သျှမ်းပြည်အတွင်းရှိ Covid-19 ကူးစက်ရောဂါ စစ်ဆေးဂိတ်များအားလုံး ပိတ်သိမ်းလိုက်ပြီ ဖြစ်ကြောင်း စုံစမ်းသိရှိရသည်။

ဇွန်လ ၁ ရက်နေ့က လေဆိပ်ဂိတ် ၅ ခု နှင့် နယ်စပ် ဝင်/ထွက် ဂိတ်များမှ အပ ကျန်ရှိသည့် သျှမ်းပြည်တွင်းရှိ ဂိတ်များ အားလုံး ပိတ်သိမ်းလိုက်ပြီ ဖြစ်သည်။

“အခုလက်ရှိမှာတော့ လေဆိပ် နဲ့ နယ်စပ် ဂိတ်တွေမှာပဲ စစ်ဆေးရေး ဂိတ်ထားတော့တယ်။အကုန်လုံး နီးပါး ပိတ်သိမ်းလိုက်ပြီ” ဟု လူမှုရေး ဝန်ကြီး ဒေါက်တာမျိုးထွန်း ကပြောသည်။

လေဆိပ်ဂိတ် ၅ ခု ဖြစ်သော ဟဲဟိုးလေဆိပ်၊ လားရှိုးလေဆိပ်၊ ကျိုင်းတုံလေဆိပ်၊တာချီလိတ်လေဆိပ် နှင့် မိုင်းဆတ်လေဆိပ် တို့ ဆက်လက် စစ်ဆေးထားကြောင်း သိရသည်။

“မနေ့က စပြီး ပိတ်လိုက်တယ်။ တောင်ကြီးက ကျန်းမာရေး စစ်ဆေးတဲ့ ဂိတ် ၄ ဂိတ် စလုံး ပိတ်လိုက်ပြီ။” ဟု တောင်ကြီး စစ်ဆေးရေးဂိတ်မှာ စစ်ဆေးနေသည့် စေတနာ့ ဝန်ထမ်း တစ်ဦး ကပြောသည်။

နယ်စပ် ဝင်ထွက် ဂိတ်များဖြစ်သည့် နမ့်ခမ်း၊ မူဆယ်၊ လောက်ကိုင်၊ ချင်းရွှေဟော်၊ တာချီလိတ်၊ မိုင်းယု၊ ဝမ်ပုံ ရှိ ဂိတ်များတွင် ကျန်းမာရေ း စစ်ဆေးမှုများ ဆက်လက် ပြုလုပ်ထားကြောင်း သိရသည်။

Covid-19 ကူးစက်ရောဂါ မပြန့်ပွားရေး အတွက် သျှမ်းပြည်တွင်းရှိ မြို့အဝင်အထွက် တိုင်းမှာ ကျန်းမာရေး စစ်ဆေးဂိတ်များကို မေလ ၂၄ ရက် ဝန်းကျင်မှ စပြီး ဖွင့်လှစ်ကာ ဖြတ်သန်းသွားလားသူများကို ကျန်းမာရေး စစ်ဆေးပေးခဲ့ခြင်း ဖြစ်သည်။