သျှမ်းပြည်မြောက်ပိုင်း နမ့်ခမ်းမြို့နယ် ကောင်းကတ် ကျေးရွာ အုပ်စုရှိ သစ်တောဦးစီးဌာနမှ သိမ်းယူထားသည့် မြေဧရိယာ ၉၇ ဧက ကို ကျေးရွာပိုင်များ ထင်းစိုက်ခင်း အဖြစ် ပြန်လည် လွှဲပြောင်းပေးမည်ဟု လွှတ်တော်တွင် ဒေါက်တာ ညီညီအောင် က ပြောကြားလိုက်သည်။
ယမန်နေ့ ( ဇွန် ၂၄)ရက်တွင် ကျင်းပသည့် သျှမ်းပြည် လွှတ်တော် (၁၉ )ကြိမ်မြောက် ပုံမှန် အစည်းအဝေးတွင် နမ့်ခမ်းမြို့နယ် မဲဆန္ဒနယ် အမှတ် (၂) ပြည်နယ် လွှတ်တော်ကိုယ်စားလှယ် ဦးအေးမောင် မှ ကောင်းကတ်ကျေးရွာ အုပ်စု ကွင်းပြင်ပ ဒေသ ရှိ သစ်တောစိုက်ခင်းအဖြစ် သိမ်းယူထားသည့် မြေများအနက် စိုက်ပျိုးခြင်း မရှိသော မြေဧရိယာ (၉ ၇) ဧက ကို မူလပိုင်ရှင် တောင်သူ ၂၈ ဦးထံ သို့ ပြန်လည် လွှဲပြောင်းပေးရန် အစီစဉ်ရှိ /မရှိ ကြယ်ပွင့်ပြ မေးခွန်း မေးမြန်းခဲ့ပါသည်။
အဆိုပါ မေးမြန်းမှုနှင့် ပတ်သက်ပြီး သယံဇာတ နှင့် သဘာဝ ပတ်ဝန်းကျင် ထိန်းသိမ်းရေးဝန်ကြီး ဒေါက်တာ ညီညီအောင် မှ နမ့်ခမ်းမြို့နယ် ကောင်းကတ်ကျေးရွာအုပ်စု သစ်တောစိုက်ခင်းများကို ကျေးရွာပိုင် ထင်းစိုက်ခင်း အဖြစ် လွှဲပြောင်းပေးမည်ဟု လွှတ်တော်တွင်း ပြန်လည်ဖြေကြားခဲ့ကြောင်း သိရသည်။
နမ့်ခမ်း သစ်တော ဦးစီးဌာနမှ (၁၉၉၅ – ၉၆) ခုနှစ်က ကျေးရွာသုံး ထင်းစိုက်ခင်း အဖြစ် စိုက်ပျိုးရန် သိမ်းယူခဲ့ပြီး သိမ်းယူမြေဧက (၁၀၀) အနက် ၃ ဧက သာ ထင်းစိုက်ခင်းအဖြစ် သစ်တောဦးစီးဌာနက စိုက်ပျိုးခဲ့ပြီး ကျန် ရှိသည့် ဧက (၉၇) ဧက တွင် စိုက်ပျိုးခဲ့ခြင်း မရှိကြောင်း သိရသည်။
