သျှမ်းပြည်တောင်ပိုင်း တောင်ကြီးမြို့ရှိ မိုးကုတ်ဝိပသာနာ ဓမ္မရိပ်သာတွင် ပြည်တော်ပြန် (၁၀၀) ကျော် လက်ခံထားရှိပြီး၊ Facility Quarantine ကို ၇ ရက်သာ ထားမည် ဟု စုံစမ်းသိရသည်။ သိရသည်။
အဆိုပါ ပြည်တော်ပြန် အများစုသည် ကရင်ပြည်နယ် မြဝတီဘက်မှ ဝင်လာသူများ ဖြစ်ပြီး မေလ ၂၈ ရက်နေ့ထိ စုစုပေါင်း (၁၁၁) ဦး ရှိထားပြီ ဖြစ်ကြောင်း တောင်ကြီး စေတနာ့ဝန်ထမ်းများအဖွဲ့မှ ဦးဝင်းနိုင်စိုး က သျှမ်းသံတော်ဆင့်ကို ပြောသည်။
“သျှမ်းပြည်ထဲက နယ်စုံပါပဲ။ လက်ခံထားတာပါ။ Quarantine မဝင် ရသေးဘူး။ နိုင်ငံခြား တိုက်ရိုက်ပြန်တွေ ဖြစ်တဲ့အတွက် တခြားမြို့တွေမှာ မလိုလားတဲ့ ကိစ္စပေါ်မှာဆိုးလို့ ကျနော်တို့က တောင်ကြီးမှာ ထိန်းပြီးတော့ SWAB တွေ စစ်မှာပါ။ ၇ ရက် ထားပြီးမှ ပြန်လွှတ်ပါ့မယ်” ဟု ဦးဝင်းနိုင်စိုး က ပြောသည်။
ပြည်တော်ပြန်များကို သျှမ်းပြည် တောင်ပိုင်း တွင် ၂နေရာထားရှိမည်ဖြစ်ပြီး၊ ထိုနေရာများမှာ တောင်ကြီး မိုးကုတ်ဝိပသာနာ ဓမ္မရိပ်သာ နှင့် ညောင်ရွှေ တွင် ဖြစ်ကြောင်း ဦးဝင်းနိုင်စိုး က ပြောသည်။
“ခုဆို ရွှေညောင်မှာ လူ ၈၀၊ ၉၀၊ လောက်ဝင်နေပါပြီ၊ ခု ကျနော်တို့ လုပ်နေပါတယ်။ မနေ့က စဝင်တာပါ” ဟု ဦးဝင်းနိုင်စိုး ကဆိုသည်။
တောင်ကြီးမှာ ပြည်တော်ပြန် (၂၀၀၀) ကျော် ပြန်လည် ဝင်ရောက်လာမည် ဖြစ်ကြောင်း သိရှိရသည်။
လက်ရှိမှာ ထိုင်းနိုင်ငံတွင် အလုပ်လုပ်သည့် ရွှေ့ပြောင်းအလုပ်သမားများသည် မြန်မာ-ထိုင်းနယ်စပ်ဖြစ်သည့် မဲဆောက်-မြဝတီ မှ တရက်လျှင် ၁ထောင်ကျော်ဝင်လာကြောင်း စုံစမ်းသိရသည်။
မြန်မာနိုင်ငံတွင် ကိုဗစ်-၁၉ ကူးစက်သူ ၂၀၆ ဦး ရှိပြီး ၊ ပြန်လည်သက်သာလာသူ ၁၂၆ ဦး နှင့် သေဆုံးသူ ၆ ဦး ရှိကြောင်း ကျန်းမာရေးဝန်ကြီးဌာန မှ ထုတ်ပြန်ထားသည်။
