သျှမ်းပြည် မြောက်ပိုင်း လားရှိုးမြို့တွင် ဓားခုတ်ဒဏ်ရာဖြင့် သေဆုံးနေသည့် အသက်၁၈နှစ် အရွယ် အမျိုးသား တဦး အလောင်းကို တွေ့ရှိကြောင်း သတင်းရရှိသည်။

  မေလ ၁၇ ရက် ယမန်နေ့ ညနေပိုင်းက လားရှိုးမြို့ ဟူးမွန်ဆည်နှင့် ကောက်ကွေးဆည်ကြားရှိ ချုံထဲတွင် အသက် ၁၈ နှစ် အရွယ် ရှိ အမျိုးသားတဦး ဦးခေါင်းတွင် ဓားခုတ်ဒဏ်ရာဖြင့် သေဆုံးနေသည်ကိုတွေ့ရကြောင်း၊ မည်သည့် အကြောင်းကြောင့် သေဆုံးနေသည် ကို သက်ဆိုင်ရာ က စုံစမ်းနေဆဲ ဖြစ်ကြောင်း  လားရှိုးလူငယ်များ လူမှုကူညီရေး အဖွဲ့မှ စိုင်းဝသုန်ထွန်း က သျှမ်းသံတော်ဆင့် ကို ပြောသည်။

“ အစကတော့ ရေနစ်သေဆုံးဆိုပြီး သတင်းပို့လာတယ်။ သေချာ သွားကြည့်တော့ ရေနစ်တာ မဟုတ်ဘဲ ဦးခေါင်း ဓားခုတ်ဒဏ်ရာနဲ့ သေနေတာ ကိုတွေ့ရတယ်။ ဘာကြောင့်ဆိုတာတော့ ကျနော်တို့သေချာ မသိရသေးဘူး” ဟု စိုင်းဝသုန်ထွန်းက ဆိုသည်။

ထိုလူငယ် သေဆုံးမှု နှင့် ပတ်သက်ပြီး လားရှိုးမြို့မရဲစခန်းကို သျှမ်းသံတော်ဆင့် မှ ဆက်သွယ်မေးမြန်းရာ ပြန်လည် ဖြေကြားခြင်းမရှိခဲ့ပေ။

လားရှိုးမြို့ ရှိ ဟူးမွန်ဆည် နှင့် ကောက်ကွေးဆည် ကို လူငယ်များ လာရောက်လည်ပတ်  သောက်စားကြပြီး  အချင်းများ ရန်ဖြစ်စကားများရာမှ ဓားခုတ်သည့် အဆင့် ဖြစ်သွားသည် ဟုလည်း လားရှိုး ဒေသခံများ ပြောပြချက် အရ သိရသည်။

“ လူငယ်တွေ အချင်းချင်း စကားများရန်ဖြစ်ရာကနေ ဓားနဲ့ခုတ်တယ်လို့လည်းကြားတယ်။ နောက် အဲ့နေရာက လူတွေ သိပ်မသွားကြဘူး။ သေချာ ကတော့ မသိရသေးဘူး” ဟု လားရှိုး ဒေသခံ ကိုစိုင်းထွန်း က ဆိုသည်။

ထို့ပြင် လွန်ခဲ့သည့် ရက်ပိုင်းကလည်း လားရှိုးမြို့နယ် အတွင်း ပုပ်ပွနေသည့် ရုပ်အလောင်း ၂လောင်းကို သွားရောက် သယ်ဆောင်ပြီး လားရှိုးမြို့ပြည်သူ့ဆေးရုံ ရင်ခွဲရုံသို့ ပို့ဆောင်ပေးခဲ့ကြောင်းလည်း လားရှိုး လူငယ်များ လူမှုကူညီရေး အဖွဲ့ က ပြောသည်။

မေလ ၁၁ ရက်က  လားရှိုးမြို့ နယ် မယ်ဟန်ကျေးရွာ အုပ်စု နောင်ယုံးကျေးရွာ တွင် ပုပ်ပွ အလောင်း တလောင်းနှင့်   မေ ၁၃ ရက်က အမည်မသိ ပုပ်ပွ အလောင်း တလောင်းတို့ဖြစ်ကြောင်း စိုင်းဝသုန်ထွန်းက ပြောသည်။

ယခုရက်ပိုင်း လားရှိုးမြို့နယ် အတွင်း လုယက်မှု၊ ဆိုးခိုးမှုများ များပြားလာပြီး ဓားခုတ်မှုလည်း များလာကြောင်း သိရသည်။