ကိုဗစ်-၁၉ ရောဂါ အလွန် တွင် သျှမ်းပြည် ပြည်သူများ၏ စီးပွားရေး ကဏ္ဍ နှင့် ပတ်သက်ပြီး တိကျသည့် အဖြေမရခဲ့ကြောင်း ဦးညီလေးချမ်းက ပြောဆိုလိုက်သည်။
ယနေ့ (ဇွန် ၂၄) ရက်တွင် ပင်းတယမြို့နယ် မဲဆန္ဒနယ် အမှတ်(၂) ဦးညီညီ (ခ) ဦးညီလေးချမ်း က ကိုဗစ်-၁၉ အလွန် သျှမ်းပြည် ပြည်သူလူထု ကျန်းမာရေး၊ ပညာရေး ၊ စီးပွားရေး၊ စိုက်ပျိုးရေး လုပ်ငန်းဆောင်ရွက်ချက်များကို လွှတ်တော်တွင်း မေးမြန်းခဲ့သည်။
ထိုမေးမြန်းချက်နှင့် ပတ်သက်ပြီး သက်ဆိုင်ရာ ဝန်ကြီးများအသီးသီးက လာရောက်ဖြေကြားခဲ့သော်လည်း ကိုဗစ်-၁၉ အလွန် စီးပွားရေး ကဏ္ဍ ကိုဖြေဆိုပေးခဲ့သည်မှာ ကျေနပ်မှု မရှိကြောင်း ဦးညီလေးချမ်းက ပြောသည်။
“ စီးပွားရေး လုပ်ငန်းက လွှဲပြီး ကျေနပ်အားရမှု ရှိပါတယ်။ အခြေခံ လူတန်းစားတွေရဲ့ ဘဝက အရေးကြီးဆုံးပဲ။ ကဏ္ဍလေးဖြေသွားတာတော့ မတွေ့ဘူး။ စီမံကိန်းဝန်ကြီးက ဖြေသွားတာတော့ မပြည့်စုံဘူး။အခြေခံလူတန်းစားတွေ အတွက် မပါတော့ မပြည့်စုံဘူးပဲ ပြောပါရစေ”ဟု ဦးညီလေးချမ်း က သျှမ်းသံတော်ဆင့် ကိုပြောသည်။
ကျန်းမာရေး၊ ပညာရေး နှင့် စိုက်ပျိုးရေး ကဏ္ဍ မှာ သက်ဆိုင်ရာ ဝန်ကြီးများက ပြန်လည် ဖြေကြားသွားတာ ပြည့်စုံမှု ရှိသော်လည်း စီးပွားရေး ကဏ္ဍကို ပြည့်စုံစွာ ဖြေကြားခဲ့ခြင်း မရှိကြောင်း ဦးညီလေးချမ်း က ဆိုသည်။
ကိုဗစ်-၁၉ ကြောင့် သျှမ်းပြည်တဝှမ်းတွင် စီးပွားရေး၊ ကျန်းမာရေး၊ ပညာရေး ထိခိုက်မှုများရှိနေကြောင်း၊ ထိုထိခိုက်မှုကြောင့် သျှမ်းပြည် အစိုးရ အနေဖြင့် ကိုဗစ်-၁၉ အလွန် ဆောင်ရွက်မည့် အရာကို သိလိုသည့် ရည်ရွယ်ချက်ဖြင့် မေးမြန်းခြင်းဖြစ်သည် ဟု ဦးညီလေးချမ်းက ပြောသည်။
ကိုဗစ်ကာလ အတွင်း သျှမ်းပြည်သို့ ပြန်လာသည့် ထိုင်း၊ တရုတ် နိုင်ငံသို့ သွားရောက် အလုပ်လုပ်သည့် ရွှေ့ပြောင်းအလုပ်သမား သိန်းချီရှိကြောင်း သိရသည်။
ထိုကိုဗစ်-၁၉ ဆက်လက်ဖြစ်ပွားနေပါက သျှမ်းပြည် ဒေသခံများ စားဝတ်နေရေးခက်ခဲကာ၊ပြဿနာများစွာ ရင်ဆိုင်လာနိုင်ကြောင်းလည်း သျှမ်းပြည်သူများက ပြောဆိုလိုက်သည်။
ကိုဗစ် – ၁၉ ရောဂါကြောင့် မြန်မာပြည်တွင်း သာမက ကမ္ဘာတွင်လည်း စီးပွားရေး ကျဆင်းမှု သာမက ပြည်ပမှာလည်း စီးပွားရေးကြောင့် ကုမ္ပဏီများစွာ အကြပ်အတည်းဖြစ်ပြီး ဒေဝါလီ ခံခဲ့ရကြောင်းသိရသည်။
Leave a Comments