သျှမ်းပြည် တောင်ပိုင်း လွိုင်လင်ခရိုင် နမ့်စန်မြို့နယ် အတွင်း ယနေ့(ညနေ ၃နာရီဝန်းကျင်)တွင် လေပြင်းတိုက်ခတ်သဖြင့် နေအိမ်တချို့ ပျက်စီးခဲ့ကြောင်း သိရသည်။
အဆိုပါ လေပြင်းတိုက်ခတ်မှုကြောင့်ပျက်စီးသွားသည့် နေအိမ်တချို့ထဲတွင် မျိုးဆက်သစ် ပရဟိတ ကလေးငယ်များ၏ စာသင်ဆောင်နှင့် အိပ်ဆောင် ပျက်စီးခဲ့ပြီး၊ ထိုစာသင်ဆောင်များ ပြင်ဆင်ရန် အတွက် အခက်အခဲရင်ဆိုင်နေရကြောင်း မျိုးဆက်သစ် ပရဟိတ ကျောင်းမှတာဝန်ခံ မိုင်းအောင်ဆန်း က သျှမ်းသံတော်ဆင့် ကို ပြောသည်။
“ ညနေ က လေပြင်းရော မိုးသီးရော ကျတော့ ကလေးတွေ စာသင်ဆောင် နဲ့အမျိုးသား ကလေးငယ်တွေ အိပ်ဆောင် ပျက်စီးသွားတယ်။ ခေါင်းမိုးတွေ လွှင့်သွားတယ်။ အခု ပြင်ဆင်ဖို့ အတွက် ငွေကြေး အခက်အခဲတော့ ရှိတာပေါ့” ဟု မိုင်းအောင်ဆန်း က ဆိုသည်။
လက်ရှိ မှာ ကိုဗစ်-၁၉ ကာကွယ်ထိန်းချုပ် ကာလ ဖြစ်နေသည့် အတွက် ကလေးငယ်များသည် မိမိနေရပ်သို့ ပြန်သွားကြောင်း၊ လက်ရှိမှာ ကလေးငယ် ၁၀ဦးခန့်သာကျန်ရှိကြောင်း လည်း မိုင်းအောင်ဆန်း က ပြောသည်။
ထိုလေပြင်းဒဏ်ကြောင့် ပျက်စီးသွားသည့် မျိုးဆက်သစ် ပရဟိတ ကျောင်းသည် သျှမ်းပြည် ကျေးသီးမြို့နယ်၊ ပင်လုံ၊ လဲချား၊ မိုင်းရှူး။ မိုင်းကိုင်၊ ကွန်ဟိန်း၊ ကာလိ၊ ကျိုင်းတုံ၊ တာချီလိတ်၊ မိုင်းပျဉ်း၊ နမ့်စန် မြို့နယ် ရှိ ကလေးငယ် ၁၅၀ ကျော်လာရောက်သင်ကြားနေကြောင်း ကျောင်းတကျောင်းဖြစ်ကြောင်း သိရသည်။
Leave a Comments