သမား(၁၆၀)ကျော်သည် ထိုင်းနိုင်ငံ မဲဆောက်မှ တဆင့် ကရင်ပြည်နယ် မြဝတီဘက်သို့ပြန်လည် ဝင်ရောက်လာသည့် သူများဖြစ်ကြောင်း သိရသည်။
လက်ရှိ ထို နေရပ်ပြန် ရွှေ့ပြောင်းအလုပ်သမားများသည် ဇူလိုင်(၁)ရက်တွင် ေတောင်ကြီး မိုးကုတ်ဝိပဿနာ ရိပ်သာ နှင့် ကွန်ဗျုတာ တက္ကသိုလ်တွင် Quarantine ဝင်ထားကြောင်း ပြည်နယ် အထူးရောဂါ နိမ်နင်းရေး လက်ထောက်ညွှန်ကြားရေးမှူး ဒေါက်တာဇဝနကို က သျှမ်းသံတော်ဆင့် ကိုပြောသည်။
“မနေ့က (၁၆၂) ယောက် ရဲ့ ဓါတ်ခွဲနမူနာ ကို ရန်ကုန်သို့ ပို့ဆောင် စစ်ဆေးထားပါတယ်” ဒေါက်တာဇဝနကို က ပြောသည်။
မေလ ၂၇ မှ ဇွန် ၃၀ ရက်နေ့ထိ မြဝတီ – မယ်ဆောက် နယ်စပ်ဂိတ် မှ တဆင့် သျှမ်းတောင်တွင် ပြန်လည် ဝင်ရောက်လာသူ စုစုပေါင်း (၁၇၈၁) ဦး ရှိပြီဖြစ်ကြောင်း သိရသည်။
“သျှမ်းတောင်မှာ Quarantine ဝင်ထားတဲ့ သူ အားလုံး (၁၀၅၅) ဦး ရှိပါတယ်” ဟု ဒေါက်တာဇဝနကို က ပြောသည်။
သျှမ်းပြည်နယ်တွင် ကိုဗစ်- ၁၉ အတည်ပြု လူနာ ၁၀ ဦး ရှိပြီး ၎င်းတို့အားလုံးသည် ဆေးရုံမှ ဆင်းခွင့်ရပြီး ဖြစ်သော်လည်း လူနာ အမှတ် (၉၆) သည် ဒုတိယအကြိမ် ကိုဗစ် – ၁၉ ပိုး ပြန်လည်တွေ့ရှိကြောင်း စုံစမ်းသိရှိရသည်။
မြန်မာနိုင်ငံတွင် ကိုဗစ် -၁၉ အတည်ပြုလူနာ (၃၀၄) ဦး ၊ ပြန်လည် သက်သာလာသူ (၂၂၂) နှင့် သေဆုံးလူနာ (၆) ဦးရှိကြောင်း ကျန်းမာရေးဝန်ကြီးဌာန က ထုတ်ပြန်ထားသည်။
