ကိုဗစ် -၁၉ ဆက်လက် ကူးဆက်နေမှုကြောင့် သျှမ်းပြည် အတွင်းရှိ ကျောင်းသားမိဘများ ကျောင်းလွှတ်ရန် အဆင်သင့်မဖြစ်သေးကြောင်း စုံစမ်းသိရသည်။
ဇူလိုင် ၂၁ရက်မှစတင်ကာ မြန်မာတဝှမ်းရှိ ကျောင်းများပြန်လည် ဖွင့်လှစ်ရန် ပညာရေးဝန်ကြီးဌာန က ထုန်ပြန်ကြေညာခဲ့သည်။
လက်ရှိကာလသည် မြန်မာနိုင်ငံတွင် ကိုဗစ်-၁၉ ကူးစက်မှု ဆက်လက်တည်ရှိနေသေးသဖြင့် မိမိကလေးငယ်ကို ကျောင်းလွှတ်ရန် အဆင်သင့်မဖြစ်သေးကြောင်း၊ ကလေးငယ်များသည် မိမိ ကျန်းမာရေးကို သေချာ ဂရုမစိုက်တတ်သေးသဖြင့် ကျောင်းလွှတ်ရန် မဖြစ်နိုင်သေးကြောင်း ကျောင်းသားမိဘများ၏ ပြောပြချက် အရသိရသည်။
“ကျောင်းဖွင့်ရင်လည်း ကျနော်တို့ ကလေးတွေတော့ မလွှတ်ချင်သေးဘူး။ တစ်နှစ်အောက်ရင် အောက်သွားပါစေ” တောင်ကြီးမြို့နယ် ၃တန်းကျောင်းသားတဦး၏ မိခင် က သျှမ်းသံတော်ဆင့် ကို ပြောသည်။
ကိုဗစ်-၁၉ ကူးစက်ဖြစ်ပွါးမှု မလျော့ကျဘဲ ဆက်လက်တိုးများလာဉီးမည်ဆိုပါက ကျောင်းလွှတ်မည်မဟုတ်ကြောင်း ကျောင်းတနှစ်နားထားမည်ဖြစ်ကြောင်းလည်း ၎င်း မိခင်က ပြောသည်။
သျှမ်းပြည် တောင်ကြီးမြို့ ရှိ အမှတ် ၄ အခြေခံအထက်တန်းကျောင်းတွင် ကိုဗစ်-၁၉ ကာလ စာသင်ချိန် ၂ကြိမ် ခွဲပြီး ဇူလိုင် ၂၁ ရက်တွင် ဖွင့်လှစ်သွားမည် ဟု အထက ၄ ကျောင်းအုပ်ဆရာမကြီး ဒေါ်နန်းမြင့်မြင့်အေး က သျှမ်းသံတော်ဆင့် ကို ပြောသည်။
လာမည့် ဇူလိုင် ၂၁ရက်တွင် အထက်တန်းကျောင်းသားများကို စတင်ဖွင့်မည်ဖြစ်ကြောင်း၊ လက်ရှိမှာ ကျောင်းဖွင့်ရန် အတွက် ကြိုတင်ပြင်ဆင်မှုများပြုလုပ် နေကြောင်း၊ စာသင်ချိန်ကို ၂ သုတ်ခွဲပြီး သင်ကြားသွားမည် ဟုလည်း ကျောင်းအုပ်ဆရာမကြီး ဒေါ်နန်းမြင့်မြင့်အေး က ပြောသည်။
“ကျမ တို့ကျောင်းမှာ ကျောင်းသားပေါင်း ၂၅၀၀ ကျော်ရှိတယ်။ တပြိုင်တည်း ဖွင့်လို့ အဆင်မပြေဘူး။တခန်းကို ကျောင်းသား၂၀ ဦးထားပြီး ကျောင်းသားတွေကို Social Distancing ထားပြီးမှ သင်ကြားမှာ ဖြစ်ပါတယ်” ဟုကျောင်းအုပ်ဆရာမကြီး ဒေါ်နန်းမြင့်မြင့်အေး က ဆိုသည်။
ကျောင်းအဝင်ဝ တွင် အပူချိန်တိုင်းခြင်း၊ စာသင်ခန်းတိုင်းမှာ လက်ဆေးပေစင် ထားခြင်း၊ ကျောင်းသူ/သား များ mask တပ်ပြီး စာသင်ကြားခြင်း၊ Face Shield များ တပ်ဆင်ခြင်း များ ပြုလုပ်ရမည် ဖြစ်ကြောင်း သိရသည်။
“၂ ကြိမ်ခွဲပြီး သင်မယ်ဆိုတော့ စာသင်ချိန်တွေ လုံလောက်ပါတယ်။ ထိုင်ခုံတွေ အဆောက်အဦးတွေ လုံလောက်မှု ရှိတယ်။ ကျန်းမာရေး ဆေးပေးခန်းလည်း ဖွင့်သွားပါမယ်။ ကျောင်းဖွင့်ဖို့ အဆင်သင့် ဖြစ်နေပါပြီ။” ဟု တောင်ကြီး အထက ၄ ကျောင်းအုပ်ဆရာမကြီး ဒေါ်နန်းမြင့်မြင့်အေး က သျှမ်းသံတော်ဆင့် ကိုပြောသည်။
သျှမ်းပြည် တွင် အခြေခံပညာအထက်တန်းကျောင်း (၄၆၂) ကျောင်း၊ အလယ်တန်းကျောင်း( ၆၂၁) ၊ မူလတန်းကျောင်း(၅၃၀၈) နှင့် ပုဂ္ဂလိက ကိုယ်ပိုင် အခြေခံပညာကျောင်း(၁၁၀) ကျောင်း တို့ ဖွင့်လှစ်ထားသည်။
“ မြန်မာပြည်က အွန်လိုင်း ပညာသင်ဖို့ဆိုတာလည်း မဖြစ်နိုင်၊ ကိုဗစ်ကလည်း ဆက်ဖြစ်နေတော့ ကလေးကို ကျောင်းပို့ဖို့ဒွိဟဖြစ်နေတယ်။ ကလေးတွေက ကိုယ့်ကိုကိုယ်မကာကွယ် ဂရုမစိုက်တတ်တော့ ကျောင်းလွှတ်ဖို့ တော်တော်စဉ်းစားနေရတယ်” ဟု အလယ်တန်းကျောင်းသား တဦး၏ မိခင် နန်းမွေ က သျှမ်းသံတော်ဆင့် သို့ပြောသည်။
အခြေခံကျောင်းများပြန်လည်ဖွင့်လှစ်သည့် ကိစ္စကို သက်ဆိုင်ရာမှ ပြန်လည်စိစစ်ပေးသင့်ကြောင်း လည်း ကျောင်းသားမိဘများက ပြောဆိုလိုက်သည်။
Leave a Comments