သျှမ်းပြည်အစိုးရအဖွဲ့ မှ ဦးဆောင်ပြီး Mask တပ်ခြင်း ယဉ်ကျေးမှု ဖြစ်ပေါ်စေရန်အတွက် Mask Campaign (နှာခေါင်းစည်း) တပ်ဆင်ခြင်း လှုပ်ရှားမှု ပြုလုပ်ခဲ့ကြောင်း သတင်းရရှိသည်။
အဆိုပါ Mask Campaign ကို မေလ ၇ ရက် ယနေ့ မနက် ၇ နာရီမှာ သျှမ်းပြည်တောင်ပိုင်းရှိ မြို့နယ် အားလုံး တစ်ပြိုင်နက်တည်း ပြုလုပ်ခဲ့သည်။
“ mask ယဉ်ကျေးမှု ဖြစ်ပေါ်ဖို့ ပါ။ ကျနော်တို့ မြို့ပြတွေမှာ အများဆုံး ကူးစက်နိုင်မှု ဖြစ်နိုင်ချေများတယ်။ မြို့ပြမှာ လူတန်းစားပေါင်းစုံတယ်။ ဈေးလည်းစုံတယ်။ အလုပ်သမားလည်း စုံတယ်” ဟု သျှမ်းပြည်အစိုးရ ပြောခွင့်ရ ပုဂ္ဂိုလ် စီမံကိန်း နှင့် ဘဏ္ဍရေးဝန်ကြီး ဦးစိုးညွန့်လွင် ကပြောသည်။
မြို့ ပြတွင် လူမျိုးစုံသည့် အတွက် mask ယဉ်ကျေးမှုကို ကိုဗစ် -၁၉ ကာလ သာမက ကိုဗစ်အလွန်ကာလတွင်လည်း ထို ယဉ်ကျေးမှုကို စာသင်ကျောင်းများ၊ အလုပ်ရုံများနှင့် စက်ရုံများတွင် ဆက်လက်တည်ဆောက်သွားရန် ရည်ရွယ်သည့် အနေဖြင့် ပြုလုပ်ခြင်းဖြစ်သည် ဟု ဦးစိုးညွန့်လွင် က ပြောသည်။
ယနေ့ ပြုလုပ်သည့် Mask Campaign ကို ပျံကျဈေးနေရာများမှာ အဓိက ပြုလုပ်သွားသည်ကို တွေ့မြင်ရသည်။
“မျက်နှာဖုံးက တစ်ခါတည်းပဲ ပေးနိုင်တာပါ။ ကျန်းမာရေး ပညာကို အဓိက ပေးချင်တာပါ။ မျက်နှာဖုံးတပ်ဆင်သင့်တယ်။ လက်ဆေးသင့်တယ်။ မျက်နှာဖုံး တပ်ထားရင်လည်း ၃ ပေလောက် နေပေးပါလို့ အဓိက ပညာပေးချင်တာပါ” ဟု သျှမ်းပြည်နယ် ဝန်ကြီးချုပ် ဒေါက်တာလင်းထွဋ် က မီဒီယာများကို ဖြေကြားသည်။
လူသွားလူလာများသည့် ဈေးများတွင် ဈေးသည်များအတွက် Mask Campaign လုပ်ပေးသည့်အပေါ် ကောင်းမွန်သည့် ရည်ရွယ်ချက်ရှိသော်လည်း လိုအပ်ချက် အများကြီးရှိသေးကြောင်း၊ စီမံခန့်ခွဲမှုပိုင်း အားနည်းသည်ကိုတွေ့မြင်ရကြောင်းလည်း တောင်ကြီးမြို့ Fight Covid-19 volunteer groupက နန်းခင်ဘုန်းသွယ် က သျှမ်းသံတော်ဆင့် သို့ပြောသည်။
“ Mask ဝေတဲ့နေရာမှာ Volunteerတွေကိုလည်း ပူးပေါင်းပေးဖို့ဖိတ်ခေါ်ထားပေမယ့် စီမံခန့်ခွဲမှုအပိုင်းအားနည်းတာတွေ့ရတယ်။ လူတွေစုပြုံသွားပြီး ဈေးသွားဈေးလာတွေနဲ့မသင့်တော်ဘူး။ ကြိုတင် တာဝန်စနစ်တကျခွဲထားပေးပြီးဝေခိုင်းလိုက်ရင် လူလည်း မအုံတော့ဘူး ထိရောက်မှုလဲရှိမယ်” ဟု နန်းခင်ဘုန်းသွယ် က ဆိုသည်။
ယနေ့ မီးပုံးပျံကွင်း ရှေ့ ဘက်ခြမ်းတွင် သျှမ်းပြည် အစိုးရက ဈေးသည်တွေအတွက် Mask များယူလာသော်လည်း တကယ်ပေးသည့် အချိန်မှာ လာကူဝေပေးသည့် volunteerတွေလက်ထဲလည်း လုံလုံလောက်လောက်မရကြောင်း၊ ဝတ်စုံဆင်တူနှင့် တချို့လူများသည် ဝေရမည့် Mask များကို အိပ်ထဲထည့်သွားသည်ကိုတွေ့ရကြောင်း နန်းခင်ဘုန်းသွယ်က ပြောသည်။
“ လူအင်အားပဲများနေပြီး ဈေးသည်အယောက်စေ့အောင် မပေးနိုင်တာတွေ့ရပါတယ်။ နောက်များမှာ ထပ်လုပ်မယ်ဆိုရင် စနစ်တကျနဲ့ ပစ္စည်းရော လူအင်အားရော waste မဖြစ်ရအောင် စီမံနိုင်ရင်တော့ ကောင်းပါတယ်” ဟု နန်းခင်ဘုန်းသွယ် က ပြောသည်။
ကိုဗစ်-၁၉ ရောဂါ ပြန့်ပွားမှု မဖြစ်အောင် Mask Campaign ကို သျှမ်းပြည် အရှေ့ပိုင်း နှင့် မြောက်ပိုင်း မှာလည်း ပြုလုပ်သွားရန် ရှိကြောင်း သိရသည်။ တစ်ပတ်တစ်ကြိမ် တစ်လ ပြုလုပ်သွားရန် အစီစဉ် ရှိကြောင်း သိရသည်။
ယနေ့ သျှမ်းပြည် အစိုးရ Mask Shan Campaign (မျက်နှာဖုံး၊ နှာခေါင်းစည်း) တပ် လှုပ်ရှားမှု နှင့် ပတ်သက်ပြီး ဝေဖန်သုံးသပ်မှု ရှိနေသည် ကို လူမှုကွန်ရက် စာမျက်နှာပေါ်တွင် တွေ့မြင်ရသည်။
တချို့မှာ သျှမ်းပြည် အစိုးရကိုယ်တိုင် ထုတ်ပြန်သည့် လူစု၊ လူဝေး မနေကြရန်၊ ၅ဦးထက် မပိုရ စသည့် အချက်ကို အစိုးရ ကိုယ်တိုင် ချိုးဖောက်နေသည် ဟုလည်း ထောက်ပြ ပြောဆို ကြသည်။