ကျောက်မဲမြို့နယ် အတွင်းလက်နက်ကြီးကျ အရပ်သားတဦးသေ

သျှမ်းပြည်မြောက်ပိုင်း ကျောက်မဲမြို့နယ် ဟိုင်းကွီကျေးရွာ အုပ်စု ပန်ကျန်ရွာ၌  ယနေ့မနက်ပိုင်းက လက်နက်ကြီးကျသဖြင့် အရပ်သားတဦးသေဆုံးကာ တဦးဒဏ်ရာရရှိကြောင်း စုံစမ်းသိရသည်။

ဇွန်လ ၂၉ ရက် မနက် ၈နာရီ အချိန် သီပေါ အခြေစိုက် ခြေလျင်တပ်ရင်း ခလရ ၂၃ မှ ပစ်ခတ်သည့် လက်နက်ကြီးကြောင့် အသက် ၅၆ နှစ် အရွယ် အမျိုးသားတဦး သေဆုံးခဲ့ပြီး အမျိုးသမီး တဦး ဒဏ်ရာရရှိခဲ့ကြောင်း RCSS/SSA ပြောရေးဆိုခွင့်ရှိသူ ဒုဗိုလ်မှူးကြီး စဝ်အုမ်ခေး က သျှမ်းသံတော်ဆင့်ကို ပြောသည်။

“ ကျနော်တို့ RCSS/SSA က ရွာထဲမှာ မနေဘူး။ ရွာနဲ့ အဝေးကြီးရှိနေတုန်း တပ်မတော်က ရွာထဲ ကို လက်နက်ကြီးလှမ်းပစ်လိုက်တာပါ။ RCSS ဘက်ကတော့ ပြန်မပစ်လိုက်ပါဘူး ။ နှစ်ဖက် ဖြစ်တဲ့တိုက်ပွဲမဟုတ်ဘူး။ တပ်မတော်က တဖက်ပဲပစ်တာ” ဟု ဒုဗိုလ်မှူးကြီး စဝ်အုမ်ခေး က ဆိုသည်။

ဇွန် ၂၄ ရက် ကလည်း RCSS/SSA ကျောက်မဲဆက်ဆံရေး တာဝန်ခံမှ ဇွန် ၂၆ ရက် တွင်ကျရောက်မည့် အပြည်ပြည်ဆိုင်ရာ မူးယစ်တိုက်ဖျက်ရေး နေ့အတွက် မူးယစ်ဆေး မီးရှို့ဖျက်ဆီး မည့် ကိစ္စကို တပ်မတော်ထံ အကြောင်းကြားခဲ့သေးကြောင်းသိရသည်။


ကျေးရွာအတွင်းကျလာသည့် လက်နက်ကြီးတလုံး ( ဓာတ်ပုံ ဒေသခံတဦး)

ထိုသို့ အကြောင်းကြားခဲ့သော်လည်း ဇွန် ၂၅ ရက်က RCSS/SSA နှင့် အစိုးရ တပ်မတော် တိုက်ပွဲ ထိတွေ့မှု ဖြစ်ပွားခဲ့သေးကြောင်း၊ ဇွန် ၂၆ ရက် အပြည်ပြည်ဆိုင်ရာမူးယစ်ဆေး တိုက်ဖျက်ရေးနေ့တွင်မူ တိုက်ပွဲမရှိတော့ဘဲ အခမ်းအနားကျင်းပခဲ့ကြောင်း ဒုဗိုလ်မှူးကြီး စဝ်အုမ်ခေး က ပြောသည်။

အပြည်ပြည်ဆိုင်ရာ မူးယစ်တိုက်ဖျက်ရေးအခမ်းအနားကျင်းပပြီးနောက်ပိုင်း ဇွန် ၂၇ ရက်မှ စတင်ကာ ယနေ့ထိတိုင် ကျောက်မဲမြို့နယ်ဒေသအတွင်း RCSS/SSA နှင့် အစိုးရ တပ်မတော်တို့သည် စစ်ရေးတင်းမာမှုများရှိလာခဲ့ကြောင်း သိရသည်။

“အဲ့ဒီနေရာဒေသမှာ။ လက်ရှိ အခြေနေက တပ်မတော်ဘက်က ဆက်လက် လှုပ်ရှားနေတယ်။ RCSS တပ်ဖွဲ့ဝင်ကလည်း တိုက်ပွဲမဖြစ်ရလေအောင် တတ်နိုင်သလောက် ရှောင်ရှားပေးနေတယ်” ဒုဗိုလ်မှူးကြီး စဝ်အုမ်ခေး က လက်ရှိမြေပြင် အနေအထားကို ပြောပြသည်။

RCSS/SSA သည် တနိုင်ငံလုံးအပစ်ခတ်ရပ်စဲရေးသဘောတူညီစာချုပ် (NCA)လက်မှတ်ရေးထိုးထားသည့် အဖွဲ့တဖွဲ့ ဖြစ်ပြီး၊ လက်ရှိ အချိန်ထိ အစိုးရ နှင့်အတူ ငြိမ်းချမ်းရေးလုပ်ငန်းစဉ် ဆွေးနွေးပွဲ မကြာခဏ ပြုလုပ်နေသည့် အဖွဲ့တဖွဲ့ဖြစ်သည်။

“ဒါက ကောင်းတဲ့လက္ခဏတော့မဟုတ်ဘူး။ လက်ရှိဖြစ်နေတဲ့ တိုက်ပွဲကတော့ တိုက်ပွဲငယ်လေးတွေ မထင်မှတ်ဘဲဖြစ်တာပါ။ အထက် စီမံချက် ရှိရှိနဲ့ ဖြစ်ချင်တဲ့ တိုက်ပွဲမျိုးတော့ မဟုတ်လောက်ဘူး။ ကြီးကျယ်လာနိုင်တယ်လို့ မထင်ထားသေးပါဘူး။ ပုံစံကတော့ အခြေနေတော့ မလှဘူး။ ပြည်သူတွေ ထိခိုက်သေနိုင်တယ်” ဟု ဒုဗိုလ်မှူးကြီး စဝ်အုမ်ခေး က ထပ်လောင်းပြောသည်။

အဆိုပါ တိုက်ပွဲကိစ္စနှင့် ပတ်သက်ပြီး သျှမ်းသံတော်ဆင့် အနေဖြင့် အစိုးရ တပ်မတော် ဘက်မှ သတင်းမှန်ပြန်ကြားရေး ကို ကြိုးစားဆက်သွယ်ခဲ့သော်လည်း မရခဲပေ။

ကျောက်မဲမြို့နယ် အတွင်း တိုက်ပွဲဖြစ်ပွားမှုကြောင့် ဒေသခံ၂၀၀ကျော် စစ်ရှောင်လာရကြောင်း သိရသည်။

Leave a Comments

SHARE