သျှမ်းပြည်နယ် အတွင်းရှိ ဈေးဆိုင်များ၊ စားသောက်ဆိုင်များ ကို ဇွန် ၁ရက်မှ စပြီး ပြန်လည် ဖွင့်လှစ်သွားမည် ဟု စုံစမ်းသိရသည်။

အဆိုပါ ပြန်ဖွင့်မည့် ဈေးဆိုင်များ၊ စားသောက်ဆိုင်များ အားလုံးသည် စည်းကမ်းသတ်မှတ်ချက် နှင့် အညီ ဖွင့်လှစ်ရမည် ဖြစ်ကြောင်း မေ ၂၆ရက် တွင် ကျင်းပသည့် သျှမ်းပြည်နယ် အစိုးရ အဖွဲ့ရုံး ၏ အစည်းအဝေး ဆုံးဖြတ်ချက် ဖြစ်ကြောင်း သိရသည်။

“ဇွန် ၁ ရက်နေ့ ပြန်ဖွင့်ဖို့အတွက် က ပြင်ဆင်ထားပါတယ်။ ဆိုင်တွေမှာဆို ၁၀ ခုံ ရှိရင် ၅ ခုံပဲ အရင် ခင်းထားမယ်။ ဈေးဆိုင်ခန်း ၅၀၀ရှိရင် တစ်ဝက်လောက်ပဲ ပေးဖွင့်မယ်။ နောက်တစ်ရက်မှ ကျန်တဲ့ တစ်ဝက် ပြန်ဖွင့်ရမယ်။ အလှည့်ကျ ဖွင့်ရမယ်လို့ စီစဉ်ထားပါတယ်” တောင်ကြီးမြို့နယ် စည်ပင်သာယာရေးကော်မတီ အဖွဲ့ဝင် ဦးဇော်ဝင်းထူး က သျှမ်းသံတော်ဆင့် ကိုပြောသည်။

တောင်ကြီးမြို့မဈေး ကို မနက် ၁၀ နာရီ မှ နေ့လည် ၂ နာရီထိ ဖွင့်ရန် စီစဉ်ထားကြောင်း ဦးဇော်ဝင်းထူး က ပြောသည်။

ဟိုတယ်များကို အလုပ်သမား ဝန်ကြီးဌာန၊ ပြည်နယ် စည်ပင်သာယာရေးဌာန၊ ဟိုတယ် နှင့် ခရီးသွားလာရေးအဖွဲ့တို့မှ သွားရောက်စစ်ဆေးပြီး သတ်မှတ်ချက်များနှင့် ကိုက်ညီမှု ရှိပါက ဖွင့်လှစ်ပေးသွားမှာဖြစ်ကြောင်းလည်း သိရသည်။

“ကျမ တို့ ပြန်ဖွင့်ဖို့အတွက် ပြင်ဆင်နေပါပြီ။ ဖွင့်ရင်လည်း ၂၇ ချက် နဲ့ ကိုက်ညီရမှာပါ။ ဥပမာ အိပ်ခန်းတိုင်း ပိုးသတ်ဆေးတွေ ဖျန်းရမယ်ဆိုတဲ့ဟာမျိုးပေါ့။ ကျမ တို့ဘက်က အဆင်သင့်ဖြစ်ပြီဆိုရင် ဟိုတယ် နှင့် ခရီးသွား ဆီ စာတင်ပြီး သူတို့ လာစစ်ပြီးတော့ စည်းကမ်းချက် နဲ့ ကိုက်ညီရင် ဖွင့်လို့ရပြီ” ဟု ဟိုတယ် ပိုင်ရှင် တစ်ဦးက သျှမ်းသံတော်ဆင့် ကိုပြောသည်။

သျှမ်းပြည်နယ် အစိုးရအဖွဲ့ အစည်းအဝေးမှာ လူမှုရေးဝန်ကြီး ဒေါက်တာမျိုးထွန်း က ဇွန် ၁ ရက် တွင် ထုတ်ပြန်သင့်သည့် အချက်များကို ထုတ်ပြန်ပေးသွားမည်ဖြစ်ပြီး၊ ကျန်းမာရေး နှင့် အားကစား ဝန်ကြီးဌာန၏ စည်းကမ်းချက် နှင့် အညီ လိုက်နာ လုပ်ကိုင်နိုင်သူများကို ဆိုင်ခန်း ဖွင့်လှစ်ပေးသွား မည်ဖြစ်ကြောင်း ပြောကြားသည်။

Covid-19 ကူးစက်ရောဂါ ကာကွယ်ထိန်းချုပ်နိုင်ရန်အတွက် KTV နှင့် Night Club များကို ယခင်မူလအတိုင်း ဆက်လက် ပိတ်ထားရမည်ဖြစ်သည်။

မော်တော်ယာဉ်လိုင်းများအား ယခင်ထုတ်ပြန်ထားသည့် စည်းကမ်းချက်များအတိုင်း ခရီးသည် ထက်ဝက်နှုန်း ဖြင့် ပြေးဆွဲခွင့် ပြုသွားမည် ဖြစ်ကြောင်း သိရသည်။