သျှမ်းပြည်မြောက်ပိုင်း သီပေါမြို့နယ် ကျေးလက်အတွင်း အစိုးရစစ်ကြောင်း ဖြတ်သန်းစဉ် မိုင်းပေါက်ကွဲသဖြင့် အဆိုပါစစ်ကြောင်းသေနတ်ပစ်ဖောက်ရာ ရွာသားများ ဘုန်းကြီးကျောင်းသို့ တိမ်းရှောင် ထွက်ပြေးခိုလှုံကြရကြောင်း သိရသည်။
ဧပြီလ ၁ ရက်နေ့က သီပေါမြို့နယ် မိုင်းလန်းအုပ်စု ၀မ့်စန့်ဟန်ရွာအတွင်း ဖြတ်သန်းသွားသော ခမရ ၅၀၃ မှ အင်အား ရ၀ ခန့်ရှိ စစ်ကြောင်းမှာ ၄င်းတို့ဖြတ်သန်းသွားခိုက် မိုင်းပေါက်ကွဲသဖြင့် တပ်ကြပ်တဦးသေဆုံးပြီး တပ်သားတဦး ဒဏ်ရာရကြောင်းသိရသည်။
စရဖဘက်ကအပြောအရဆိုရင် သူတို့ဖမ်းမိတဲ့ နွားမှောင်ခိုကုန်သည်တယောက်က ထွက်ဆိုလို့ အဆက်လိုက်ရှာရင်း ဒီဘက်ကိုရောက်လာတာ။ ကုန်သည်တွေက သူတို့ကိုမိုင်းပြန်ထောင်တယ်လို့ပြောတယ်။ အဲဒါနဲ့ ဖမ်းလာတဲ့အဲ့ကုန်သည်ကို ဒီရွာမှာဘဲ သူတို့ပစ်သတ်လိုက်တာ။ ၀မ့်စန့်ရွာသား ၂ ယောက်ကိုလည်း သူတို့ဖမ်းပြီးချုပ်ထားတယ်။ ကျနော်တို့ ဘုန်းဘုန်း ကသွားပြီးမေတ္တာရပ်ခံမှပြန်လွှတ်ပေးတာ။ – ဟု အမည်မဖော်လို့သည့် ရွာသား တဦးက ပြောပြသည်။
အဆိုပါစစ်ကြောင်းမှာ အဖက်ဖက်သို့ သေနတ်ပစ်ဖောက်ပြီး ရွာသားများ၏ နေအိမ်အတွင်းဝင်ရောက်မွှေနှောက်ရှာဖွေ ကာ ကားများ ဆိုင်ကယ်များကိုလည်းရိုက်ခွဲဖျက်ဆီးခဲ့ကြောင်း၊ ရွာသားများ ဘုန်းကြီးကျောင်းသို့ ထွက်ပြေး တိမ်းရှောင် နေသည်မှာ ယနေ့တိုင် အိမ်သို့မပြန်ရဲကြသေးသေးကြောင်းသိရသည်။
အခု ရွာသား ၃၀၀ ကျော်က ဆီဆုံဘုန်းကြီးကျောင်း ၊ မြို့ဘက်ကအမျိုးတွေအိမ်၊ နမ့်ယန်းရွာဘက်ကို အသီးသီး ထွက်ပြေးတိမ်းရှောင်နေတယ်။ တချို့လည်း ဟန်နားဘက်သွားနေတယ် – ပြန်မလာသေးဘူး။ အိမ်ရှင်မရှိတဲ့ အိမ်တွေ ဆိုရင် သူတို့တက်ပြီးမွှေနှောက်ထားတာတွေရှိတယ်။ ကားတွေဘာတွေပစ္စည်းတွေကို ဖျက်ဆီးတာတွေ လည်းရှိတယ်- ဟု အဆိုပါအုပ်စုမှ ဆရာတော်တပါးကမိန့်တော်မူပါသည်။
မတ်လ ၃၁ ရက်နေ့က သီပေါမြို့နယ် ၀မ့်ကုန်းဆာနှင့်ဝမ့်စမ်လောင်းရွာကြား ဟိုင်းဝေးလမ်းပေါ်တွင် နွားများတင်ဆောင် သောကားအား လက်နက်ကိုင်အဖွဲ့တဖွဲ့က ပစ်ခတ်ခဲ့ကြောင်းရွာသားများပြောပြချက်အရသိပါသည်။
ကားလမ်းမကြီးနှင့်နီးသောအဆိုပါ ဒေသတွင် အစိုးရတပ်မတော်က လှုပ်ရှားသွားလာပါသည်။ အဆိုပါအတွင်းပိုင်းတွင်မူ သျှမ်းပြည်တိုးတက်ရေးပါတီ သျှမ်းပြည်တပ်မတော် SSPP/SSA က လှုပ်ရှားပါသည်။
Leave a Comments