မိုင်းလား အထူးဒေသ-၄ နမ့်ပန်းဒေသ တွင် Quarantine ဝင်ပြီးသူ ၅၅၀ကျော် ကို ယနေ့ တောင်ကြီးသို့ ပို့ဆောင်ပေးကြောင်း သတင်းရရှိသည်။

အဆိုပါ ၅၅၄ ဦး သည် ယနေ့ မနက် ၉ နာရီတွင် မိုင်းလား အထူးဒေသ-၄ မှ တဆင့် သျှမ်းပြည် အရှေ့ပိုင်း မိုင်းယုသို့ ဝင်လာကြောင်း၊ ထိုမှ တဆင့် မိုင်းယောင်း- ကျိုင်းတုံ-တောင်ကြီးသို့ဆက်လက်ပို့ဆောင်သွားမည် ဖြစ်ကြောင်း မိုင်းယောင်း ဒေသခံ ကားသမားများထံမှ သိရသည်။

“ ကျနော်တို့မိုင်းယောင်းက ကား ၂၃ စီး၊ မိုင်းယုကို အရင်သွားကြိုမယ်။ နောက် မိုင်းယောင်း၊ ကျိုင်းတုံ၊ တောင်ကြီး ဆက်ပြီး ပို့ဆောင်သွားမယ်” ဟု မိုင်းယောင်း ကားသမား စိုင်းတစ်ကျောက် သျှမ်းသံတော်ဆင့် သို့ ပြောသည်။

ထို ပြည်တော်ပြန်များသည် Quarantine ဝင်ပြီးသူများဖြစ်ပြီး၊ ထိုသူများကို သွားရောက်မကြိုခင် ကားကို ဆေးဖြန်းပြီး နေပူထဲတွင် တရက်ထားရကြောင်း လည်း စိုင်းတစ်ကျောက် က ပြောသည်။

“ သက်ဆိုင်ရာက အကူအညီတောင်းလို့ ပါ။ ကျနော်တို့သွားတဲ့လမ်းတလျှောက်မှာ တော့ ဘယ်ဆိုင်မှ ဝင်မနားဘူး။ တောင်ကြီးကိုပဲတန်းသွားမယ်” ဟု ပြည်တော်ပြန်များကို လိုက်ပို့သည့် စိုင်းတစ်ကျောက် က ဆိုသည်။

ထိုပြန်တော်ပြန်များတွင် ရခိုင်ပြည်နယ် မှ ရွှေ့ပြောင်းအလုပ်သမားများပိုများပြီး၊ တခြားပြည်နယ်နှင့်တိုင်းကို တောင်ကြီးမှ တဆင့် သက်ဆိုင်ရာက စီစဉ်ပေးသည် ဟုလည်း သိရသည်။

“ မိုင်းလားက နေ ကျိုင်းတုံ လာတယ်။ ကျိုင်းတုံကနေ ပြီးတော့ က တောင်ကြီးကို သွားဖို့ ကားတွေစီစဉ်ပေးတယ်” ဟု ကျိုင်းတုံမြို့ COVID-19ကာကွယ်တားဆီး ထိန်းချုပ်ရေး ကော်မတီ အဖွဲ့ဝင် စိုင်းဟွမ်နွဲ့က သျှမ်းသံတော်ဆင့် သို့ပြောသည်။

မိုင်းလားမြို့ မှ တဆင့် ကျိုင်းတုံမြို့သို့ ဝင်လာသည့် ပြည်တော်ပြန် များသည် ဧပြီ ၂၈ ရက်တွင် ၂၇၇ ဦး၊ မေ ၁ရက်တွင် ၅၆၆ဦး နှင့် မေ ၃ရက်နေ့တွင် ၃၆၈ ဦး ရှိကြောင်းစိုင်းဟွမ်နွဲ့ က ပြောသည်။

“ ပြည်တော်ပြန် တွေ အများဆုံးက ရခိုင်ပြည်က များပါတယ်” ဟု စိုင်းဟွမ်နွဲ့ က ဆိုသည်။

ထိုပြည်တော်ပြန်များသည် တရုတ်ပြည်သို့ သွားရောက် အလုပ်လုပ်ပြီး မိုင်းလား အထူးဒေသ-၄သို့ပြန်ဝင်လာသည့် သူများဖြစ်ကြောင်း သိရသည်။

မိုင်းလား အထူးဒေသ -၄ မှ ပြန်လာသည့် သူများကို တောင်ကြီးမှ တဆင့် မန္တလေးတိုင်းဒေသကြီး အစိုးရထံ တာဝန်လွှဲပြောင်းပေးမည် ဖြစ်ကြောင်းလည်း သျှမ်းပြည် အစိုးရ အဖွဲ့ဝင် စီမံကိန်းနှင့် ဘဏ္ဍရေး ဝန်ကြီး ဦးစိုးညွှန့်လွင် ၏ လူမှုကွန်ရက် စာမျက်နှာတွင်ရေးသားထားသည်။

ထိုပို့ဆောင်မည့် လမ်းကြောင်းတလျောက်တွင် မိုင်းယောင်း ဒေသခံများမှ နေ့လည်စာထမင်းလှူဒါန်းပြီး၊ မိုင်းပျဉ်း ဒေသခံများက ညနေစာ လှူဒါန်းသွားမည်ဖြစ်ကြောင်းသိရသည်။

ထို့ပြင် ကျိုင်းတုံ ဒေသခံအလှူရှင်များမှလည်း ရေသန့်၊ သွားတိုက်ဆေး၊ သွားပွတ်တံ ၊ဆပ်ပြာ နှင့် မျက်နှာသုတ်ပဝါ တို့ပေးသွားရန်စီစဉ်ထားရှိကြောင်းလည်း ဦးစိုးညွှန့်လွင်၏ လူမှုကွန်ရက်တွင် ရေးသားထားသည်။
ထိုနည်းတူ မေ ၆ရက်တွင်လည်း မိုင်းလားမှ ပြန်လာမည့်သူ ၄၉၀ ဦးရှိပြီး၊ မေ ၈ရက်တွင်လ်ညး လာအိုမှပြန်ဝင်လာမည်သူ ၁၇၈ဦးရှိကြောင်း သိရသည်။

မိုင်းလား အထူးဒေသ-၄တွင် Quarantine ဝင်ပြီး သျှမ်းပြည်နယ်သို့ပြန်လာမည့်သူ စုစုပေါင်း ၂၂၂၀ ဦးစာရင်းရှိပြီး၊ သျှမ်းပြည်မြောက်ပိုင်းကိုးကန့် ကိုယ်ပိုင်အုပ်ချုပ်ခွင့်ရဒေသ မှ ပြန်ဝင်မည့် ပြည်တော်ပြန် ၂သောင်းကျော် ရှိကြောင်း သိရသည်။