သျှမ်းပြည်တောင်ပိုင်း တောင်ကြီးမြို့မဈေးကြီးတွင် ယခုပြုလုပ်နေသော ဆိုင်ခန်းများ အလှည့်ကျဖွင့်လှစ်ရောင်းချမှုစနစ်မှာ အဆင်မပြေကြောင်း တောင်ကြီးမြို့မဈေးမှ စျေးသည်များက ပြောသည်။
ကိုဗစ် – ၁၉ ကာကွယ် ထိန်းချုပ်ရေးအတွက် ၂ လကြာပိတ်ထားသည့် တောင်ကြီးမြို့မဈေးသည် ဇွန်လ ၁ ရက်ကစပြီးအလှည့်ကျစနစ်ဖြင့် ဈေးပြန် ဖွင့်ရောင်းရန် သက်ဆိုင်ရာက ထုတ်ပြန်ခဲ့သည်။
“ အလှည့်ကျစနစ်နဲ့ ဖွင့်ရတာ အဆင်မပြေဘူး။ နေ့တိုင်းထွက်ချင်တယ်” ဟု တောင်ကြီးမြို့မဈေးမှ အထည်ဆိုင်ရှင် မမျိုး က ပြောသည်။
ဆိုင်ခန်းကို အလှည့်ကျစနစ်ထက် နေ့စဉ် ဖွင့်လှစ်ရောင်းချချင်ကြောင်း၊ နှာခေါင်းစည်း (Mask) ၊လက်အိတ် နှင့် လက်ဆေးရည် အစုံထားရှိကာ စည်းကမ်းတကျ လုပ်ဆောင် ပေးပါက အဆင်ပြေနိုင်ကြောင်း မမျိုး ကပြောသည်။
“ ဆိုင်တိုင်း ပေးဖွင့်လိုက် ပြီးရင် mask၊ လက်အိတ် နဲ့ လက်ဆေးရည် နဲ့ အစုံ စည်းကမ်းရှိရှိနဲ့ ဆိုရင် ဖြစ်ပါတယ်။ ရန်ကုန် မန္တလေးက ဒီပုံစံ မဟုတ်ဘူး တောင်ကြီး တစ်ခုတည်းပဲ ဒီပုံစံ အဆင်မပြေဘူး” ဟု မမျိုးက ဆိုသည်။
တောင်ကြီး စည်ပင်သာယာရေး ကော်မတီ က တောင်ကြီး မြို့မဈေးအတွင်း စျေးသည်များကို ဆိုင်ခန်းအလှည့်ကျဖွင့်လှစ် ရောင်းစေပြီး၊ စျေး၀င်ခွင့် ၂ ပေါက် သာ ထားပေးရာ စျေးသုံးသူများကိုလည်း နှာခေါင်းစည်း တပ်စေကာ အပူချိန်တိုင်းတာပေးပြီးမှ စျေး၀င်သုံးခွင့်ပေးကြောင်း သိရသည်။
သို့သော် ဈေးသုံးသူများသည် အဝင်တံခါးဂိတ်တွင်သာနှာခေါင်းစည်း Mask တပ်ကြပြီး ဈေးထဲရောက်ပါက Mask များချွတ်ပစ်ကြကြောင်း ဈေးသည်များ က ပြောသည်။
“လူမစည်ဘူး။ လာတော့ ထွက်တယ် မရောင်းရဘူး။ စည်းကမ်းလုပ်တာတော့ မှန်တယ်။ ဝင်ဝင်ချင်းတော့ mask တပ်တယ်။ ဈေးထဲ ရောက်တော့ နှာခေါင်းစည်း ဖြုတ်တဲ့ သူက ဖြုတ်၊ စည်းကမ်းမရှိသလို ဖြစ်နေတယ်” ဟု မမျိုးက ထပ်လောင်းပြောသည်။
ဈေးဆိုင်ခန်း ဖွင့်ခွင့် ရှိသော်လည်း အဝင်အထွက် နည်းပြီး ရောင်းအား ကျဆင်းကြောင်း ဈေးသည် များက ပြောကြသည်။
“အဆင်မပြေဘူး။ ပိတ်ထားတာလဲ ၂ လလောက်ရှိပြီ အဲ့ ၂ လ အတွင်းမှာ သုံးတာတွေ ဘာတွေဆိုတော့ ပိုက်ဆံက လိုပြီ။ ဖောက်သည်တွေ နဲ့လည်း ကင်းကွာနေပြီ” ဟု ကိုဆန်းဝင်း က ပြောကြသည်။
ဇွန် ၁ ရက်နေ့မှ စပြီး ဈေးဆိုင်များ ၊ မော်တော်ယာဉ်လိုင်းများ ၊ စားသောက်ဆိုင်များ၊ ဟော်တယ်များ ကို သျှမ်းပြည်အစိုးရ ၏ စည်းကမ်းချက် နှင့် အညီ ဖွင့်လှစ်ဖွင့် ပေးခဲ့ကြောင်းသိရသည်။
Leave a Comments