သျှမ်းပြည်တွင်းရှိ ကိုဗစ်- ၁၉ အတည်ပြု လူနာ ၂ ဦး ဆေးရုံဆင်းခွင့်မရသေးကြောင်း စုံစမ်းသိရသည်။
အဆိုပါ ကိုဗစ်-၁၉ လူနာ ၂ ဦးသည် သျှမ်းပြည်တောင်ပိုင်း စဝ်စံထွန်းဆေးရုံ လူနာ အမှတ် (၂၄၅) နှင့် သျှမ်းပြည်မြောက်ပိုင်း မူဆယ်ပြည်သူ့ဆေးရုံ လူနာ အမှတ် (၂၃၁) တို့ဖြစ်ကြောင်း သိရသည်။
ထို့ပြင် မူဆယ်မြို့ လူနာ အမှတ် (၂၃၁) သည် ဓာတ်ခွဲခန်းစစ်ဆေးချက် အရ ၂ ကြိမ်ဆက်တိုက် Negative ဖြစ်ပြီး ဆေးရုံတွင် Quarantine ဝင်နေရကြောင်း မူဆယ်ပြည်သူ့ဆေးရုံ မှဆရာဝန်ကြီး ဒေါက်တာ ဟန်နိုင်စိုးက သျှမ်းသံတော်ဆင့် ကို ပြောသည်။
“လူနာ အမှတ် ၂၃၁ က ကျန်းမာရေး အခြေအနေ ကောင်းနေပါတယ်။ ၂ ကြိမ်ဆက်တိုက် Negative ဖြစ်လို့ ဆေးရုံက ဆင်းခွင့်ရပေမယ့် ဆေးရုံမှာ Quarantine ၁၄ ရက် ထားထားပါတယ်” ဟု ဆရာဝန်ကြီး ဒေါက်တာ ဟန်နိုင်စိုးက ဆိုသည်။
ဇွန် ၁၈ ရက်တွင် ဆေးရုံဆင်းခွင့်ပြုလိုက်သော်လည်း နေအိမ်သို့ပြန်ခွင့်မရသေးကြောင်း၊ လက်ရှိ မှာ စောင့်ကြည့်လူနာ အဖြစ် မူဆယ်မြို့ ပြည်သူဆေးရုံတွင် ၁၄ရက် ထားကာ နေအိမ်သို့ပြန်ခွင့်ပြုမည် ဟု ဒေါက်တာဟန်နိုင်ိစုး က ထပ်လောင်း ပြောသည်။
ထိုနည်းတူ သျှမ်းပြည်တောင်ပိုင်း တောင်ကြီးမြို့ရှိ စဝ်စံထွန်းဆေးရုံတွင် တက်ရောက်ဆေးကုသမှု ခံယူနေသည့် လူနာ အမှတ် (၂၄၅) သည် ဒုတိယအကြိမ် ဓါတ်ခွဲနမူနာ စစ်ဆေးရာမှာ Negative ဖြစ်ပြီး တတိယအကြိမ် ဓါတ်ခွဲနမူနာ စစ်ဆေးသွားမည်ဖြစ်ကြောင်း ပြည်နယ် အထူးရောဂါ နိမ်နင်းရေး လက်ထောက်ညွှန်ကြားရေးမှူး ဒေါက်တာနှင်းအိဖြူ က သျှမ်းသံတော်ဆင့် ကိုပြောသည်။
“လူနာ ၂၄၅ ရဲ့ဓါတ်ခွဲအဖြေက ဒုတိယအကြိမ် ဓါတ်ခွဲနမူနာစစ်တော့ ပိုးမတွေ့ လို့ ထွက်ပြီးပြီ။ ဒီနေ့ သူ့ကို တတိယအကြိမ် ဓါတ်ခွဲနမူနာ ယူပြီးတော့မှ ထပ်ပို့ပေးမယ်” ဟု ဒေါက်တာ နှင်းအိဖြူ က သျှမ်းသံတော်ဆင့် ကိုပြောသည်။
မူဆယ်ပြည်သူ့ဆေးရုံမှာ တက်ရောက်ဆေးကုသနေသည့် အတည်ပြု လူနာ အမှတ် (၂၃၁) သည် ကျန်းမာရေး ဝန်ထမ်းဖြစ်ပြီး ၎င်းနှင့်ထိတွေ့ဆက်စပ်သူ (၁၅၀) ကျော် ရှိကြောင်း လည်း ဆရာဝန်များက ပြောသည်။
တောင်ကြီးမြို့ရှိ စဝ်စံထွန်းဆေးရုံမှာ တက်ရောက်ဆေးကုသနေသည့် လူနာ အမှတ် (၂၄၅) သည် သျှမ်းပြည်တောင်ပိုင်း ဆီဆိုင်မြို့နယ် ဆိုက်ခေါင်ကျေးရွာ တွင် နေထိုင်သူဖြစ်ပြီး ပခုက္ကူဘက်က လမ်းလုပ်သားဖြစ်ပြီး ၎င်း နှင့် ထိတွေ့ ဆက်စပ်သူ (၈) ဦးခန့်ရှိကြောင်း သိရသည်။
သျှမ်းပြည်နယ်တွင် အတည်ပြု လူနာ ၁၀ ဦး ရှိသည့် အနက် (၈) ဦး ဆေးရုံမှ ဆင်းခွင့်ရပြီး ကျန်သည့် ၂ ဦးသည် သျှမ်းပြည်တောင်ပိုင်း တောင်ကြီး စဝ်စံထွန်း ဆေးရုံ အတည်ပြု လူနာ တစ်ဦး နှင့် သျှမ်းပြည်မြောက်ပိုင်း မူဆယ်ပြည်သူ့ဆေးရုံမှာ တစ်ဦး စုစုပေါင်း ၂ ဦး ရှိသည်။
မြန်မာနိုင်ငံတစ်ဝှမ်းလုံးတွင် ကိုဗစ် – ၁၉ အတည်ပြု လူနာ ၂၉၃ ၊ ပြန်လည် သက်သာလာသူ ၂၀၈ ဦး နှင့် သေဆုံးသူ ၆ ဦး ရှိကြောင်း ကျန်းမာရေး ဝန်ကြီးဌာနက ထုတ်ပြန်ထားသည်။