သျှမ်းပြည်နယ်တောင်ပိုင်း ကွန်ဟိန်း ၊မိုင်းပန် ၊လင်းခေး ၊ မိုးနဲ စသည့် (၄) မြို့နယ်မှ တောင်သူများ နှင့် အစိုးရအဖွဲ့ ၊ကိုယ်စားလှယ်များ ၊ဌာနဆိုင်ရာများ ပထမအကြိမ် မြေယာဆိုင်ရာ ကိစ္စဆွေးနွေးပွဲ ကို တောင်ကြီးမြို့ ၊ သျှမ်း ပြည်နယ်အစိုးရရုံးရှိ အထွေထွေအုပ်ချုပ်ရေးခန်းမတွင် ကျင်းပခဲ့ပါသည် ။
ဒီဇင်ဘာ ၁၉ ရက်နေ့ကကျင်းပသောအဆိုပါဆွေးနွေးပွဲတွင် တောင်သူကိုယ်စားလှယ်များနှင့် အစိုးရအဖွဲ့ဝင် ဌာနဆိုင်ရာများကြားအချင်းချင်း နားလည်မှုနည်းပါးခြင်းအား လျော့ချနိုင်ရန်နှင့် တစ်ဖွဲ့နှင့်တစ်ဖွဲ့ အခက် အခဲများကို ဆွေးနွေးအဖြေရှာကြရန်အဓိကရည်ရွယ်ပြီး တောင်သူများလိုအပ်သည့် ဥပဒေ လုပ်ထုံး လုပ်နည်း များအား သက်ဆိုင်ရာဌာနများမှ မျှဝေပေးနိုင်ရန်၊ တောင်သူလယ်သမား အချင်းချင်း ကွန်ရက်ချိတ်ဆက်မှုအား ကောင်းလာရန် ရည်ရွယ် ကြောင်း အဆိုပါ ဆွေးနွေးပွဲကို ဦးဆောင်ကျင်းပသူ (ကျွန်းတစ်ထောင် မြေဖောင်ဒေးရှင်း) မှ ဒါရိုက်တာ နန်းဝါနုက ပြောသည် ။
“ သေချာတာက ဒီပွဲကနေ ချက်ချင်း နှစ်ဦးနှစ်ဖက်လုံးကျေနပ်တဲ့ အဖြေထွက်ဖို့ မမျှော် မှန်းထားပါဘူး၊ နှစ်ဦးနှစ်ဖက် လုံးရဲ့ အခက်အခဲအားနည်းချက် အားသာချက်တွေကိုနားလည်ပြီး အပြုသဘောဆောင်တဲ့ ပူးပေါင်းမှုကနေတစ်ဆင့် ပြည်သူတွေကို အကျိုးပြုနိုင်ဖို့ရည်ရွယ်ပါတယ် ” ၄င်းကဆက်လက်ပြောသည် ။
သျှမ်းပြည်နယ်အစိုးရအဖွဲ့ဝင် ၊ စိုက်ပျိုးရေးနှင့် မွေးမြူရေးဝန်ကြီး ဦးစိုင်းလုံးကျော်မှ လည်း “ ဒီလိုပွဲဟာ သျှမ်းပြည်နယ်မှာ ပထမဆုံး အကြိမ်ပြုလုပ်တဲ့ ပွဲဖြစ်ပါတယ်။အစိုးရ အဖွဲ့ စည်းတွေအနေနဲ့ဒေသမှာရှိတဲ့ တောင်သူတွေ ကို ဥပဒေလုပ်ထုံးလုပ်နည်းတွေနဲ့ အညီ လုပ်ဆောင် ပေးသွားမှာ ဖြစ်ပါတယ် ။ တစ်ချို့ကိစ္စရပ် တွေကလည်း ဖြေရှင်းလို့ ရလျှင် လည်း ဖြေရှင်းပေးမယ်။ တစ်ချို့ကိစ္စတွေက ဌာနဆိုင်ရာများမှာ က သတ်မှတ် ထားတာ တွေ ရှိတာကြောင့် ဘောင်ကျော်ပြီး လုပ်ဆောင်လို့ မရသည်များ ရှိသည်ကိုလည်း နားလည်ပေးစေချင်ပါတယ် ” ဟု ပြောကြားခဲ့သည် ။
တက်ရောက်လာသည့် (၄) မြို့နယ်မှ တောင်သူများ၏တူ ညီသည့် ပြဿနာများမှာ လယ်ယာမြေ ၊မြို့ရွာများ ၊သစ်တောကြိုးဝိုင်း တွင်း ပါ၀င်နေခြင်း ၊ တပ်မတော်သိမ်း ဆည်းမြေများ ၊ ပုံစံ(၇) ရရှိရန်ခက်ခဲနေခြင်း ၊ တောင်သူလယ်သမားများ၏ လယ်ယာ ထွက်ကုန် သီးနှံစျေးကွက်များမရှိခြင်း ၊လမ်းပန်းဆက်သွယ်ရေး အခက်အခဲကြောင့် လယ်ယာထွက်ကုန်များ စျေးကောင်း မရရှိခြင်းများ ဖြစ်ပါသည်။ ထို့အပြင် သိမ်းဆည်းခံ လယ်ယာများ အတွက်လည်း လျော်ကြေး နစ်နာကြေးများကိုလည်း ပြန်လည်ရယူလို ကြောင်း ကွန်ဟိန်းမြို့ မှ နန်းမြလေး ကတောင်သူများကိုယ်စား ရှင်းလင်း ပြောကြား သည် ။
အဆိုပါတွေ့ဆုံတွေ့ဆုံပွဲကို (၄) မြို့နယ်မှ ဌာနဆိုင်ရာများ ၊ တောင်သူများနှင့် အစိုးရ အဖွဲ့ အဝင်များ (၅၀) ဦးဝန်းကျင်ခန့်တက်ရောက်ခဲ့ကြောင်း သိရှိရပါသည် ။
