တာချီလိတ်တွင် ပိုင်ရှင်မဲ့ လက်နက်နှင့် မူးယစ်ဆေးများ သိမ်းဆည်းရမိ

သျှမ်းပြည်အရှေ့ပိုင်း တာချီလိတ်မြို့နယ် အတွင်း ပိုင်ရှင်မဲ့ လက်နက်နှင့် မူးယစ်ဆေး ကျပ်သိန်း ၁၃၀၀ ကျော် သိမ်းဆည်းရမိကြောင်း သတင်းရရှိသည်။

မေလ ၁၇ ရက် မနက် ၇ နာရီ ခွဲခန့်က တာချီလိတ်မြို့ မိုင်းဖုန်း(က) အုပ်စု၊ လွန်းကျိုင်း ကျေးရွာရှိ စိုင်းလှရွှေ နေအိမ်အား တာ၀န်ရှိသူများက ဝင်ရောက် ရှာဖွေရာ ကားဂိုဒေါင်းတွင် AK-47 တလက်၊ ကျည်အိမ် ၉ ခု၊ ကျည်တောင့် ၅၇ တောင့်၊ Lugar ၉ မမကျည် ၂၈ တောင့်၊ WYစာတမ်းပါ ပန်းရောင် စိတ်ကြွဆေးပြား (၇၂၀၀၀)ပြား၊ အိုက်စ် ၁ ကီလိုဂရမ် ( စုစုပေါင်း မူးယစ်ဆေးဝါး တန်ဖိုး ၁၃၃၀ ခန့်) သိမ်းဆည်းရမိကြောင်း မူးယစ်ရဲတပ်ဖွဲ့ထုတ်ပြန်ချက် အရ သိရသည်။

ထို့ပြင် ဘေးခြံကို ဆက်လက် ရှာဖွေရာ လုံးချင်းအိမ်အတွင်း မူးယစ်ဆေးဝါး ချက်လုပ်ရာတွင် အသုံးပြုသည့် ပစ္စည်းများ၊ မျောက်တံဆိပ်ပါ အနံ့ ဆေးရည် ၁၀ လုံး၊ စတီးမွှေစက် အသေး ၄ လုံး၊ ဖန်ပေါင်းချောင်တလုံး၊ ကြွေကတော့ တလုံး၊ ဇကာ ၃ ခု၊ ပါကင်ထုတ်စက် ၊ စတီးဇလုံ၊ အခြောက် ခံ ဗန်း၊ Star Brand အပြာရောင် အရောင်တင်မှုန့်၊ Food Additives အရောင်တင်မှုန့် တို့ကို ထပ်မံသိမ်းဆည်းရမိကြောင်း သိရသည်။

အဆိုပါ သိမ်းဆည်းရမိသည့် လက်နက်၊ ခဲယမ်းများ မူးယစ်ဆေးဝါးများနှင့် မူးယစ်ဆေးဝါး ချက် လုပ်ရာတွင် အသုံးပြုသည့် ဆက်စပ်ပစ္စည်းများအား တာချီလိတ်မြို့မရဲစခန်းသို့လွှဲပြောင်းအပ်နှံပြီး တရားခံများကို ရှာဖွေစုံစမ်းနေဆဲဟု သိရသည်။