သျှမ်းပြည်မြောက်ပိုင်း ကျောက်မဲမြို့နယ် လွှတ်တော်ကိုယ်စားလှယ် ထပ်မံတင်သွင်းသော သျှမ်းပြည် သဘာဝ သယံဇာတ တူးဖော်ရေး လုပ်ကွက်သစ်မေးခွန်းကို သယံဇာတ နှင့် သဘာဝပတ်ဝန်းကျင် ဝန်ကြီးမှ ဖြေကြားရာတွင် အားရကျေနပ်သည့်အဖြေ မရရှိကြောင်း လွှတ်တော်အမတ်က ပြောသည်။

ယမန်နေ့ ဇွန် ၂၅ ရက် တွင် ကျောက်မဲမြို့နယ် မဲဆန္ဒနယ် အမှတ်(၂) စိုင်းထွန်းဉာဏ် မှ “ သျှမ်းပြည်နယ်တွင် သဘာဝ သယံဇာတတူးဖော်ရေး လုပ်ကွက်သစ်များ အတွက် ဒေသခံပြည်သူများ နှင့် ဒေသခံ လွှတ်တော်ကိုယ်စားလှယ်များ၏ သဘောတူညီမှုဖြင့်သာ ပြည်နယ် အစိုးရမှ သဘော ထား မှတ်ချက်ပေးရန် အစီစဉ် ရှိ/ မရှိ” နှင့် စပ်လျဉ်း သည့် မေးခွန်း ကို လွှတ်တော်တွင်း မေး မြန်း ခဲ့ ခြင်းဖြစ်သည်။

အဆိုပါအဆိုကို လွန်ခဲ့သည့် ၂၀၁၉ ခုနစ် ဇူလိုင်လကတကြိမ် လွှတ်တော်အတွင်း တင်ပြခဲ့ဖူးသော်လည်း လွှတ်တော် ဥက္ကဌမှ အဆိုတင် ခွင့်မပြုခဲ့ကြောင်း၊ ယခုနှစ်တွင်ကြယ်ပွင့်ပြ မေးခွန်း ပုံစံပြောင်းပြီးမေးရကြောင်းလည်း စိုင်းထွန်းဉာဏ် က သျှမ်းသံတော်ဆင့် ကို ပြောသည်။

“ပထမ တင်တာက အဆို အနေနဲ့ တင်တယ်။ ဒါမယ့်လွှတ်တော် ဥက္ကဌ ခွင့်မပြုဘူး။ ဒီတစ်ခေါက်ကျမှ ဒီအဆိုကို မေးခွန်းအဖြစ်ပြောင်းပေးပါ။ ပြောင်းပေးမယ်ဆိုရင် ခွင့်ပြုမယ်။ အစိုးရ ရဲ့ သဘောထား သိနိုင်သလောက်ဆိုပြီးတော့မှ အဆိုကို မေးခွန်း အဖြစ် ပြန်ပြောင်းလိုက်တာ” ဟု လွှတ်တော်အမတ် စိုင်းထွန်းဉာဏ် က ပြောသည်။

ယမန်နေ့ လွှတ်တော် အမတ် စိုင်းထွန်းဉာဏ်မေးသည့် မေးခွန်းနှင့် ပတ်သက်ပြီး သယံဇာ နှင့် သဘာဝ ပတ်ဝန်းကျင် ထိန်းသိမ်းရေး ဝန်ကြီး ဒေါက်တာ ညီညီအောင် က “ မြန်မာ့ သတ္တုတွင်း ဥပဒေများနဲ့ မြန်မာ့ သတ္တုတွင်း နည်းဥပဒေ များကို ပြင်ဆင်သည့် နည်းဥပဒေ များတွင်မ ရှိ သေးကြောင်း” သျှမ်းပြည် လွှတ်တော် အစည်းအဝေးတွင် ပြန်လည် ဖြေကြားခဲ့သည်။

ဥပဒေ ပြဋ္ဌာန်းထားခြင်း မရှိသော်လည်း လုပ်ကွက်သစ်များ လျှောက်ထားရာတွင် သက်ဆိုင်ရာ ကုမ္ပဏီ အနေဖြင့် လျှောက်ထားဒေသရှိ ဒေသခံများ၊ သက်ဆိုင်ရာ လွှတ်တော်ကိုယ်စားလှယ်များ နှင့် ကြိုတင် ဆွေးနွေးစေခြင်း ဆောင်ရွက်နေကြောင်း သယံဇာတ နှင့် သဘာဝ ပတ်ဝန်းကျင် ထိန်းသိမ်းရေး ဝန်ကြီး ဒေါက်တာညီညီအောင် က လွှတ်တော်တွင်း ပြန်လည် ဖြေကြားခဲ့သည်။

“ဝန်ကြီးဖြေသွားတဲ့ပေါ်မှာတော့ ကတိကဝတ်မဟုတ်ဘူး။ တကယ်တမ်း ဒီလိုမျိုး လုပ်ဆောင်လာမယ်ဆိုလို့ရှိရင် ဒေသခံ နဲ့ လွှတ်တော်ကိုယ်စားလှယ် တို့ ဆွေးနွေးညှိနှိုင်းပါမယ်ဆိုတဲ့ ကတိမဟုတ်တဲ့ ပုံစံမျိုးပဲပြောသွားတာပေါ့နော်။ လုပ်ကို လုပ်ရမယ် ဆိုတဲ့ ပုံစံမျိုးမဟုတ်ဘူး။ ကိုယ်စားလှယ် ကော ဒေသခံ ပြည်သူတွေနဲ့ကော လုပ်သွားပါ့မယ်ဆိုတဲ့ ဝတ်ကျေတန်းကျေမျိုးပဲ ဖြေသွားတာပေါ့နော်။ ကျေနပ်မှုတော့ မရှိဘူး” ကျောက်မဲ လွှတ်တော်ကိုယ်စားလှယ် စိုင်းထွန်းဉာဏ် က သျှမ်းသံတော်ဆင့် ကိုပြောသည်။

လက်ရှိ သျှမ်းပြည် အစိုးရသည် ပြည်ထောင်စု အစိုးရ ခိုင်းသမျှကို ထောက်ခံပေးရမည့် အနေအထားဖြစ်နေသည်ဟု လည်း စိုင်းထွန်းဉာဏ်က ထောက်ပြပြောဆိုလိုက်သည်။

“အောက်ခြေမှာ အလုပ်လုပ်တဲ့ခါမှာ ပြဿနာပေါ်မူတည်ပြီးတော့မှ တင်ပြရတာရှိတယ်။ လက်ရှိမှာက ပြည်နယ် အစိုးရ ရဲ့ အနေအထားက ပြည်ထောင်စုက တောင်းဆိုလာသမျှကို ထောက်ခံ့ပေးရတဲ့ အနေအထားဖြစ်နေတယ်။ ကိုယ့်လူထု ကြိုက်ကြိုက် မကြိုက်ကြိုက် ကိုယ်က ထောက်ခံ့ပေးရတဲ့ အနေအထားဖြစ်တယ်” ဟု စိုင်းထွန်းဉာဏ် က မှတ်ချက်ပြုလိုက်သည်။

သျှမ်းပြည် တွင်းရှိ သဘာဝ သယံဇာတ တူးဖော်မှုကို ဒေသခံ ပြည်သူလူထုများ ကန့်ကွက်သော်လည်း သျှမ်းပြည်အစိုးရ က ထောက်ခံ့ပေးမှု များရှိကြောင်း သိရသည်။