တာ့ဆန်း ခေါ်သံလွင်မြစ်အထက်ပိုင်း (မိုင်းတုံ) ရေအားလျှပ်စစ်စီမံကိန်း နှင့်ပတ်သက်၍ ပြည်ထောင်စုအစိုးရမှ တိတ်တဆိတ်အကောင်အထည်ဖော်မည်ကို အရပ်ဖက်အဖွဲ့ အစည်းများ မှစိုးရိမ် နေကြကြောင်းသိရသည် ။
“ဖေဖော်ဝါရီလတုန်းက Three Gorges တရုတ်ကုမ္ပဏီက နိုင်ငံခြားသားတွေ ကျမတို့ သျှမ်းအရှေ့ကိုရောက် လာတယ်။မိုင်းတုံမှာရှိတဲ့ဝမ်ဆာလားကိုဝင်လာတယ်ဆိုတဲ့သတင်းရတယ်၊ဒေသခံလူထုတွေကလဲစိတ်ပူပြီးကျမတို့ကိုသတင်းပို့တယ်။ကျမတို့အရပ်ဖက်အဖွဲ့အစည်းတွေအနေနဲ့စိတ်ပူကြတယ်၊ဒါနဲ့ကျမတို့ဖတ်ရတဲ့စာအရ ပြည်ထောင်စုအစိုးရ ရဲ့ခွင့်ပြုချက်နဲ့သူတို့ဝင် လာ တယ် သျှမ်းပြည်နယ်အစိုးရတောင် မသိရပါဘူး ။ ဒါကြောင့် ကျမတို့လဲ ချက်ချင်းပဲဒီ campaign ကို လုပ်လိုက်ရတာဖြစ်တယ် ” ဟု ကျွန်းတစ်ထောင်မြေ ဖောင်ဒေးရှင်းမှ ဒါရိုက်တာ နန်းဝါနုကပြောသည် ။
မတ်လ (၂၅) ရက်နေ့က ကွန်ဟိန်း မြို့နယ်၏အစွန်ဆုံးဘက်ခြမ်းရှိ ၊ ၀မ်တာဆိုင်း ကျေးရွာ နမ့်ပန်ချောင်းနှင့် သံလွင်မြစ်ဆုံဆည်းရာ နေရာတွင် ကျွန်းတစ်ထောင်မြေဖောင်ဒေးရှင်း ၊ မိုင်းပန်လူငယ် ဖောင်ဒေးရှင်း ၊ သံလွင်သွေးချင်း အဖွဲ့နှင့် ကွန်ဟိန်းဒေသခံများ လူအင်အား တစ်ရာကျော်ဖြင့် သံလွင်မြစ် အဓွန့်ရှည်တည်တ့ံစေရေး၊ သံလွင်မြစ်ပေါ်ရေကာတာဆောက်လုပ်ခြင်းအားကန့်ကွက်ရေးနှင့်ပတ်သက်သည့် campaign ပြုလုပ် ခဲ့ကြောင်းသိရသည် ။
အဆိုပါစီမံကိန်းနှင့် ပတ်သက်၍ မူလ သတ်မှတ်ထားသည့် အတိုင်း မီကာဝပ် ရ၀၀၀ မလုပ်ပဲ တော့ ၃၀၀၀ မီကာဝပ် သာထုတ်လုပ်တော့မည့် သတင်းများထွက်ပေါ်နေသော်လည်း ပြည်ထောင်စုအစိုးရမှ ယင်းကိစ္စနှင့် ပတ်သက်၍ တရားဝင်ထုတ်ပြန်ထားခြင်မရှိသေးကြောင်းသိရသည် ။
“ပွင့်လင်းမြင်သာမှု နဲ့ တာဝန်ယူမှုတာဝန်ခံမှု လို့ပြောနေ တဲ့အချိန်အပေါ်မှာ မူဝါဒရေဒရာအရသာ အကောင် အထည်ဖော် နေပေမဲ့ အောက်ခြေဘက်မှာက တကယ်ထိရောက်မှု မရှိသေးဘူး ။ ဒီမိုကရေစီလို့ပြောပြီး သွားနေတဲ့အချိန်မှာ ဒီအစိုးရက အမှန်တကယ်ပဲ ဒေသခံတွေရဲ့ပြောရေးဆိုခွင့်တွေကို ထည့်သွင်းစဉ်းစားရဲ့ လား၊ မစဉ်းစားပေးဘူးလား ဆိုတာအဖြေပေါ်သွားပါလိမ့်မယ် ။ ကျနော်တို့က ဆက်လက်စောင့်ကြည့်ပါမယ် ၊ သူတို့ကအမှန်တကယ်ပဲ တာဝန်ယူမှု တာဝန်ခံမှု ရှိပြီး ဒီဒေသခံတွေရဲ့ အသံကို နားထောင်လား ၊ နားမထောင်ဘူးလား ဆိုတာကို စောင့်ကြည့်မှာပါ ” မိုင်းပန် လူငယ်ဖောင်ဒေးရှင်းမန်နေဂျာ ကိုအေပရယ် ဂျူးဂျူးကပြောသည် ။
မိုင်းတုံ စီမံကိန်းသည် ကွန်ဟိန်းမြို့နယ်အပါအဝင် (၁၆) မြို့နယ်သည် ရေဝပ်ဧရိယာ (၂၆၂) စတုရန်း မိုင်ထဲပါရှိနေကြောင်း သိရသည် ။
သျှမ်းပြည်နယ်အတွင်းသံလွင်မြစ်ပေါ်တွင်တည်ဆောက်ရန်ရည်ရွယ်ထားသည့် စီမံကိန်းများမှာကွန်လုံ ရေကာတာ ၊သံလွင် မြစ်လက်တက်ပေါ်ရှိ နောင်ဖာနှင့် မန်တောင်း ရေကာတာများမှာ ကွန်လုံ နှင့် တန့်ယန်းဒေသတို့တွင်တည်ရှိပြီးယင်းနေရာများ၌ တိုင်းရင်းသားလက်နက် ကိုင်များ ၏နယ်မြေအနီး တွင်တည်ရှိနေပြီး ကရင် ၊ သျှမ်း၊ မွန် စသည့် ဒေသခံများနှင့်အရပ်ဖက်လူမှုအဖွဲ့အစည်းများမှ (တာ့ဆန်း)ခေါ်သံလွင်မြစ်အထက်ပိုင်း (မိုင်းတုံ)ရေအား လျှပ်စစ်စီမံကိန်း နှင့်ပတ်သက်၍ ယနေ့တိုင် စိုးရိမ်ထိတ်လန့် နေကြကြောင်း သိရှိရပါသည်။
