သျှမ်းပြည် မြောက်ပိုင်း မူဆယ်မြို့ သို့ရောက်ရှိနေသည့် တရုတ် ပြည်တော်ပြန် တထောင်နီးပါးသည် အခက်အခဲများ ရင်ဆိုင်နေရကြောင်း စုံစမ်းသိရသည်။

မြန်မာ-တရုတ် နယ်စပ်မူဆယ်မြို့ရှိ နန်းတော်ဂိတ်မှတဆင့် တရုတ်ပြည်တော်ပြန်များ သည် နေ့စဉ် ပြန်လည်ဝင်ရောက်လာပြီး၊ လားရှိုးမှတဆင့် ပြည်တော်ပြန်များကို သက်ဆိုင်ရာ ဒေသ အသီးသီးသို့ ပြန်လည် လွှဲပြောင်းပေးကြောင်း သိရသည်။

နေ့စဉ် ဝင်ရောက်လာသည့် ပြည်တော်ပြန်များ တနေ့ထက် တနေ့ပိုများပြား လာသဖြင့်စီစဉ်ထား ပေးသည့်နေရာထိုင်ခင်းများတွင်ပြည့်နှက်နေသည်သာမက စားဝတ်နေရေး အတွက် လည်း အခက်အခဲရင်ဆိုင်နေရသည် ဟု မူဆယ်မြို့ရောက် ပြန်တော်ပြန်များက ပြောသည်။

တရုတ်ပြည်တော်ပြန်များသည် သက်ဆိုင်ရာ၏ ညွှန်ကြားချက်ဖြင့် သာ နေထိုင်ရပြီး၊ မိမိသွားလိုသည့် ခရီးကိုလည်း သက်ဆိုင်ရာများကိုယ်တိုင် စီမံပေးကြောင်း ပြည်တော်ပြန် တဦးဖြစ်သည့် ကိုရန်စိုး က သျှမ်းသံတော်ဆင့် သို့ပြောသည်။

“ကျနော်တို့ အခု ဒီမှာနေနေတာ ၃ရက်ရှိပြီ။ ဒီမှာက လူအရမ်းများတယ်။ အလှူရှင်တွေကလည်း မနက်စာလောက်ပဲကျွေးနိုင်မယ်။ ကျနော်တို့ ဘာသာ ဝယ်စားရတယ်။ ငွေလည်း မကျန်တော့ဘူး” ဟု ကိုရန်စိုးက ဆိုသည်။

ပြည်တော်ပြန် အများစုသည် တရုတ်နိုင်ငံ တွင် ကြံခုတ်သည့် လုပ်ငန်းကို လုပ်ကိုင်ရပြီး၊ ကိုဗစ်-၁၉ ကာလကြောင့် လစာအနည်းငယ်သာရရှိလာကြသဖြင့် ငွေကြေး ကုန်လုနီးပါး ဖြစ်နေကြောင်း၊ မိမိနေရပ်သို့အမြန်ဆုံးပြန်ချင်ကြောင်း ကိုရန်စိုးက ပြောသည်။

“ ဒီမှာ ဆက်နေရင်ငွေကလည်း မကျန်တော့ဘူး။ ကားခလည်း ကိုယ့်ဘာသာကိုယ်ပေးရမယ်ဆိုတော့ ချန်ထားရတယ်” ဟု ကိုရန်စိုးက ပြောသည်။

လက်ရှိ တွင်ထမင်း တနပ်လျှင် ၁၅၀၀ ကျပ် ၊ ၂၀၀၀ ကျပ် ဝန်းကျင်ဝယ်စားနေရကြောင်း၊ ကလေးများနှင့် ကိုယ်ဝန်သည် အမျိုးသမီးများလည်းရှိနေသည့် အတွက် နေထိုင်မှု သည် အရမ်းခက်ခဲနေကြောင်း၊ နေရပ်ကို အမြန်ပို့ပေးစေချင်သည် ဟုလည်း ပြည်တော်ပြန် မဇာခြည် က ပြောသည်။

“ အခုက လူတွေ လည်း များ၊ ကိုယ်ဝန်သည်ရော ကလေးတွေရောရှိတော့ နေရတာ အရမ်းခက်တယ်။ နောက် အိပ်ဖို့ကလည်း ဖြစ်သလို အိပ်ရတော့ အဆင်မပြေဘူး။ အားလုံးရော ထားတာ” ဟု မြင်းခြံ ဒေသမှ တရုတ်ပြည်သို့ အလုပ်လာလုပ်သည့် မဇာခြည် က ဆိုသည်။

အဆိုပါ ပြည်တော်ပြန်များကို သက်ဆိုင်ရာမှ ကျန်းမာရေး စစ်ဆေးမှုများ၊ အလှူရှင်များမှ အစားအသောက်များ လှူဒါန်းပေးကြောင်းလည်း မူဆယ်မြို့နယ် အုပ်ချုပ်ရေးမှူး ဦးသူရိန် က သျှမ်းသံတော်ဆင့် ကို ပြောသည်။

သို့သော် ပြည်တော်ပြန်များပြောပြချက် အရ တရုတ်ပြည်တော်ပြန်များသည် လူဦးရေ များမှုကြောင့် မလောက်ငှကြောင်း၊ကျန်းမာရေး စစ်ဆေးမှုများလည်း လာရောက်ပြုလုပ်ပေးခြင်းမရှိကြောင်းလည်း စုံစမ်းသိရသည်။

“ ကျနော်တို့က ယူနန်ပြည်ထဲ ကနေ လာ တယ်။ ဒီမှာ နေတာ ၃ရက်ရှိပြီ ကျန်းမာရေး လာစစ်တာတွေ မရှိဘူး။ ဖြစ်သလို ထားထားတယ်။ အဆင်တော့မပြေဘူး” ဟု ဧရာဝတီ တိုင်းသို့ပြန်မည့် ပြည်တော်ပြန် ကိုစိုးမင်းက သျှမ်းသံတော်ဆင့် သို့ ပြောသည်။

မြန်မာ-တရုတ် နယ်စပ် မူဆယ်မြို့ရှိ နန်းတော် (အလယ်ပေါက်ဂိတ်) သို့ပြန်လာသည့် ပြည်တော်ပြန်များသည် တရက်လျှင် ၅၀၀ရှိပြီး၊ ဧပြီ ၃ရက် မှ မေ ၁၁ရက်ထိ ပြည်တော်ပြန် ဦးရေ ၁သောင်း ဝန်းကျင်ရှိကြောင်း သိရသည်။

လက်ရှိ မူဆယ်မြို့ တွင် ရောက်ရှိနေသည့် ပြည်တော်ပြန်များသည် မိမိအစီစဉ်ဖြင့် ပြန်ချင်ကြကြောင်း သိရသည်။