ကိုဗစ်-၁၉ ကာလ သျှမ်းပြည်လွှတ်တော် အထူးအစည်းအဝေးခေါ်

ကိုဗစ်-၁၉ ကာကွယ် ထိန်းချုပ်သည့် ကာလအတွင်း သျှမ်းပြည် လွှတ်တော် အထူးအစည်းအဝေး ခေါ်ယူကြောင်း သတင်းရရှိသည်။

Photo by သျှမ်းပြည် လွှတ်တော်ရုံး

ထို လွှတ်တော် အထူး စည်းအဝေး ကို မေလ ၁၈ ရက် တွင် သျှမ်းပြည်တောင်ပိုင်း တောင်ကြီးမြို့ရှိ သျှမ်းပြည် လွှတ်တော်တွင် ကျင်းပသွားမည် ဖြစ်ကြောင်း သျှမ်းပြည် လွှတ်တော်ရုံး က မေလ ၂ ရက်နေ့ ရက်စွဲဖြင့် ထုတ်ပြန်ခဲ့သည်။

သျှမ်းပြည် လွှတ်တော် အထူးအစည်းအဝေး ခေါ်ဆိုခြင်းသည် ၂၀၂၀-၂၀၂၁ ခုနစ်အတွက် ဘတ်ဂျက် အတည်ပြုရန် အတွက် အစည်းအဝေး ခေါ်ဆိုခြင်းဖြစ်သည် ဟု လွှတ်တော်ကိုယ်စားလှယ် အသိုင်းအဝန်း ၏ပြောဆိုချက် အရသိရသည်။

“အခုခေါ်တာလဲ Covid-19 အတွက် နဲ့ ၂၀၂၀ – ၂၀၂၁ ဘတ်ဂျက်တွက် အတည်ပြုဖို့ ဆိုပြီးတော့ ခေါ်တာ။ တခြားမေးခွန်းတွေ အဆိုတွေတော့ မပါဘူး။ ဘတ်ဂျက်အတည်ပြုဖို့ပဲ” ဟု သီပေါမြို့နယ် အမှတ် (၁) လွှတ်တော်ကိုယ်စားလှယ် နန်းစမ်းစမ်းအေး က သျှမ်းသံတော်ဆင့် ကိုပြောသည်။

ထို ကိုဗစ် -၁၉ ကာလ လွှတ်တော် စတင်ချိန်တွင် ကျန်းမာရေးဝန်ကြီးဌာန က ညွှန်ကြားထားသည့်အတိုင်း တဦး နှင့် တဦး ၆ ပေ အကွာ နေထိုင်ရမည်ဖြစ်ပြီး၊ လွှတ်တော်ကိုယ်စားလှယ်များနေထိုင်သည့် ရိပ်သာလည်း ၁ ဦး တည်း သီးသန့် နေထိုင်ရမည် ဖြစ်ကြောင်း လွှတ်တော်အမတ် နန်းစမ်းစမ်းအေး ကပြောသည်။

“ ကျမ တို့အနေနဲ့တော့ ဖြစ်နိုင်ရင် မခေါ်သင့်ဘူး။ လွှတ်တော်က အတည်ပြုပြီးမှပဲ ဆက်လက်လုပ်ရမယ့် လုပ်ငန်းစဉ်တွေလည်း ရှိနေတော့ မဖြစ်မနေ ခေါ်ရတဲ့ ပုံစံမျိုးဖြစ်နေတာပါ“ ဟု နန်းစမ်းစမ်းအေး ကပြောသည်။

ဒုတိယအကြိမ် သျှမ်းပြည်နယ် လွှတ်တော်အထူးအစည်းအဝေး ကို ဘတ်ဂျတ် အတည်ပြုနိုင်ရန်အတွက် ခန့်မှန်းခြေ ၂ ရက် ပြုလုပ်မည် ဖြစ်ကြောင်း သိရသည်။


eastern_breeze
SHARE