သျှမ်းပြည်တောင်ပိုင်း တောင်ကြီး စဝ်စံထွန်း ဆေးရုံတွင် ဆေးကုသမှုခံယူနေသည့် Covid-19 သံသယလူနာ အမျိုးသမီး တစ်ဦး သေဆုံးသွားကြောင်း သတင်းရရှိသည်။
အဆိုပါ စောင့်ကြည့်လူနာသည် ယမန်နေ့ (ဧပြီ ၂၈) ရက်မနက်ပိုင်းက စဝ်စံထွန်းဆေးရုံတွင် ဆေးကုသခံယူနေဆဲလူနာဖြစ်ပြီး၊ ထိုလူနာ၏ ဓာတ်ခွဲခန်းကို ရန်ကုန်အမျိုးသား ဓာတ်ခွဲခန်းသို့ပို့ဆောင်နေစဉ် သေဆုံးသွားကြောင်း ပြည်နယ် အထူးရောဂါ နိမ်နင်းရေး ဌာန လက်ထောက်ညွှန်ကြားရေးမှူးဒေါက်တာ နှင်းအိဖြူ က သျှမ်းသံတော်ဆင့် သို့ ပြောသည်။
သေဆုံးသွားသည် စောင့်ကြည့်သူသည် သျှမ်းပြည်တောင်ပိုင်း ရပ်စောက်မြို့နယ်(အင်တော) က အသက် ၅၀ အမျိုးသမီး ဖြစ်ပြီး၊ ဧပြီ ၂၃ ရက်နေ့က စဝ်စံထွန်းဆေးရုံ မှာ Covid-19 စောင့်ကြည့်လူနာ အဖြစ် တက်ရောက် ဆေးကုသမှု ခံယူခဲ့ကြောင်း ဒေါက်တာနှင်းအိဖြူ က ပြောသည်။
“ပြင်းထန် အဆုတ်ရောင် လက္ခဏာ နဲ့ ဆေးရုံတက်နေတာ။ သံသယ လူနာ အနေနဲ့ ကုထားတာ။ သူ့ရဲ့ ဓါတ်ခွဲနမူနာကိုတော့ ၂၇ ရက်နေ့က NHL ကိုတော့ ပို့ထားတယ်။ ဓါတ်ခွဲ အဖြေတော့ မရသေးဘူး” ဟု ဒေါက်တာနှင်းအိဖြူ က ဆိုသည်။
၎င်း အမျိုးသမီးသည် ရောဂါပိုး ရှိသူနှင့် ထိတွေ့မှု မရှိ၊ နိုင်ငံခြား ခရီးသွား ရာဇဝင်မရှိ။ သို့သော်သားဖြစ်သူမှာ မတ်လ ၁၅ ရက်နေ့က ထိုင်းနိုင်ငံမှ ပြန်လာသူ ဖြစ်ကြောင်း သိရသည်။
“သူ့ ဓါတ်ခွဲအဖြေ မထွက်သေးတော့ Covid-19 ပိုးရှိသူလို့တော့ ပြောလို့မရသေးဘူး။ ဓါတ်ခွဲ အဖြေက ၃ ရက်လောက်ထပ် စောင့်ရမယ်။ သူက နိုင်ငံခြားသွားထားတဲ့ ရာဇဝင် တော့မရှိဘူး” ဟု ဒေါက်တာနှင်းအိဖြူ ကပြောသည်။
မြန်မာနိုင်ငံ တွင် Covid-19 ရောဂါပိုးတွေ့ရှိသူ ၁၅၀ ဦး ရှိပြီး သေဆုံးသူ ၅ ဦး နှင့်ရောဂါမှ ပြန်လည်သက်သာလာသူ ၁၆ ဦး ရှိကြောင်း ကျန်းမာရေး နှင့်အားကစားဝန်ကြီးဌာန ကထုတ်ပြန်ထားသည်။
Leave a Comments