ကိုဗစ်-၁၉ ကာလ အတွင်း သျှမ်းပြည်တောင်ပိုင်း ဂေါ်ဖီထုပ် စိုက်ပျိုးသည့် တောင်သူများ အရှုံးပေါ် ကာ အခက်အခဲများဖြင့် ရင်ဆိုင်နေရကြောင်း စုံစမ်းသိရှိရသည်။
သျှမ်းပြည်တောင်ပိုင်း တွင် ဂေါ်ဖီထုပ် စိုက်ပျိုးသည့် ဧကပေါင်း ၁ သောင်းကျော်ရှိပြီး ဟဲဟိုး၊ပင်းတယ၊ ပင်လောင်းမြို့နယ်တို့တွင်အများဆုံးစိုက်ပျိုးကြကြောင်းသိရသည်။
လက်ရှိ အရှုံးပေါ်နေသည့် ဂေါ်ဖီထုပ် စိုက်ပျိုးသည့် တောင်သူများကို သျှမ်းပြည်အစိုးရနှင့် ကမ္ဘောဇ ဘဏ် တို့ ပူးပေါင်းကာ ကူညီဆောင်ရွက်ပေးမှုများပြုလုပ်ပေးနေကြောင်းလည်း သျှမ်းပြည် စိုက်ပျိုးရေး ဌာန ပြည်နယ် ဦးစီးမှူး ဦးတင်ဦး က သျှမ်းသံတော်ဆင့် သို့ ပြောသည်။
“ကျေးလက် ဦးစီးဌာန အနေနဲ့လည်း အခင်းရှင်တွေနဲ့ ပေါင်းပြီး ရပ်ကွက်နေ ပြည်သူတွေ ပေးတယ်။ ပရဟိတ ကျောင်းတွေဖြန့်ဝေပါတယ်။ တပ်မတော်ကလည်း တောင်သူတွေ စိုက်ထားတဲ့ အခင်း အလကားမဖြစ်အောင် တိုင်းမိသားစု တွေကို ဝေပေးပါတယ် ” ဟု ဦးတင်ဦး က ဆိုသည်။
အရှုံးပေါ်နေသည့် ဂေါ်ဖီထုပ်စိုက်တောင်သူများထံကို သျှမ်းပြည် အစိုးရ က ကွင်းဆင်းပြီး ကူညီဆောင်ရွက်မှုများပြုလုပ်ကြောင်း သိရသည်။
ထိုပြင် ပင်လောင်းမြို့နယ် နောင်တရားမြို့ဘက်ကို ကမ္ဘောဇ ဘဏ်က ဂေါ်ဖီထုပ် ၃ သိန်းကျော် ဝယ်ယူပြီး ရန်ကုန်၊ မန္တလေး ၊ မြင်းခြံ၊ ရမည်းသင်း၊ မော်လမြိုင်၊ အေးသာယာ သို့ လှူဒါန်းသွားမည်ဖြစ်ကြောင်း သျှမ်းပြည်နယ် ပြည်သူလူထု စားနပ်ရိက္ခာထောက်ပံ့ရေးကော်မတီ ဥက္ကဌအဖြစ် တာဝန်ယူထားသည့် ကိုတူးငယ် ကပြောသည်။
“ KBZ နာယက ဦးအောင်ကိုဝင်း က ရောင်းဖို့ ခက်ခဲနေတဲ့ ဂေါ်ဖီထုပ် တွေကို ဝယ်ယူပြီး ပြည်သူတွေကို လှူဒါန်းသွားမှာ ဖြစ်ပါတယ်။တင်ပို့သွားဖို့အတွက်လည်း ကားခ အပါအဝင် ကုန်ကျခံထားပါတယ်” ကိုတူးငယ် က ပြောသည်။
သျှမ်ပြည်တောင်ပိုင်းသည် စိုက်ပျိုးရေးကို သာ အဓိက ထားအားကိုးနေရသည့် ဒေသဖြစ်သကဲ့သို့ ထွက်ရှိလာသည့် သီးနှံများကို မြန်မာပြည်တဝှမ်းသို့တင်ပို့ ရောင်းချနေသည့် ပင်မ စိုက်ပျိုးရေး ဒေသတခုလည်း ဖြစ်သည်။
လက်ရှိ မြန်မာတဝှမ်းတွင် ရင်ဆိုင်နေရသည့် ကိုဗစ်-၁၉ ကြောင့် လမ်းပန်းဆက်သွယ်ရေး ခက်ခဲလာကာ သျှမ်းပြည်တောင်းပိုင်း တွင် စိုက်ပျိုးနေသည့် သီးနှံများ ပြည်မကြီးသို့ပို့ဆောင်ရန် ခက်ခဲလာပြီး တောင်သူများ အရှုံးများဖြင့် ရင်ဆိုင်နေရသည်။
တောင်သူများအနေဖြင့် သီးနှံထွက်ကုန်များ ပြည်မကြီးသို့အလွယ်တကူ တင်ပို့ပြီး ရောင်းချနိုင်ရန် အတွက် သက်ဆိုင်ရာ အာဏာပိုင်များ စီမံပေးရန်လည်း တောင်းဆိုလိုက်သည်။
Leave a Comments