သျှမ်းပြည်တောင်ပိုင်း တောင်ကြီးမြို့ရှိ တောင်ချွန်းကို ဖောက်ထားသည့် ကားလမ်း တစ်လျှောက်မှာ ရှင်သန်မြေ အစိမ်းရောင် ကွန်ရက် အဖွဲ့မှ ဦးဆောင်ပြီး သစ်ပင် (၂၀၀၀) ခန့် စိုက်ပျိုးမည် ဖြစ်ကြောင်း သိရသည်။
ယနေ့ တောင်ချွန်သွားရာလမ်းတလျောက် သစ်ပင်စိုက်နေသည့်ပုံ (ဓာတ်ပုံ တောင်ကြီးဒေသခံတဦး)
“တောင်ချွန်းကို ဖောက်ထားတဲ့ ကားလမ်းပေါ်မှာစိုက်တာပါ။ သစ်ပင်က အားလုံးပေါင်း ၁၇ ရက်နေ့က ၅၀၀ စိုက်ပါတယ်။ ဒီနေ့က (၃၀၀ ) စုစုပေါင်း (၈၀၀) စိုက်ပြီးသွားပါပြီ။ ၁ ထောင်ကျော် စိုက်ဖို့ ကျန်သေးတယ်” ဟု ရှင်သန်မြေ အစိမ်းရောင် ကွန်ရက် ဥက္ကဌ ဒေါ်ချယ်ရီကျော် က သျှမ်းသံတော်ဆင့် ကိုပြောသည်။
ယနေ့ ဇွန် (၁၉ ) ရက်မှာ ကျရောက်သော နိုင်ငံတော် အတိုင်ပင်ခံ ပုဂ္ဂိုလ် ဒေါ်အောင်ဆန်းစုကြည် ၏ (၇၅) နှစ်ပြည့် မွေးနေ့ အထိမ်းအမှတ် အနေဖြင့် သစ်ပင် (၃၀၀) စိုက်ပျိုးခဲ့ကြောင်း ဒေါ်ချယ်ရီကျော်က ပြောသည်။
ရှင်သန်မြေ အစိမ်းရောင်ကွန်ရက်မှ ဦးဆောင် စိုက်ပျိုးပြီး တောင်ကြီးမြို့သူ၊ သား များနှင့် တခြား ပရဟိတ အဖွဲ့များလည်း ပူးပေါင်း ပါဝင် စိုက်ပျိုးကြကြောင်းသိရသည်။
တောင်ချွန်သွားရာလမ်းတလျောက် တွင် သစ်ပင်စိုက်ရသည့် အကြောင်းရင်းမှာ သစ်ပင်သည် ရာသီဥတုကို ထိန်းပေးခြင်း၊ အရိပ်အာဝါသ ကို ပေးဆောင်ခြင်း၊ သစ်ပင်မရှိပါက အပူချိန်မြင့်တက်လာပြီး တောင်ကြီးမြို့ရေဝေရေလဲစနစ် ပျက်စီးဆုံးရှုံးသွားမည်ကို ကာကွယ်သည့်အနေဖြင့်စိုက်ပျိုးခြင်းဖြစ်ကြောင်း ဒေါ်ချယ်ရီကျော်က ပြောသည်။
“မြေအောက်ရေကို အသုံးပြုနေရတဲ့ တောင်ကြီးမြို့က ရေဝေ ရေလဲ ပျက်စီးဆုံးရှုံးသွားမှာကို ကာကွယ်တဲ့အနေနဲ့ သစ်ပင်တွေ စိုက်ခြင်း ဖြစ်ပါတယ်” ဟု ဒေါ်ချယ်ရီကျော် က ဆိုသည်။
တောင်ချွန်းကားလမ်းပေါ် ပြန်လည် စိုက်ပျိုးမည့် သစ်ပင်များမှာ ချယ်ရီပင်၊ စိန်ပန်းနီ၊ စိန်ပန်းပြာ၊ ဝက်သစ်ချ၊ ငုရွှေဝါ၊ ငုစပ်ချယ်ရီ၊ ရေမြော၊ ရေသင်းဝံ စသည် တို့ကို စိုက်ပျိုးသွားမည် ဖြစ်ကြောင်းသိရသည်။
Leave a Comments