သျှမ်းပြည်မြောက်ပိုင်း ကွတ်ခိုင် နှင့် နမ့်ဖတ်ကာ ကြားရှိ နမ့်ကွတ်ကျေးရွာတွင် ယနေ့မနက်ပိုင်း ပစ်ခတ်မှု ဖြစ်ပွားရာ လက်ရှိသတင်းရေးသားချိန်အထိ တိုက်ပွဲပြင်းထန်နေဆဲ ဟု စုံစမ်းသိရသည်။
ကွတ်ခိုင်-နမ့်ဖတ်ကာ ကြားရှိ နမ့်ကွတ်ကျေးရွာဘက်တွင် မေ ၂၉ ရက် ယနေ့ မနက် ၁၀ နာရီ မှစတင်ကာ ယခုချိန်ထိ တိုက်ပွဲ ပြင်းထန် နေသေးကြောင်း ကွတ်ခိုင်ရွာသို့ စစ်ရှောင်တဉီးဖြစ်သူ ဒေါ်လွမ်းညွယ် က သျှမ်းသံတော်ဆင့်ကို ပြောသည်။
“ ခုထိ ပစ်ခတ်မှု ကြားနေသေးတယ်။ ကျမ တို့ ခု နမ့်ကွတ်ရွာက အိမ် တစ်အိမ်မှာ ခိုလှုံနေတယ်။ လမ်းမှာ ခရီးသည်ကား တွေ ကုန်တင်ကားတွေ လမ်းမှာ ပိတ်နေတယ်။ ခရီးမဆက်ပဲ ခိုလှုံနေတယ်” ဟု နမ့်ကွတ် ကျေးရွာတွင် စစ်ရှောင်နေသည့် ခရီးသည် ဒေါ်လွမ်းညွယ် က ပြောသည်။
လက်ရှိ ဖြစ်ပွားနေသည့် တိုက်ပွဲသည် မည်သည့် လက်နက်ကိုင်တပ်ဖွဲ့ များဖြစ်သည်ကို အသေးစိတ်မသိရသေးကြောင်း ဒေါ်လွမ်းညွယ်က က ပြောသည်။
“ ဘယ်အဖွဲ့ တွေ ပစ်ခတ်နေတာလည်းတော့မသိဘူး။ ကျမတို့ အခု တော့ ပိတ်မိနေတယ်။ ရှေ့တိုးမရ၊ နောက်ဆုတ်မရ ဖြစ်နေတယ်” ဟု ဒေါ်လွမ်းညွယ်က ဆိုသည်
ယခုချိန်ထိ တိုက်ပွဲဆက်လက်ပြင်းထန်နေသေးကာ ကားသမားများ၊ ခရီးသွားပြည်သူများ ပိတ်မိနေသေးကြောင်း သိရသည်။
တိုက်ပွဲကြောင့် ကွတ်ခိုင်မြို့နယ်အတွင်း လုံခြုံရေးတင်းကျပ်မှု ရှိနေကြောင်း စစ်ဆေးမှုများလည်း ရှိနေကြောင်း ကွတ်ခိုင်ဒေသခံ မိုင်းမိုင် က သျှမ်းသံတော်ဆင့်ကို ပြောပြသည်။
“ မနေ့ က စပြီး စစ်ဆေးမှုတွေ တင်းကျပ်နေတာ။ ဒီရက်ပိုင်းမှာတော့ နည်းနည်းပါးပါး စစ်ရေးလှုပ်ရှားမှုတွေ ရှိလာနိုင်တဲ့ အခြေနေတော့ ရှိနေတယ်လို့ မြင်တယ်” မိုင်းမိုင် ကဆိုသည်။
ယနေ့ ဖြစ်ပွားသည့် တိုက်ပွဲနှင့် ပတ်သက်ပြီး တအာင်း(ပလောင်) အမျိုးသားလွတ်မြောက်ရေးတပ်မတော် (TNLA) မှ ပြောရေးဆိုခွင့်ရှိသူ ဗိုလ်မှူး တာအိုက်ကျော် ကို သျှမ်းသံတော်ဆင့် က အကြိမ်ကြိမ် ဆက်သွယ်ခဲ့သော်လည်း မရရှိခဲ့ပေ။
သျှမ်းပြည် မြောက်ပိုင်း ကွတ်ခိုင်မြို့နယ် အတွင်း ယခု နှစ်ဆန်းပိုင်းတွင် မူးယစ်ဆေးဝါးနှင့် လက်နက်ခဲယမ်း ၄၁၄ ဘီလီယံကျော် ဖမ်းဆီးရမိခဲ့ သည်။
ထို့ပြင် ကွတ်ခိုင်မြို့နယ် အခြေစိုက် ကောင်းခါးပြည်သူ့စစ်သည် မြန်မာ့တပ်မတော်ထံ လက်နက်ခဲယမ်းများ အပ်နှံခဲ့သည်ဟု တပ်မတော်ပြန်ကြားရေးက ထုတ်ပြန်ထားသည်။
သျှမ်းပြည်မြောက်ပိုင်းတွင် အစိုးရတပ်မတော် နှင့် တိုင်းရင်းသား လက်နက်ကိုင် များ မကြာခဏ ပစ်ခတ်မှု ရှိသည်။
ယခု ကိုဗစ် -၁၉ ကာလအတွင်း အစိုးရ တပ်မတော်ဘက်မှ Covid-19 ကာကွယ် ထိန်းချုပ်ရေး ရန် ပစ်ခတ်မှု ရပ်ထားကြောင်းလည်း ထုတ်ပြန် ထားပါသည်။
