ယနေ့ည ကျန်းမာရေး ဝန်ကြီးဌာန ကထုတ်ပြန်သည့် ကိုဗစ် – ၁၉ ထပ်တိုးလူနာ ၂ ဦးအနက် သျှမ်းပြည်တောင်ပိုင်း ဆီဆိုင်မြို့နယ် တွင် နေထိုင်သည့် အမျိုးသား တဦး ပါဝင်ကြောင်း သိရသည်။
Photo by ဒေသခံတဦး
၄င်းသည်သျှမ်းပြည်တောင်ပိုင်း ဆီဆိုင်မြို့နယ် ဆိုက်ခေါင်ကျေးရွာ တွင် နေထိုင် သူ ဖြစ်ပြီး ပြည်ပသို့ ခရီးသွား ရာဇဝင် မရှိ သကဲ့သို့ အတည်ပြု လူနာနှင့်လည်း ထိတွေ့မှု မရှိကြောင်း ထုတ်ပြန်ထားသည်။
“ဆိုက်ခေါင်မှာရှိတဲ့ အသွားအလာ ကန့်သတ်ထားတဲ့ နေရာမှာရှိတယ်။ ဒီညကိုတော့ သူ့ကို ဆိုက်ခေါင် တိုက်နယ် ဆေးရုံမှာ ပြောင်းထားမယ်။ မနက်ဖြန်မှ စဝ်စံထွန်း ဆေးရုံကို ရွှေ့မယ်” ပြည်နယ် အထူးရောဂါ နှိမ်နင်းရေးဌာန လက်ထောက်ညွှန်ကြားရေးမှူး ဒေါက်တာနှင်းအိဖြူ က သျှမ်းသံတော်ဆင့် ကိုပြောသည်။
၎င်းအမျိုးသား သည် ကချင်ပြည်နယ် မြစ်ဆုံအနီးရှိ လမ်းလုပ်သား ဖြစ်ပြီး မေ ၂၁ ရက်နေ့က ဆိုက်ခေါင်ပြန်ရောက်ကာ Facility Quarantine ၁၆ ရက်မြောက်နေ့တွင် စစ်ဆေးသောဓါတ်ခွဲအဖြေ မှ ပိုးတွေ့ရှိအတည်ပြုကြောင်း ဒေါက်တာနှင်းအိဖြူ က သျှမ်းသံတော်ဆင့် ကိုပြောသည်။
“ဒေသအလိုက် ပြည်တွင်း ခရီးသွားတွေကော ပြည်ပခရီးသွားတွေကော အသွားအလာ ကန့်သတ်ထားတာရှိတယ်။” ဒေါက်တာနှင်းအိဖြူ က သျှမ်းသံတော်ဆင့် ကိုပြောသည်။
ယနေ့ည ထုတ်ပြန်သည့် အတည်ပြု လူနာ ၂ ဦးသည် သျှမ်းပြည်တောင်ပိုင်း ဆီဆိုင်မြို့နယ် အသက် ၃၀ နှစ် အရွယ် အမျိုးသားတစ်ဦး နှင့် ရန်ကုန်တိုင်းဒေသကြီး လှိုင်မြို့နယ်တွင် အသက် ၃၇ နှစ်အရွယ် အိန္ဒယနိုင်ငံပြန် တပ်မတော်သား တစ်ဦးဖြစ်ကာ အသွားအလာ ကန့်သတ်ထားသူ ဖြစ်ကြောင်း ထုတ်ပြန်ထားသည်။
မြန်မာနိုင်ငံတွင် ကိုဗစ် – ၁၉ အတည်ပြု လူနာ ၂၄၆ ရှိပြီး ပြန်လည်သက်သာလာသူ ၁၅၉ ဦး သေဆုံးသူ ၆ ဦး ရှိပြီ ဖြစ်သည်။ လက်ရှိ သျှမ်းပြည်နယ်တွင် အတည်ပြု လူနာ ၃ ဦး ရှိပြီဖြစ်ကြောင်း သိရသည်။
Leave a Comments