သျှမ်းပြည်မြောက်ပိုင်း လားရှိုးပြည်သူ့ဆေးရုံတွင် ဆေးကုသမှု ခံယူနေသည့် ကိုဗစ်-၁၉ လူနာ အမှတ် ၁၄ ၏ ဆေးစစ်ချက် ပထမအကြိမ် မှာ Negative ဖြစ်ကြောင်း သိရသည်။

အဆိုပါ လူနာ အမှတ် ( ၁၄) သည် ထိုင်းနိုင်ငံ မှ ကျောက်မဲမြို့သို့ ပြန်လည်ရောက်ရှိလာပြီး မတ် ၂၈ ရက်ည တွင် အန်ခြင်း ၊ ချောင်းဆိုးခြင်းကြောင့် ကျောက်မဲဆေးရုံသို့ ဆေးကုသမှု ခံယူခဲ့ခြင်း ဖြစ်သည်။

“ဒီမနက် ၄ နာရီ မှာ အဖြေသိရတယ်။ Negative လို့ပြောပါတယ်။ ဆေးရုံတော့ မဆင်းရသေးဘူး။ ဒီနေ့ နမူနာ ထပ်ယူရပါတယ်။ ဓါတ်ခွဲနမူနာ ပြန်ပို့လို့ အဲ့ဒီကနေ Negative ဖြစ်တယ်ဆိုလို့ရှိရင် Home Quarantine သို့မဟုတ် Hotel Quarantine ၂၁ ရက် နေရပါမယ်”ဟု လားရှိုးပြည်သူ့ဆေးရုံကြီး မှ ဒေါက်တာဉာဏ်မြင့် က သျှမ်းသံတော်ဆင့် ကိုပြောသည်။

လူနာ အမှတ် ၁၄ကို ဓာတ်ခွဲခန်း နမူနာ ၂ကြိမ်စစ်ဆေးပြီး Negative ဖြစ်ပါက Quarantine ၂၁ ရက်ထပ်နေရဖြစ်ပြီး၊ ထိုကြားထဲတွင် ထူးခြားမှု တစုံတရာရှိလာပါက ပြန်စစ်ရမည်ဖြစ်ကြောင်း ဒေါက်တာဉာဏ်မြင့် ပြောသည်။

“ အဲ့ဒါပြီးမှသာ စိတ်ချ လက်ချ အပြင်မှာ နေလို့ရပါမယ်” ဟု ဒေါက်တာဉာဏ်မြင့် ကဆိုသည်။

ယခု သည် လူနာအမှတ် ၁၄ကို ဧပြီ ၂၄ရက် နေ့တွင် ထပ်မံ စစ်ဆေးရာမှာ ပထမအကြိမ် Negative ဖြစ်ကြောင်း သိရသည်။

“အရင် နှစ်ခေါက် စစ်ထားတာ ရှိပါတယ်။ ၂ ခေါက်ကတော့ Negative မဖြစ်ဘူး။ ပိုး ရှိနေသေးတယ်လို့ အဖြေထွက်ပါတယ်။ ၂၄ ရက်နေ့ စစ်တဲ့ချိန်ကျတော့ Negative ဖြစ်ပါတယ်။ ပုံမှန် ဆိုတော့ ၂ ရက်နေပြီးရင် ပြန်စစ်ပါတယ်။ အဖြေသိတာ နည်းနည်းနောက်ကျတော့ ဒီနေ့မှ ပြန်စစ်ပါမယ်”ဟု ဒေါက်တာဉာဏ်မြင့် က ထပ်လောင်းပြောသည်။

အဆိုပါ ကျောက်မဲ လူနာ အမျိုးသားသည် အသက် ၂၄ နှစ်ရှိပြီး မတ်လ ၂၅ ရက်နေ့တွင် ထိုင်းနိုင်ငံ ဘန်ကောက်မြို့မှ မြန်မာနိုင်ငံ တာချီလိတ်မြို့ သို့ရောက်ရှိလာကြောင်း၊ တာချီလိတ်မြို့တွင် ၂ ည တည်းခိုခဲ့ပြီးမှ မတ်လ ၂၈ ရက်နေ့မှာ မန္တလေးမြို့သို့ လေယာဉ်ဖြင့် လာကြောင်း ထိုမှ တဆင့် ကျောက်မဲ သို့ ကိုယ်ပိုင် ကားဖြင့် ပြန်သွားခြင်း ဖြစ်သည်။

လက်ရှိ မြန်မာနိုင်ငံသည် ပိုးတွေ့ အတည်ပြု လူနာ ၁၄၆ ဦးရှိပြီး သေဆုံးသူ ၅ ဦး နှင့် ပြန်လည်ကောင်းမွန်လာသူ ၁၆ ဦး ရှိကြောင်း သိရသည်။