သျှမ်းပြည်တောင်ပိုင်း တောင်ကြီးမြို့ရှိ စဝ်စံထွန်း ဆေးရုံတွင် ဆေးကုသမှု ခံယူနေသည့် ကိုဗစ်လူနာ အမှတ် (၁၂၁) နှင့် ထိတွေ့ ဆက်စပ်သူ အားလုံး ပိုးမတွေ့ရကြောင်း သိရသည်။

လူနာအမှတ် ၁၂၁ နှင့် ဆက်စပ်သူ မိသားစု အပါအဝင် သူငယ်ချင်းများ၊ သွားဆရာဝန် နှင့် လေယာဉ်ပေါ်က ခရီးသည် စုစုပေါင်း ၅၄ ဦး စလုံးသည် Covid-19 ရောဂါ ပိုးကင်းစင်သူ ဖြစ်ကြောင်း သိရသည်။

“လူနာ အမှတ် ၁၂၁ နဲ့ ထိတွေ့တဲ့သူ အကုန်လုံး ဆရာမ တို့ဘက်က close contact အနေနဲ့ စစ်ထားတာ ၅၄ ယောက်လုံး ရဲ့ အဖြေက Negative ဖြစ်တယ်။ အားလုံး ပိုးကင်းစင် သွားပြီ” ပြည်နယ်အထူးရောဂါ နှိမ်နင်းရေးဌာန လက်ထောက်ညွန်ကြားရေးမှူး ဒေါက်တာနှင်းအိဖြူ ကသျှမ်းသံတော်ဆင့် ကိုပြောသည်။

လူနာအမှတ် ၁၂၁ နှင့်ထိတွေ့သူ အားလုံး Negative ဖြစ်သဖြင့် Secondary Contact များကို စစ်ဆေးရန် မလိုအပ်တော့ကြောင်း ဒေါက်တာ နှင်းအိဖြူ ကပြောသည်။

“Secondary Contact တွေက စစ်စရာ မလိုတော့ဘူး။ Primary Contact တွေထဲက Close Contact ဖြစ်တဲ့သူ ထိတွေ့မှု များတဲ့သူတွေ ဆရာမ တို့က second sample ပေါ့နော် ဒုတိယအကြိမ် ဓါတ်ခွဲနမူနာ ယူဖို့ ရှိတယ်“ ဟု ဒေါက်တာနှင်းအိဖြူ ကဆိုသည်။

လူနာ အမှတ် ၁၂၁ သည် မတ်လ ၂၂ ရက်နေ့က အင်္ဂလန် နိုင်ငံမှ ပြန်လာသူ ဖြစ်ပြီး ရန်ကုန် Airport Hotel တွင် Quarantine ဝင်ခဲ့သည်။ ထိုကာလ အတွင်း အနံ့အရသာ ပျောက်နေသည့် အကြောင်းကို ကျန်းမာရေး ဝန်ထမ်းများကို ပြောပြခဲ့သည်။

သို့သော် ထိုအချိန်တွင် အံသွားပေါက်နေသည့် အတွက်ကြောင့် Covid-19 ဖြစ်မှန်း မထင်ဘဲ Quarantine ရက်ပြည့်သည့် ဧပြီ ၅ ရက်နေ့တွင် ပြန်လာခဲ့သည်။

ထို့ပြင် ဧပြီ ၁၉ ရက်ထိ လူနာ အမှတ် ၁၂၁ သည် အနံ့အရသာ မရသဖြင့် တောင်ကြီးဆေးရုံကို သွားပြခဲ့ပြီး သံသယလူနာအဖြစ် သတ်မှတ်ခဲ့ရာ ဧပြီ ၂၁ ရက် ညတွင် ဆေးစစ်ချက် အဖြေ positive အဖြေထွက်ခဲ့သည်။
ထို့ကြောင့် လူနာအမှတ် ၁၂၁ နှင့် ထိတွေ့ဆက်စပ်ခဲ့သူ စုစုပေါင်း ၅၄ ဦးရှိပြီး ထပ်ဆင့် ထိတွေ့ သူများလည်း ရှိကြောင်း သိရသည်။
မြန်မာနိုင်ငံတွင် ပိုးတွေ့လူနာ ၁၄၉  ဦး ရှိပြီး သေဆုံးသူ ၅ ဦးရှိကာ ပြန်လည်ကောင်းမွန်လာသူ ၁၆ ဦးရှိကြောင်း ကျန်းမာရေး နှင့် အားကစားဝန်ကြီးဌာန က ထုတ်ပြန်ထားသည်။