ယနေ့ (မေ ၂၁ ) တွင် ကျရောက်သည့် (၆၂) ကြိမ်မြောက် သျှမ်းပြည်တော်လှန်ရေးနေ့ ကို ကိုဗစ်-၁၉ ကြောင့် သျှမ်းတပ်ဖွဲ့ ၂ ဖွဲ့သည် သက်ဆိုင်ရာ ဌာနချုပ်နေရာတွင် အမှတ်တရ အနေဖြင့် အကျဉ်း ပြုလုပ်ခဲ့သည်။
သျှမ်းပြည်ဖွံ့ဖြိုးတိုးတက်ရေးပါတီ/သျှမ်းပြည်တပ်မတော် (SSPP/SSA) ဝမ်ဟိုင်းဌာနချုပ်မှာ ကျင်းပပြီး သျှမ်းပြည်ပြန်လည်ထူထောင်ရေးကောင်စီ/သျှမ်းပြည်တပ်မတော် ( RCSS/SSA) သည် ဌာနချုပ်ရှိရာ လွယ်တိုင်းလျှန်း မှာ ကျင်းပ ပြုလုပ်ခဲ့သည်။
“Covid-19 ရောဂါကြောင့် မလို့ ဒီနှစ်တော့ အရင်နှစ်ကလိုမျိုး ကြီးကျယ်ခမ်းနားစွာ မပြုလုပ်ဘူး။ အမှတ်တရ အနေနဲ့ ပဲ ပြုလုပ်ခဲ့တယ်။” ဟု RCSS/SSA ၏ ပြောရေးဆိုခွင့်ရှိသူ ဒုတိယ ဗိုလ်မှူးကြီး အုမ်ခေး က သျှမ်းသံတော်ဆင့် ကိုပြောသည်။
အလားတူ သျှမ်းပြည်မြောက်ပိုင်း SSPP/SSA တွင်လည်း ဝမ်ဟိုင်း ဌာနာချုပ်ရှိရာ နေရာတွင် တာဝန်ရှိသူများမှ သျှမ်းပြည်တော်လှန်ရေး သမိုင်းကြောင်း ကို ဟောပြောခဲ့သည်။
“ဒီနှစ် တော့ ရောဂါကြောင့် ကြီးကြီးကျယ်ကျယ် မလုပ်ဘူး။ အမှတ်တရ အနေနဲ့ ပဲ လုပ်တာ။ အခမ်းအနား တက်ရောက်တဲ့ ပြည်သူတွေ တပ်သားတွေကို နှာခေါင်းစည်းတွေ ပေးဝေပြီး လက်ဆေးခိုင်းတယ်။ ၅ ပေ အကွာ မှာ ထိုင်ခိုင်းတယ်။” ဟု ဝမ်ဟိုင်း လူငယ် စိုင်းလျှန်း ကသျှမ်းသံတော်ဆင့် ကိုပြောသည်။
RCSS/SSA တပ်ဖွဲ့သည်လည်း သျှမ်းပြည်သူများ အတွက် မေ့မရနိုင်သော တစ်နေ့ ဖြစ်ပေမယ့် လူစုလူဝေး မဖြစ်အောင် ရောဂါကို ကြိုတင် ကာကွယ်သည့် အနေဖြင့် သံယာတော်များ ဆွမ်းကပ်ခြင်း ၊ လွမ်းသုပန်းခွေချခြင်း နှင့် သူရဲကောင်းတို့ကို ဆုချီးမြင့်ခြင်း စသည့် အမှတ်တရ အနေဖြင့် ကျင်းပခဲ့ကြောင်း ဒုတိယ ဗိုလ်မှူးကြီး အုမ်ခေး ကပြောသည်။
၁၉၅၈ ခုနစ်မှ စတင်ခဲ့သည့် သျှမ်းပြည် တော်လှန်ရေး ဖြစ်ပေါ်လာရသည့် အကြောင်းရင်းများမှာ
၁။ ပြည်ထောင်စု အစိုးရ က သျှမ်းပြည် အမျိုးသား၏ အခွင့်အရေးကို မတရားနှိပ်ကွပ်ခြင်း။
၂။ ဗမာပြည်ခေါင်းဆောင်များက ၁၉၄၇ ခုနစ် ပင်လုံ ကတိ ကဝတ်ကို မလိုက်နာ၍ တဖက်စောင်းလုပ်ဆောင်လာခြင်း။
၃။ဗမာ့ တပ်မတော်ဖက် ကလည်း မဟာဗမာ လူမျိုးကြီး ဝါဒ ကို ကျင့်သုံးလာခြင်း စသည့် အကြောင်းများကြောင်းပေါ်ပေါက်လာရခြင်းဖြစ်သည်။
သျှမ်းပြည်အမျိုုးသားများက ကိုယ့်တိုင်းပြည်၊ ကိုယ့်ရသင့် ရထိုက်သည့်အခွင့်အရေးများနှင့် ကိုယ့် ဘဝတည်မြဲအတွက် ကာကွယ်စောင့်ရှောက်နိုင်ရန် ရရာ လက်နက်စွဲကိုင်ပြီး စစ်တပ်ဖွဲ့စည်းကာ စတင်တော်လှန် သည့်နေ့တနေ့ဖြစ်သည်။
၁၉၅၈ ခုနှစ် မေလ ၂၁ ရက်နေ့ကို သျှမ်းပြည်သားမျိုးချစ်များနှင့် သျှမ်းပြည်တော်လှန်ရေးခေါင်းဆောင်များက သျှမ်းပြည်တော်လှန်ရေးနေ့ ( ကိုယ့်ရသင့်ရထိုက်သော အခွင့်အရေးများကို ပြည်လည်ရရှိရေးအတွက် တော်လှန်ပုန်ကန်ရန် စစ်တပ်တည်ထောင်ဖွဲ့စည်းသောနေ့) ဟု ဆုံးဖြတ်သတ်မှတ်မခဲ့သည်။
ထို့ပြင် နောင်လာနောက်သား သျှမ်းပြည်မျိုးဆက်သစ်များ သတိရဂုဏ်ယူပြီး ဆက်လက်တာဝန်ထမ်းဆောင်သွားနိုင်ရန် နှစ်စဉ်နှစ်တိုင်း သျှမ်းပြည်တော်လှန်ရေးနေ့ ဂုဏ်ပြုကျင်းပခဲ့သည်။
