သျှမ်းပြည်တောင်ပိုင်းတောင်ကြီးတွင် ထားရှိမည့် ကျန်းမာရေး ဓါတ်ခွဲခန်းသည် ကိုဗစ်- ၁၉ ရောဂါ အပြင် တခြား ကူးစက်နိုင်သည့် ဗိုင်းရပ်စ်များကိုလည်း ဇူလိုင်လ မှစတင်ပြီး စစ်နိုင်ကြောင်း စုံစမ်းသိရသည်။
ဓာတ်ခွဲခန်းထားရှိမည့် တောင်ကြီးမြို့ စဝ်စံထွန်း ဆေးရုံ ( Photo by SHAN)
တောင်ကြီးမြို့ စဝ်စံထွန်း ဆေးရုံတွင် ထားရှိမည့် ကျန်းမာရေး ဓါတ်ခွဲဌာန သည် ဇူလိုင်လလယ်တွင် စတင်စစ်ဆေးနိုင်ပြီး၊ တစ်ကြိမ်လျှင် ကိုဗစ်-၁၉ ဓာတ်ခွဲ နမူနာ ၉၆ ခု စစ်ဆေးနိုင်မည် ဟု စဝ်စဝ်ထွန်း ဆေးရုံကြီး ရောဂါ ရှာဖွေရေးဌာန အထူးကု ဆရာဝန်ကြီး ဒေါက်တာပိုးပိုးလင်း က ပြောသည်။
“ ဓာတ်ခွဲစစ်ဆေးနိုင်မယ့် စက်က ဇူလိုင်လ လယ်မှာစ စစ်ဆေး နိုင်ပါပြီ။ ကိုဗစ်-၁၉ ဓာတ်ခွဲနမူနာ စစ်ရင် တကြိမ်ကို ၉၆ ခု စစ်ဆေးနိုင်ပါတယ်။ ကြာချိန်က ၂နာရီကနေ ၃နာရီ ထိပါပဲ” ဟု ဒေါက်တာပိုးပိုးလင်း က ပြောသည်။
အဆိုပါ ဓာတ်ခွဲခန်းစက်ကို များသော်အားဖြင့် ကိုဗစ်-၁၉ သီးသန့်စစ်ဆေးသည့် စက်မဟုတ်ကြောင်း၊တခြား ဗိုင်းရပ်စ်များလည်း စစ်ဆေးနိုင်ကြောင်း သိရသည်။
“စက်ကတော့ ကိုဗစ် စက် မဟုတ်ဘူး PCR လုပ်မယ့်စက်ပါ။ အထင်မှားနေကြတယ် ကိုဗစ် စက်ဆိုပြီးတော့။ နိုင်ငံတကာမှာ WHO ကနေပြီးတော့ ကိုဗစ်-၁၉ ကိုစစ်ဆေးဖို့ အတွက် နိုင်ငံတကာ စံချိန်စံညွှန်း နဲ့ အညီ ရရှိထားတဲ့ စက်ဖြစ်ပါတယ်” ဟု ဒေါက်တာ ပိုးပိုးလင်း က ဆိုသည်။
လက်ရှိ တောင်ကြီး စဝ်စံထွန်းဆေးရုံတွင်ထားရှိမည့် ဓာတ်ခွဲခန်းစက်သည် အလှူရှင် လှူဒါန်းထားသည့် စက်ဖြစ်ကြောင်း၊ ထို့ပြင် အမျိုးသား ကျန်းမာရေး ဓာတ်ခွဲမှု ဆိုင်ရာ ဌာန မှ တဆင့် ကမ္ဘာကျန်းမာရေးအဖွဲ့ (WHO) ကို တောင်းထားသည့် စက်လည်း ထပ်မံ ရောက်လာမည် ဟု ဒေါက်တာပိုးပိုးလင်း က ပြောသည်။
“ ဓာတ်ခွဲခန်း စက်ရှိတော့ ကိုဗစ်-၁၉ စစ်ဆေးနိုင်တဲ့အပြင် တခြား Influenza ( ရာသီတုတ်ကွေး) တွေကိုလည်း အချိန်နဲ့ တပြေးညီ စစ်ဆေးနိုမယ်” ဟု ဒေါက်တာ ပိုးပိုးလင်း က ထပ်လောင်းပြောသည်။
ဓာတ်ခွဲခန်း စက်ကို သျှမ်းပြည် တောင်ပိုင်း တောင်ကြီးမြို့ စဝ်စံထွန်းဆေးရုံ နှင့် သျှမ်းပြည် မြောက်ပိုင်း လားရှိုး ပြည်သူ့ဆေးရုံတွင် ထားရှိရန် ပြင်ဆင်နေပြီ ဖြစ်ကြောင်းသိရသည်။
