မြန်မာ-တရုတ် နယ်စပ်ဂိတ်များကို ယနေ့အချိန်ထိ ပိတ်ထားဆဲဖြစ်သဖြင့် မူဆယ်ဒေသခံ ဈေးသည်များ အခက်အခဲများစွာရင်ဆိုင်နေရကြောင်း စုံစမ်းသိရသည်။

ဧပြီလ မှ စတင်ကာ မြန်မာ-တရုတ် နယ်စပ်ဂိတ်များဖြစ်သည့် မူဆယ် ဆင်ဖြူဂိတ်၊ နန်းတော်ဂိတ် (အလယ်ဂိတ်) မန့်ဝိန်းဂိတ်များနှင့် အခြားဂိတ်များတွင် တရုတ်နိုင်ငံမှ ကိုဗစ်-၁၉ ကပ်ရောဂါကြောင့် ကုန်စည်ကူးသန်းရောင်းဝယ်မှုမှ အပ ကျန် လူ ဝင်၊ထွက်မှု ပိတ်ဆိုင်းထားသည်မှာ ယနေ့ထိတိုင်ဖြစ်ကြောင်း မူဆယ် ဈေးသည်များက ပြောသည်။

“ အဓိက တော့ ကုန်စည် ဝင်၊ထွက်လို့ရပေမယ့် ကျမတို့လို ကုန်စုံရောင်းတဲ့သူတွေက ဝင်၊ထွက်ဖို့က ခက်တယ်။ အရင်က ကျမတို့ ကုန်စုံတွေကို တဖက်နိုင်ငံကို တပိုင်တနိုင် တင်ပို့ရောင်းတယ်။ ကိုဗစ် ဖြစ်ကတည်းက မဝင်ရတော့ အခက်ဖြစ်တယ်” ဟု ကုန်စုံဆိုင် ဖွင့်ထားသည့် နန်းကျင် က သျှမ်းသံတော်ဆင့် ကို ပြောသည်။

မြန်မာ-တရုတ် နယ်စပ်တွင်နေထိုင်သူများသည် ယခင် ကိုဗစ် မဖြစ်ခင်တွင် တရုတ်နိုင်ငံသို့ ခြံထွက်များ ကုန်စည်များကို တပိုင်တနိုင်ရောင်းချကြောင်း၊ လက်ရှိမှာ ကိုဗစ်ကြောင့် တရုတ်ပြည်သို့တင်ပို့ရောင်းချခွင့်မရသဖြင့် များစွာ အခက်ကြုံနေရကြောင်း နန်းကျင် က ပြောသည်။

“ အရင်က ကျမ ခြံထွက် သီးနှံတွေကို တရုတ်ဘက် သွားရောင်းတယ်။ အခု မရောင်းရတာ အဆင်မပြေဘူး။ ကိုဗစ် ပြီးမှပဲ ရောင်းရမယ်ဆိုရင်တော့ ဘယ်တော့ ပြန်ဖွင့်မလဲမသိဘူး” ဟု မူဆယ်မြို့နယ် အတွင်းရှိ ဈေးသည် နန်းဆာ က ပြောသည်။

ကိုဗစ် ဖြစ်ပွားမှုကြောင့် နှစ်နိုင်ငံ လုပ်ကိုင်စားသောက် မူဆယ်မြို့နယ် ဒေသခံများအတွက် ယခုမှာ ဝင်ငွေ ရှာဖွေရခက်ခဲလာကြောင်း၊တရုတ်ငွေလဲလှယ်သည့် သူများလည်း အဆင်မပြေမှုများကြုံနေရကြောင်း သိရသည်။

“ ဒီလို သာ ဆက်သွားမယ်ဆိုရင်တော့နဂိုကတည်းက လုယက်မှု ခိုးမှုပေါတဲ့မူဆယ်က ပိုပြီးသူခိုးတွေ ဓားမြတွေ ပေါလာနိုင်တယ်။ အခု က အားလုံး အကြပ်အတည်းကြုံနေတဲ့ ကာလပါပဲ” ဟု နန်းဆာ က ပြောသည်။

မြန်မာ-တရုတ်နယ်စပ် ဂိတ်ကို တရုတ်ပြည် ဘက်မှ ယာယီပိတ်လိုက်ခြင်းဖြစ်ပြီး မြန်မာပြည်ဘက်မှ တစုံတရာ ထုတ်ပြန်ထားခြင်းမရှိကြောင်း မူဆယ်မြို့နယ် အုပ်ချုပ်ရေးမှူး ဦးသူရိန်က သျှမ်းသံတော်ဆင့် ကို ပြောသည်။

“ လက်ရှိကတော့ တရုတ်ပြည်ဘက်က နယ်စပ်ဂိတ် ပေးမဝင်သေးဘူး။ ဘယ်တော့ဆိုတာလည်း မသိရသေးဘူး။ ကိုဗစ် ပြီးမှပဲ သူတို့ ပေးဝင်မယ်ထင်တယ်” ဟု ဦးသူရိန်က ဆိုသည်။

မြန်မာ-တရုတ်နယ်စပ်ဂိတ်များတွင် လူ ဝင်၊ထွက်ခွင့် ယာယီပိတ်ဆိုင်းထားသော်လည်း ကုန်စည်စီးဆင်းမှုအတွက် ဝင်၊ထွက် သွားလာခွင့်ပေးထားကြောင်း၊ သို့သော် မြန်မာပြည်ဘက်ခြမ်းမှ ကုန်ကားများကို တရုတ်ဘက်ခြမ်းမှ ကားသမားများက လာရောက်မောင်းနှင်ယူဆောင်သွားကြောင်း ဦးသူရိန်က ပြောသည်။

မြန်မာ-တရုတ် နယ်စပ်ဂိတ်များတွင် တပိုင်တနိုင် ကုန်သည်များအတွက် ဝင်၊ထွက် သွားလာခွင့်ပေးရန်၊ ဈေးသည်များလည်း ဈေးရောင်းချခွင့်ပေးရန် မူဆယ် မြို့ နေ ဈေးသည်၊ ကုန်သည်များက တောင်းဆိုလိုက်သည်။