သျှမ်းပြည်တွင် COVID-19 စစ်ဆေးနိုင်မည့် ဓါတ်ခွဲခန်း ၂ နေရာ ထားရှိသွားမည်ဖြစ်ကြောင်း စုံစမ်းသိရှိရသည်။

အဆိုပါ ဓာတ်ခွဲခန်း နေရာများမှာ သျှမ်းပြည်တောင်ပိုင်း တောင်ကြီးမြို့ရှိ စဝ်စံထွန်းဆေးရုံ နှင့် သျှမ်းပြည်မြောက်ပိုင်း လားရှိုးပြည်သူ့ဆေးရုံတွင် ထားရှိသွားမည် ဟု သိရသည်။

“စက်ထားဖို့ နေရာတွေ ပြင်ဆင်နေတုန်း။ သူ့ သတ်မှတ်ချက် နဲ့အညီ ပြင်နေပါတယ်။ စဝ်စံထွန်းဆေးရုံမှာ ဒီနေ့ စပြင်ဆင်နေပါတယ်။ လားရှိုးကတော့ သူတို့ ကျန်းမာရေး ဌာန လုပ်နေပြီ” ဟု သျှမ်းပြည်နယ် အစိုးရအဖွဲ့ လူမှုရေးဝန်ကြီး ဒေါက်တာမျိုးထွန်း က သျှမ်းသံတော်ဆင့် ကိုပြောသည်။

ကျန်းမာရေးဝန်ထမ်းများ ဓါတ်ခွဲအဖြေ စစ်ဆေးနိုင်ရန်အတွက် စဝ်စံထွန်းဆေးရုံမှ ဆရာဝန်ကြီးများ ရန်ကုန်သို့ သင်တန်း တက်ထားပြီ ဖြစ်ပြီး လားရှိုးပြည်သူ့ဆေးရုံမှ ဆရာဝန်ကြီးများလည်း ရန်ကုန်သို့ သင်တန်းသွားတက်နေပြီ ဖြစ်ကြောင်း သိရသည်။

“သေချာကတော့ စက်က ကျန်းမာရေးဝန်ကြီးဌာနက ပေးမယ်။ ကျနော်တို့ သျှမ်းပြည်နယ်အစိုးရက ဒီစက်ထားဖို့နေရာနဲ့ စက်တင်လာဖု့ိအတွက် ကျသင်တဲ့ ငွေစရိတ်ကို ကျနော်တို့ ပေးမယ်” ဟု ဒေါက်တာ မျိုးထွန်း က ဆိုသည်။

ကိုဗစ်-၁၉ စစ်ဆေးနိုင်မည့် စက်သည် တလုံးလျှင် ကျပ်သိန်း ၁၂၆၄ ကုန်ကျမည်ဖြစ်ပြီး၊ ထိုစက်ထားသည့်နေရာ ပြုပြင်ရန် အဓိက သုံးရမည့် ပစ္စည်းများ က နည်းပညာပိုင်းဆိုင်ရာ ပစ္စည်းများဖြစ်သည့် အတွက် ကုန်ကျစရိတ်များကြောင်းလည်း ဒေါက်တာမျိုးထွန်း ကထပ်လောင်းပြောသည်။

ဒီစက်ထားတဲ့နေရာ ပြုပြင်ဖို့ အဓိက သုံးရတဲ့ ပစ္စည်းတွေက နည်းပညာပိုင်းဆိုင်ရာ ပစ္စည်းတွေ ဖြစ်တဲ့ခါကတော့ ကုန်ကျ စားရိတ်ကလည်း များနေတယ်။” လူမှုရေးဝန်ကြီး ဒေါက်တာမျိုးထွန်း ကပြောသည်။

Covid-19 စမ်းသပ်သည့် စက်ကို ပြည်ထောင်စု ကျန်းမာရေးဝန်ကြီးဌာနက ပေးမည်ဖြစ်ပြီး ဓါတ်ခွဲခန်းပြင်ဆင်ခြင်းကို သျှမ်းပြည်အစိုးရက ပြင်ဆင်ပြီး သင်တန်းတက်ထားသည့် ကျန်းမာရေးဝန်ထမ်းများလည်း ရှိထားပြီဖြစ်သည့်အတွက် စက်တပ်ဆင်ပြီးလျှင် စတင်စမ်းသပ်နိုင်ပြီဖြစ်ကြောင်း သိရသည်။